മലയാളികള്‍ നെഞ്ചേറ്റിയ പരമ്പരയായിരുന്നു ഉപ്പും മുളകും. ഫ്‌ളവേഴ്‌സ് ചാനലില്‍ സംപ്രേക്ഷണം ചെയ്തിരുന്ന ഉപ്പും മുളകും എന്ന പരമ്പര റേറ്റിങിലും ഒന്നാം സ്ഥാനത്തായിരുന്നു. അതിനെ അനുകരിച്ച് പിന്നീട് പല പരമ്പരകള്‍ വന്നു എങ്കിലും ഉപ്പിനും മുളകിനും ഒപ്പമെത്തിയില്ല. ഇപ്പോഴിതാ അതേ ടീം വീണ്ടും ഒന്നിയ്ക്കുന്ന പുതിയ പരമ്പരയാണ് എരിവും പുളിയും. പരമ്പരയുടെ ആദ്യത്തെ എപ്പിസോഡ് ഇന്നലെ, ജനവരി 17 ന് പുറത്ത് വന്നു.

ഉപ്പും മുളകും എന്ന പരമ്പരയില്‍ കണ്ട അച്ഛനും അമ്മയും അഞ്ച് മക്കളും തന്നെയാണ് എരിവും പുളിയും എന്ന പരമ്പരയിലും ഉള്ളത്. അവരുടെ കുറുമ്പുകളും കുസൃതികളും കുടുംബ വിശേഷവും എല്ലാം ഏറെ കുറേ അത് തന്നെ. അമ്മയുടെ ചെലവില്‍ കഴിയുന്ന അച്ഛനും കാര്യവും കാര്യക്കേടും പറയുന്ന മക്കളും.. അവരുടെ രസകരമായ കുടുംബ ജീവിതവും ആണ് എരിവും പുളിയും.

ഉപ്പും മുളകും എന്ന പരമ്പരയില്‍ നിന്ന് എരിവും പുളിയും എന്ന പരമ്പരയിലേക്ക് എത്തുമ്പോള്‍ മാറ്റമില്ലേ എന്ന് ചോദിച്ചാല്‍ മാറ്റമുണ്ട്. കഥാപാത്രങ്ങളുടെ വേഷവിധാനം മാറി. പേര് മാറി. ജീവിത സാഹചര്യങ്ങളും മാറി. ബാലു, നീലൂ മുടിയന്‍, ലച്ചു, ശിവ, പാറു തുടങ്ങിയ കഥാപാത്രങ്ങള്‍ എല്ലാം നമുക്ക്, നമ്മുടെ സ്വന്തം വീട്ടിലുള്ളവരായി പെട്ടന്ന് ബന്ധിപ്പിക്കാന്‍ കഴിയുമായിരുന്നു. എന്നാല്‍ ഇവിടെ പേര് ഒന്നും പെട്ടന്ന് നാവില്‍ വരുന്നില്ല.

കഥാപാത്രങ്ങള്‍ക്ക് തന്നെ പരസ്പരം പേര് വിളിയ്ക്കുമ്പോള്‍ കണ്‍ഫ്യൂഷനുള്ളത് പോലെയാണ് ആദ്യത്തെ എപ്പിസോഡ് കണ്ടപ്പോള്‍ തോന്നുന്നത്. നീലുവായി പ്രേക്ഷകര്‍ക്ക് പരിചയമുള്ള നിഷ സാരംഗ് ജൂലി എന്ന കഥാപാത്രത്തെയാണ് അവതരിപ്പിയ്ക്കുന്നത്. ബാലുവായി എത്തിയിരുന്ന ബിജു സോപാനും ഫ്രെഡി എന്ന പേരിലും. ജോജോ, ജാനി, ജോ, ജെന്ന, ക്യൂട്ടി എന്നിങ്ങനെയാണ് മക്കളുടെ പേര്.

പഴയതിനെ എല്ലാം മറന്നേക്കൂ , പുതിയ കാലത്തെ പുതിയ ചിരിക്കാഴ്ചകളുമായി ഞങ്ങള്‍ എന്ന ടൈറ്റില്‍ ടാഗോടു കൂടെയാണ് എരിവും പുളിയും പ്രേക്ഷകര്‍ക്ക് മുന്നിലെത്തുന്നത്. തുടക്കത്തില്‍ സ്വാഭാവികമായ താരതമ്യപ്പെടുത്തലുകള്‍ ഉണ്ടായേക്കാം. എന്നാല്‍ കഥാപാത്രങ്ങള്‍ പരിചിതമാകുന്നതോടെ പ്രേക്ഷകര്‍ക്ക് ഫ്രെഡ്ഡിയുടെയും ജൂലിയുടെയും കുടുംബ കാഴ്ചകള്‍ പുതിയ അനുഭവമായിരിയ്ക്കും എന്ന കാര്യത്തില്‍ സംശയമില്ല.