സങ്കടം അടക്കാനാവാതെ....മുണ്ടക്കൈ ദുരന്തത്തില്‍ സീരിയല്‍ ക്യാമറാമാന്റെ മൃതദേഹം കണ്ടെത്തി....ഹൃദയഭേദകമാണ് ദുരന്തഭൂമിയിലെ ഓരോ കാഴ്ചയും. ... ഒറ്റ രാത്രി കൊണ്ട് ഇല്ലാതായത് മുണ്ടക്കൈ എന്ന ഒരു ഗ്രാമമാണ്. പ്രിയപ്പെട്ടവരെ എവിടെ അന്വേഷിക്കണമെന്നുപോലും അറിയാതെ വിറങ്ങലിച്ചുനില്‍ക്കുകയാണ് നാട്. ഇരുനൂറോളം വീടുകളാണ് റോഡിന് ഇരുവശവുമായി ഉണ്ടായിരുന്നത്. മുണ്ടക്കൈയിലാണ് ഉരുള്‍പൊട്ടലുണ്ടായതെങ്കിലും മൂന്നുകിലോമീറ്റര്‍ ഇപ്പുറമുള്ള ചൂരല്‍മല സ്‌കൂള്‍റോഡിലും ജി.വി.എച്ച്.എസ്. സ്‌കൂളിലും പാലത്തിലും അമ്പലത്തിലുംവരെ വെള്ളവും ചെളിയും പാറക്കല്ലുകളുമെത്തി. നിരനിരയായി കിടത്തിയ മൃതദേഹങ്ങള്‍, തിരിച്ചറിയാന്‍ ഫോണില്‍ ഫോട്ടോയുമായി എത്തുന്ന ബന്ധുക്കള്‍.

മണ്ണിനടിയില്‍ ഇനിയുമെത്രപേരെന്ന് ഊഹിക്കാന്‍ പോലുമാകില്ല. മുണ്ടക്കെയിലെ 540 വീടുകളില്‍ ബാക്കിയുള്ളത് വിരലിലെണ്ണാവുന്നവ മാത്രം. രണ്ട് ഗ്രാമങ്ങളാണ് നാമാവശേഷമായത്. നൂറ് കണക്കിനാളുകളെ ഇനിയും കണ്ടെത്താന്‍ ബാക്കി. ജീവനും ജീവിതവും കൈയില്‍പിടിച്ചോടിയവര്‍ ഉറ്റവര്‍ക്കായി നെഞ്ചുലഞ്ഞ് തിരയുകയാണ്.

ആ തെരച്ചിലില്‍ സീരിയല്‍ ക്യാമറാമാന്റെ മൃതദേഹം കണ്ടെത്തി.... ഫെഫ്ക എംഡിടിവി അംഗമായ ഫോക്കസ് പുള്ളര്‍ ഷിജുവിനെ ആണ് മരിച്ചനിലയില്‍ കണ്ടെത്തിയത്. മലയാള സിനിമയുടെ ഡയറക്ടേഴ്‌സ് യൂണിയനായ ഫെഫ്ക ആണ് ഇക്കാര്യം അറിയിച്ചിരിക്കുന്നത്.

ഷിജുവിന്റെ അമ്മയുടെ മൃതദേഹവും കണ്ടെത്തിയിട്ടുണ്ട്. ദുരന്തത്തില്‍ നിന്നും രക്ഷപ്പെട്ട ഷിജുവിന്റെ സഹോദരനും മകളും ചികിത്സയിലാണ്. ഷിജുവിന്റെ അച്ഛന്‍ ഉള്‍പ്പെടെയുള്ള മറ്റ് ബന്ധുക്കള്‍ക്ക് വേണ്ടി തിരച്ചില്‍ തുടരുകയാണ്. ഷിജുവിന്റെ അയല്‍ക്കാരനും ക്യാമറ അസ്സിസ്റ്റന്റും സഹപ്രവര്‍ത്തകനുമായ പ്രണവ് പരിക്കുകളോടെ രക്ഷപ്പെട്ടു. ഇയാളുടെ വീട്ടുകാര്‍ക്ക് വേണ്ടിയുള്ള തിരച്ചില്‍ തുടരുകയാണ്. സൂര്യ ഡിജിറ്റല്‍ വിഷനിലെ ക്യാമറ അസിസ്റ്റന്റായ ഷിജു മാളികപ്പുറം, അനിയത്തിപ്രാവ് , അമ്മക്കിളിക്കൂട് ഉള്‍പ്പടെ നിരവധി സീരിയലുകളില്‍ പ്രവര്‍ത്തിച്ചിട്ടുണ്ട്.


അതേസമയം രണ്ടു വര്ഷം മുന്‍പുണ്ടായ ഉരുള്‍പൊട്ടലില്‍ ഷിജുവിന്റെ കുടുംബം ഭാഗ്യം കൊണ്ടാണ് രക്ഷപ്പെട്ടത്. അന്നുണ്ടായ സംഭവത്തില്‍ വീടിന്റെ ഒരു ഭാഗം തകര്‍ന്നിരുന്നു. എങ്കിലും ഷിജുവും കുടുംബവും വലിയ പരുക്ക് ഏല്‍ക്കാതെ രക്ഷപ്പെട്ടു. പിന്നാലെയാണ് ഇത്തവണ വീടും ജീവനും കവര്‍ന്നു ദുരന്തമെത്തിയത്. അതേസമയം വിദേശത്തുള്ള ചേട്ടനും നാട്ടിലേക്ക് പുറപ്പെട്ടിരിക്കുകയാണ്.