മലര്‍വാടി ആര്‍ട്‌സ് ക്ലബ്ബ്, തട്ടത്തിന്‍ മറയത്ത്, എന്നീ ചിത്രങ്ങള്‍ക്കു ശേഷം വിനീത് ശ്രീനിവാസന്‍  നിവിന്‍ പോളി ടീം വീണ്ടുമൊന്നിക്കുന്ന 'ജേക്കബിന്റെ സ്വര്‍ഗ്ഗരാജ്യം' ചിത്രീകരണം ഈയിടെ പൂര്‍ത്തിയായിരുന്നു. ഈ സിനിമയില്‍ അഭിനയിക്കാനാണ് താനേറ്റവും ബുദ്ധിമുട്ടിയതെന്ന് നിവിന്‍ അടുത്തിടെ ഒരഭിമുഖത്തില്‍ പറഞ്ഞതിന് പുറമേ ഇപ്പോഴിതാ സംവിധായകനായ വിനീതും പറയുന്നു ഏറെ ഹോം വര്‍ക്കും മാനസികമായ അധ്വാനവും വേണ്ടി വന്ന സിനിമയാണ് 'ജേക്കബിന്റെ സ്വര്‍ഗ്ഗരാജ്യം' എന്ന്.

മധ്യവയസ്‌ക്കരായ ജേക്കബ്  ഷേര്‍ലി എന്ന ദമ്പതിമാരുടെയും നാല് മക്കളടങ്ങുന്ന അവരുടെ കുടുംബത്തിന്റെയും കഥയാണ് സിനിമ പറയുന്നത്. ദുബായില്‍ സ്ഥിര താമസക്കാരായ ഒരു ക്രിസ്ത്യന്‍ കുടുംബം, ഇത് വരെ താന്‍ പരിചയിച്ചിട്ടില്ലാത്ത ഒരു പ്രമേയവും പശ്ചാത്തലവും ആയിരുന്നതിനാല്‍ വളരെയധികം റിസര്‍ച്ച് ചെയ്താണ് തിരക്കഥ പൂര്‍ത്തിയാക്കിയതെന്ന് സംവിധായകന്‍ പറയുന്നു.

മലര്‍വാടിയും, തട്ടത്തിന്‍ മറയത്തും, വടക്കന്‍ സെല്‍ഫിയുമെല്ലാം പോലെയല്ല ഒരു യഥാര്‍ത്ഥ വ്യക്തിയുടെ ജീവിതത്തെ അടിസ്ഥാനമാക്കിയാണ് ജേക്കബിന്റെ കഥാ പശ്ചാത്തലം, വിനീതിന്റെ തന്നെ ഒരു സുഹൃത്തിന്റെ കഥയാണത്രേ ഈ ചിത്രം.

സിനിമയ്ക്കു വേണ്ടി തയ്യാറാക്കിയ ഒരു ഭാവനാ സൃഷ്ടി എന്നതിലുപരി ഒരു യഥാര്‍ത്ഥ ജീവിതത്തിന്റെ നേര്‍ക്കാഴ്ച എന്ന നിലയ്ക്ക് അതിന്റെ സത്ത ചോര്‍ന്നു പോകാതിരിക്കാനാണ് താനീ സിനിമയില്‍ ശ്രമിച്ചിരിക്കുന്നതെന്ന് വിനീത് പറയുന്നു. വെല്ലുവിളികള്‍ നിറഞ്ഞ ചിത്രീകരണം ഒരു രസനീയമായ അനുഭവമായിരുന്നു. അതുകൊണ്ട് തന്നെ 'ജേക്കബിന്റെ സ്വര്‍ഗ്ഗരാജ്യം' തന്റെ കരിയറിലെ ഒരു പ്രധാനപ്പെട്ട സിനിമ ആയിരിക്കുമെന്നും സംവിധായകന്‍ വിശ്വസിക്കുന്നു. നിവിന്‍ പോളി, രണ്‍ജി പണിക്കര്‍, ശ്രീനാഥ് ഭാസി, ലക്ഷ്മി രാമകൃഷ്ണന്‍, സായ്കുമാര്‍ എന്നിവര്‍ പ്രധാന വേഷങ്ങളില്‍ അഭിനയിക്കുന്ന ചിത്രത്തില്‍ 'മിടുക്കി' എന്ന റിയാലിറ്റി ഷോയിലൂടെ പ്രേക്ഷകര്‍ക്ക് പരിചിതയായ റീബ മോണിക്ക ജോണ്‍ ആണ് നായിക. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha