മമ്മൂട്ടിയുടെയും മോഹന്‍ലാലിന്റെയും നായികയായി തിളങ്ങിയിരുന്ന ഭാനുപ്രീയ മടങ്ങിവരുന്നു. വിവാഹ ശേഷം ഭാനുപ്രിയ സിനിമ വിട്ട് സീരിയലുകളില്‍ അഭിനയിച്ചിരുന്നു. ജ്യോതിക പ്രധാനകഥാപാത്രമാകുന്ന കുട്രം കടിത്താന്‍ എന്ന ചിത്രത്തിലൂടെയാണ് ബിഗ് സ്‌ക്രീനിലെത്തുന്നത്. ഉര്‍വശിയും ശരണ്യ പൊന്‍വര്‍ണനും അഭിനയിക്കുന്നുണ്ട്. എന്നാല്‍ 36 വയസിലേതു പോലെ സ്ത്രീകള്‍ക്ക് പ്രാധാന്യമുള്ള സിനിമയല്ല ഇതെന്ന് സംവിധായകന്‍ ബ്രഹ്മ പറഞ്ഞു. ത്രീയില്‍ ധനുഷിന്റെ അമ്മയായി ചെറിയ വേഷത്തിലാണ് ഭാനുപ്രിയ അവസാനം അഭിനയിച്ചത്. എന്നാല്‍ തന്റെ ചിത്രത്തില്‍ അവര്‍ക്ക് വളരെ പ്രാധാന്യമുള്ള വേഷമാണെന്നും ബ്രഹ്മ പറഞ്ഞു. ജ്യോതികയാണ് ഭാനുപ്രിയയെ ചിത്രത്തിലേക്ക് കാസ്റ്റ് ചെയ്തത്. 

ആദര്‍ശ് കൗശലിനെ 1998ല്‍ വിവാഹം ചെയ്തതോടെയാണ് ഭാനുപ്രിയ സിനിമ വിട്ടത്. ഒരു മകളുണ്ട്. എന്നാല്‍ 2005ല്‍ ഇരുവരും വേര്‍പിരിഞ്ഞു. അതോടെയാണ് ടെലിവിഷന്‍ രംഗത്ത് താരം സജീവമായത്. അതേസമയം ലോറന്‍സിന്റെ ശിവലിംഗ എന്ന ചിത്രത്തില്‍ ഭാനുപ്രിയ ലോറന്‍സിന്റെ അമ്മയായി അഭിനയിക്കുന്നു. ചിത്രത്തിന്റെ പൂജ കഴിഞ്ഞ ദിവസം ചെന്നൈയില്‍ നടന്നു. വളരെനാളായി സിനിമയില്‍ സജീവമാകണമെന്ന് കരുതുന്നു. പക്ഷെ ടെലിവിഷനിലെ തിരക്കുകള്‍ കാരണം സാധിച്ചില്ലെന്ന് ഭാനുപ്രിയ പറഞ്ഞു. 49 വയസായ തനിക്ക് ഇനി അമ്മ, സഹോദരി വേഷങ്ങളെ ചെയ്യാന്‍ കഴിയൂ എന്നും താരം പറഞ്ഞു.

മോഹന്‍ലാലിന്റെ നായികയായി രാജശില്‍പിയിലും മമ്മൂട്ടിയുടെ നായികയായി അഴകിയരാവണനിലും ഭാനുപ്രിയ തിളങ്ങിയിരുന്നു. ഋഷ്യശൃംഗന്‍ എന്ന സിനിമയില്‍ ഗ്ലാമര്‍ വേഷത്തിലും അഭിനയിച്ചു. ഇപ്പോഴും ഇന്റര്‍നെറ്റില്‍ ഏറ്റവും കൂടുതല്‍ ആളുകള്‍ ചിത്രത്തിലെ ഹോട്ട് സീനുകള്‍ സെര്‍ച്ച് ചെയ്യുന്നുണ്ട്. ജയറാം , സത്യന്‍ അന്തിക്കാട് ടീമിന്റെ കൊച്ചുകൊച്ച് സന്തോഷങ്ങളില്‍ നായികയ്ക്ക് തുല്യമായ വേഷത്തിലും ഭാനുപ്രിയ അഭിനയിച്ചു. അതിന് ശേഷം മലയാളത്തില്‍ അഭിനയിച്ചിട്ടില്ല. എന്നാല്‍ നല്ല വേഷങ്ങള്‍ ലഭിച്ചാല്‍ മലയാലത്തിലും അഭിനയിക്കുമെന്ന് താരം വ്യക്തമാക്കി.