ആരാധകരുടെ അനുമോദനം തന്നെ ഭയപ്പെടുത്തുന്നെന്ന് ധനുഷ്. പലരും ഇപ്പോള്‍ താരത്തെ ഇളയ സൂപ്പര്‍ സ്റ്റാര്‍ എന്നാണ് വിളിക്കുന്നത്. രജനികാന്തിന്റെ മരുമോന്‍ ആയത് അടക്കം കണക്കിലെടുത്താണിത്. തന്റെ യോഗ്യതയ്ക്ക് ഉപരി തന്നെ അനുമോദിക്കുന്നവരെ ഭയമാണെന്ന് ധനുഷ് പറഞ്ഞു. അവരുടെ വാക്കുകള്‍ തന്നെ ലജ്ജിതനാക്കുന്നു. സ്‌നേഹം കൊണ്ടാണ് ഇത്തരത്തിലുളള അനുമോദനങ്ങളെങ്കില്‍ ആ സ്‌നേഹത്തിന് താരം നന്ദിയും പറഞ്ഞു. ഒരു ചിത്രത്തിന്റെ വിജയപരാജയത്തിന്റെ എഴുപത് ശതമാനം ക്രെഡിറ്റും സംവിധായകനുള്ളതാണ്. സംവിധായകന്റെ നിയന്ത്രണത്തിലാണ് സിനിമ പോകുന്നത്. ഒരു പക്ഷെ, സാധാരണ പ്രേക്ഷകന് ഇത് അറിയില്ലെന്നും താരം പറഞ്ഞു. 

തന്റെ മികച്ച പ്രകടനങ്ങള്‍ക്ക് പിന്നില്‍ മികച്ച സംവിധായകരാണെന്നും ധനുഷ് പറഞ്ഞു. ഇളയദളപതി എന്നറിയപ്പെടുന്നത് വിജയ് ആണ്. അദ്ദേഹവുമായി തന്നെ താരതമ്യപ്പെടുത്തുന്നതില്‍ അര്‍ത്ഥമില്ലെന്നും ധനുഷ് പറഞ്ഞു. വിജയ് യുടെ ഉള്‍പ്പെടെ സിനിമകള്‍ കണ്ടാണ് താന്‍ വളര്‍ന്നതെന്നും അവര്‍ക്കൊപ്പം എത്താനല്ല തന്റെ ശ്രമമമെന്നും ധനുഷ് വ്യക്തമാക്കി. തമിഴ്‌നാട്ടിലെ ഫാന്‍സ് അസോസിയേഷനുകള്‍ തമ്മിലുള്ള തര്‍ക്കങ്ങളാണ് ഇത്തരം വിശേഷണങ്ങള്‍ക്ക് പിന്നിലെന്നും ധനുഷ് പറഞ്ഞു. താരങ്ങളുടെ മോശം സിനിമകള്‍ ഫാന്‍സുകാര്‍ സൂപ്പര്‍ഹിറ്റാക്കുന്നില്ല. അതിനാല്‍ യഥാര്‍ത്ഥ പ്രേക്ഷകരാണ് സിനിമയെ യഥാര്‍ത്ഥത്തില്‍ വിജയിപ്പിക്കുന്നതെന്നും ധനുഷ് പറഞ്ഞു.

താന്‍ സിനിമയെ ഏറെ സ്‌നേഹിക്കുന്നു. അതുകൊണ്ടാണ് താന്‍ അഭിനയിക്കാത്ത, നല്ല സിനിമകള്‍ നിര്‍മിക്കുന്നതെന്നും ധനുഷ് പറഞ്ഞു. അതിനാണ് നിര്‍മാണ കമ്പനി തുടങ്ങിയതെന്നും താരം പറഞ്ഞു. സിനിമയാണ് ജീവിതം തന്നത്. അതിനാല്‍ തന്റെ അധ്വാനവും പ്രതിഫലത്തിന്റെ നല്ലൊരു പങ്കും സിനിമയ്ക്കായി വിനിയോഗിക്കുമെന്നും ധനുഷ് വ്യക്തമാക്കി. ആരാധകരുടെ സ്‌നേഹപ്രകടനങ്ങള്‍ വികാരങ്ങള്‍ക്ക് അടിമപ്പെട്ടുള്ളതാകരുതെന്നും വിവേകത്തോടെ ആകണമെന്നും താരം പറഞ്ഞു.