ഒരു ഇടവേളയ്ക്ക് ശേഷം 2003ല്‍ സത്യന്‍ അന്തിക്കാട് സംവിധാനം ചെയ്ത മനസ്സിനക്കരെ എന്ന ചിത്രത്തിലൂടെയാണ് നടി ഷീല സിനിമയിലേക്ക് തിരിച്ചു വന്നത്. ഇപ്പോള്‍ സിനിമയില്‍ സജീവമാകാനുള്ള തയ്യാറെടുപ്പിലാണ് നടി ഷീല.
എന്നാല്‍ പഴയ പോലെയല്ല ഷൂട്ടിങ് സെറ്റില്‍ എത്തിയാല്‍ ഒറ്റപ്പെട്ട അവസ്ഥയാണെന്ന് നടി ഷീല പറയുന്നു.

പുതുമുഖങ്ങളാണ് ഇപ്പോള്‍ ഭൂരിഭാഗവും. ഇവരാരും സെറ്റില്‍ തന്നോട് സംസാരിക്കാന്‍ തയ്യാറുകുന്നില്ല. പുതിയ ചിത്രം ബഷീറിന്റെ പ്രേമ ലേഖനത്തിന്റെ ഓഡിയോ ലോഞ്ചില്‍ പങ്കെടുത്ത് സംസാരിക്കവെയാണ് ഷീല ഇക്കാര്യം പറയുന്നത്.

സെറ്റിലെ പുതുമുഖ താരങ്ങള്‍ തന്നോട് മിണ്ടുന്നില്ലെന്നും സെറ്റില്‍ ഒറ്റപ്പെടുന്നത് പോലെ തോന്നാറുണ്ടെന്നും ഇങ്ങനെയൊരു അവസ്ഥയില്‍ വീട്ടിലിരുന്നാല്‍ മതിയെന്ന് തോന്നി പോകുകയാണെന്നും നടി ഷീല പറയുന്നു.

മിണ്ടാത്തതിന്റെ കാരണം തിരക്കിയപ്പോള്‍ ബഹുമാനം കൊണ്ടാണെന്നാണ് താരങ്ങള്‍ മറുപടി പറയുന്നത്. അനീഷ് അന്‍വര്‍ സംവിധാനം ചെയ്യുന്ന ബഷീറിന്റെ പ്രേമ ലേഖനമാണ് ഷീലയുടെ പുതിയ ചിത്രം. ഫര്‍ഹാന്‍ ഫാസില്‍, സന അല്‍ത്താഫ് എന്നിവരാണ് ചിത്രത്തിലെ മറ്റ് കേന്ദ്ര കഥാപാത്രങ്ങളെ അവതരിപ്പിക്കുന്നത്.