രാജേഷ് ഖന്ന മികച്ച നടനല്ലെന്ന പരാമര്ശത്തില് ഖേദം പ്രകടിപ്പിച്ച് നടന് നസ്റുദ്ദീന് ഷാ
നടന് രാജേഷ് ഖന്ന മികച്ച നടനല്ലെന്ന പരാമര്ശത്തില് ഖേദം പ്രകടിപ്പിച്ച് നടന് നസ്റുദ്ദീന് ഷാ. തന്റെ പരാമര്ശത്തില് ഖേദം രേഖപ്പെടുത്തുന്നുവെന്നും ഒരിക്കലും രാജേഷ് ഖന്നയെ വിമര്ശിക്കാന് താന് ഉദ്ദേശിച്ചിട്ടില്ലെന്നും അദ്ദേഹം വ്യക്തമാക്കി.
എന്നാല് രാജേഷ് ഖന്നയുടെ മകളും നടിയുമായ ട്വിങ്ക്ള് ഖന്ന വീണ്ടും നസ്റുദ്ദീന്ഷായെ വിമര്ശിച്ച് ട്വിറ്ററിലൂടെ രംഗത്തെത്തി. ആനന്ദ്, അമര് പ്രേം, കതിപതംഗ് എന്നീ ചിത്രങ്ങളൊരുക്കിയ, സിനിമയെ സ്നേഹിച്ച ഒരാളെ കുറിച്ചാണ് നസ്റുദ്ദീന് ഷായുടെ പരാമര്ശമെന്ന് അവര് ട്വിറ്ററില് കുറിച്ചു. ഹിന്ദുസ്ഥാന് ടൈംസിന് നല്കിയ അഭിമുഖത്തിലാണ് ഷാ രാജേഷ് ഖന്നയെ വിമര്ശിച്ചത്. 70 കളില് ബോളിവുഡ് ബോക്സ് ഓഫീസ് അടക്കിഭരിച്ച രാജേഷ് ഖന്ന മികച്ച നടനല്ലെന്നായിരുന്നു ഷാ പറഞ്ഞത്.
'രാജേഷ് ഖന്ന പരിമിതികള് ഏറെയുള്ള നടനായിരുന്നു. ഞാന് കണ്ടതില് വെച്ച് ഉത്സാഹക്കുറവുള്ള വ്യക്തി കൂടിയായിരുന്നു അദ്ദേഹം. എന്നാല് അദ്ദേഹത്തിന്റെ അഭിരുചികളാണ് സിനിമാ വ്യവസായം ഭരിച്ചിരുന്നത്' എന്നായിരുന്നു നസ്റുദ്ദീന് ഷാ അഭിമുഖത്തില് പറഞ്ഞത്. ഈ പ്രസ്താവനകള് പിന്നീട് വിവാദമാകുകയായിരുന്നു. ട്വിങ്ക്ള് ഖന്ന, കരണ് ജോഹര് തുടങ്ങി പ്രമുഖര് പരാമര്ശത്തെ എതിര്ത്ത് സാമൂഹിക മാധ്യമങ്ങളിലൂടെ രംഗത്തെത്തി. തുടര്ന്നാണ് ഷാ ഖേദപ്രകടനം നടത്തിയത്.
https://www.facebook.com/Malayalivartha
