അവസാനം സിനിമാ സീരിയല്‍ നടിമാര്‍ തമ്മിലുള്ള തര്‍ക്കത്തിന് പരിഹാരമായി. താന്‍ ഒന്നും ഉദ്ദേശിച്ചിരുന്നില്ലെന്ന് സിനിമാ നടി ഗായത്രി സുരേഷിന്റെ അഭിപ്രായം വന്നു കഴിഞ്ഞു.

സംഭവം ഇങ്ങനെയാണ്... സീരിയലുകളെ പരിഹസിച്ചുകൊണ്ടുള്ള ഗായത്രി സുരേഷിന്റെ ഡബ്‌സ്മാഷ് വീഡിയോ വൈറലായിരുന്നു. ഇതിനെതിരെ സീരിയല്‍ താരവും പരസ്പരം സീരിയലിലെ ദീപ്തി ഐപിഎസ് എന്ന കഥാപാത്രത്തെ അവതരിപ്പിക്കുകയും ചെയ്യുന്ന ഗായത്രി അരുണ്‍ രംഗത്തെത്തിയിരുന്നു. ഒരേ മേഖലയില്‍ നിന്നുള്ളവര്‍ തന്നെ ഇത്തരത്തില്‍ പരിഹസിക്കുന്നതു കാണുമ്പോള്‍ വിഷമം തോന്നുന്നുവെന്നു ഗായത്രി പറഞ്ഞു. സീരിയലുകളിലും വളരെ ആത്മാര്‍ഥമായി കഷ്ട്ടപ്പെട്ടു തന്നെയാണ് അഭിനയിക്കുന്നത്. ഒരു പ്രൊഫഷനെയും കുറച്ചു കാണുക എന്നതൊരു ശരിയായ രീതിയായി തോന്നുന്നില്ല. ഓരോന്നിനും ഓരോ പാറ്റേണ്‍ ആണുള്ളതെന്നു മനസിലാക്കണം, സീരിയലും സിനിമയും നാടകവുമൊക്കെ അവതരിപ്പിക്കുന്നത് വ്യത്യസ്തമായിട്ടാണ്. അഭിനേതാക്കള്‍ തന്നെ അതു മനസിലാക്കുന്നില്ലെങ്കില്‍ പിന്നെ ഫെസ്ബുക്കില്‍ ചീത്തവിളിക്കുന്ന സാധാരണക്കാരെ കുറ്റം പറഞ്ഞിട്ടു കാര്യമുണ്ടോ എന്ന് ഗായത്രി അരുണ്‍ പറഞ്ഞു.

എന്നാല്‍, സീരിയല്‍ താരങ്ങളെയോ ഇന്റസ്ട്രിയെയോ കളിയാക്കണം എന്നു കരുതിയല്ല അങ്ങനെയൊരു വീഡിയോ എടുത്തതെന്ന് ഗായത്രി സുരേഷ് പ്രതികരിച്ചു. വാട്‌സ് ആപ്പില്‍ ആഭരണമഴ എന്നൊരു വീഡിയോ കിട്ടിയിരുന്നു. അതുകണ്ട് കണ്ട് അതിനോടു വലിയ താല്‍പര്യം തോന്നി. അങ്ങനെ ഇത്തരത്തില്‍ ഒരു വീഡിയോ ചെയ്തു നോക്കാമെന്നു തോന്നി. ഞങ്ങള്‍ക്കു തന്നെ കാണാനായി എടുത്ത വീഡിയോ ആയിരുന്നു അത്. വീഡിയോ എടുത്തപ്പോള്‍ കണ്ടപ്പോള്‍ പ്രതീക്ഷിച്ചതിലും നല്ലതായി തോന്നി. അങ്ങനെ അടുത്ത സുഹൃത്തുക്കള്‍ക്കു കാണാനായി ഇന്‍സ്റ്റഗ്രാമില്‍ പോസ്റ്റു ചെയ്തു. ഇന്‍സ്റ്റഗ്രാമില്‍ നിന്നും ആരോ ഷെയര്‍ ചെയ്തതുകൊണ്ടാണ് ആ വീഡിയോ വൈറലായത്. വെറും എന്റര്‍ടൈന്‍മെന്റ് മാത്രമാണ് ആ വീഡിയോയുടെ ഉദ്ദേശ്യമെന്ന് ഗായത്രി സുരേഷ് പറഞ്ഞു.

സീരിയലുകളിലേത് അതിഭാവുകത്വം നിറഞ്ഞ അഭിനയമാണെന്നും യാഥാര്‍ഥ്യം തൊട്ടു തുളുമ്പാത്തതാണെന്നും വ്യക്തമാക്കുന്നൊരു വീഡിയോ ആയിരുന്നു അത്. ഞൊടിയിടയിലാണ് സമൂഹമാധ്യമത്തില്‍ വീഡിയോ തരംഗമായത്.