ലോകം മുഴുവന്‍ ഇപ്പോള്‍ പോക്കിമോന്‍ ഗെയിമിന്റെ മാസ്മരിക ലോകത്താണ്. ഇന്ത്യയില്‍ ഈ ഗെയിം കളിച്ചത് വളരെ കുറച്ചാള്‍ക്കാരാണ്. വില കൂടിയ ഐ ഫോണിലാണ് ഈ ഗെയിം കളിക്കാന്‍ ഏറെ സുഖം. ആന്‍ഡ്രോയിഡ് വേഴ്‌സണ്‍ വന്നു തുടങ്ങിയിട്ടേയുള്ളൂ. എന്നാല്‍ എല്ലാവരുടേയും സംസാരം അടുത്തറിയാത്ത പോക്കിമോനെയാണ്.

പാവങ്ങളുടെ വിഷമം കണ്ട് സാക്ഷാല്‍ മോഹന്‍ലാല്‍ ഗെയിമുമായെത്തുകയാണ്. മലയാളത്തില്‍ ആദ്യമായാണ് ഒരു ചലച്ചിത്രം അടിസ്ഥാനമാക്കി ഗെയിം തയാറാവുന്നത്. പുലിമുരുകന്‍ ചിത്രത്തെ ആധാരമാക്കിയാണ് കിടിലന്‍ ത്രീഡി ഗെയിമൊരുങ്ങുന്നത്. കാടിന്റെ ചൂടും ചൂരും അറിഞ്ഞ പുലിമുരുകനോടൊപ്പം കളിച്ചു നടക്കാന്‍ ഒരവസരം കൂടിയാണിത്.

ചിത്രത്തിന്റെ പോസ്റ്ററും ടീസറും ഏറെ ശ്രദ്ധിക്കപ്പെട്ടിരുന്നു. ചിത്രം ഒക്ടോബര്‍ 7ന് തീയറ്ററുകളിലെത്തും. ചിത്രത്തിന്റെ സംവിധായകന്‍ വൈശാഖ് ആണ് ഇക്കാര്യം വെളിപ്പെടുത്തിയത്. കടുവയും മനുഷ്യനും തമ്മിലുള്ള സൗഹൃദത്തിന്റെയും ശത്രുതയുടെയും പോരാട്ടത്തിന്റെയും കഥ പറയുന്ന ചിത്രം മലയാളത്തിലെ ഏറ്റവും മുതല്‍മുടക്കുളള സിനിമ കൂടിയാണ്. മൂവായിരത്തിലേറെ സ്‌ക്രീനുകളിലായി ചിത്രം പ്രദര്‍ശിപ്പിക്കുമെന്ന് കരുതുന്നു.
പ്രമുഖ ആക്ഷന്‍ കൊറിയോഗ്രാഫര്‍ പീറ്റര്‍ ഹെയിന്റെ നേതൃത്വത്തില്‍ ചിട്ടപ്പെടുത്തിയ സാഹസിക സംഘട്ടന രംഗങ്ങളാണ് സിനിമയുടെ ഹൈലൈറ്റ്. ബാങ്കോക്കിലും കേരളത്തിലുമായാണ് സിനിമ ചിത്രീകരിച്ചത്. ജഗപതി ബാബു, മകരന്ദ് ദേശ്പാണ്ഡേ, ലാല്‍, സുരാജ് വെഞ്ഞാറമ്മൂട്,ബാല എന്നിവരും ചിത്രത്തിലുണ്ട്. കമാലിനി മുഖര്‍ജിയാണ് നായിക.