ഗ്ലാമറസാകുന്നതില്‍ ശ്രുതിഹാസന് യാതൊരു മടിയുമില്ലെന്ന് പറയുന്നതില്‍ കഴമ്പില്ലെന്ന് താരം. ഒരു തമിഴ് പത്രത്തിന് നല്‍കിയ അഭിമുഖത്തിലാണ് ഇക്കാര്യം വ്യക്തമാക്കിയത്. ഗ്ലാമര്‍ എന്നാല്‍ എന്താണെന്ന് ഇതുവരെ എനിക്ക് മനസിലായിട്ടില്ല. ഒരു പക്ഷെ, ഗാനരംഗങ്ങളില്‍ ധരിക്കുന്ന വസ്ത്രങ്ങള്‍ കണ്ടിട്ടായിരിക്കാം പലരും ഇങ്ങിനെ പറയുന്നതെന്നും താരം പറഞ്ഞു.

അഭിനയിക്കുന്ന സീനുകള്‍ക്കും കഥാപാത്രങ്ങള്‍ക്കും എന്ത് ആവശ്യമുണ്ടോ അതിനപ്പുറത്തേക്ക് താന്‍ പോകാറില്ലെന്നും ശരീരത്തെ തെറ്റായി നോക്കി കാണാറില്ലെന്നും പ്രദര്‍ശിപ്പിച്ചിട്ടില്ലെന്നും താരം വ്യക്തമാക്കി. പിന്നെ കാണികളുടെ കാഴ്ചപ്പാടിനെ കുറിച്ച് തനിക്കറിയില്ലെന്നും പറഞ്ഞു.  

വാണിജ്യവിജയം ഏത് അഭിനേതാവിന്റെയും കരിയറിന് അത്യാവശ്യമാണ്. തനിക്ക് അത് വളരെ പെട്ടെന്ന് കിട്ടിയതില്‍ സന്തോഷമുണ്ടെന്നും താരം പറയുന്നു. ഓഫ് ബീറ്റ് സിനിമകള്‍ക്ക് താന്‍ എതിരല്ലെന്നും അത്തരം സിനിമകളും വിജയിക്കണമെന്നും ശ്രുതി പറഞ്ഞു. എന്നാല്‍ പലപ്പോഴും അത് നടക്കുന്നില്ലെന്നും താരം പറഞ്ഞു. ഇതുവരെ തന്നെ സ്വാധീനിക്കുകയും ആകര്‍ഷിക്കുകയും ചെയ്യുന്ന ഓഫ് ബീറ്റ് സിനിമകള്‍ തേടി വന്നിട്ടില്ലെന്നും ശ്രുതി പറഞ്ഞു. പാട്ടുകളില്‍ മാത്രം മേനി പ്രദര്‍ശനം നടത്തുന്നത് തന്റെ നിലവാരം കുറയ്ക്കില്ലെന്നും ചോദ്യത്തിന് മറുപടിയായി ശ്രുതി പറഞ്ഞു. സിനിമ തനിക്ക് സരസ്വതിയാണ്, ഒരു ഗാനരംഗത്ത് അഭിനയിക്കുന്നതും നായികയായി അഭിനയിക്കുന്നതും ഒരു പോലെയാണ്.  

പണ്ട് മുതലേ എല്ലാ നൃത്തരുപങ്ങളും തനിക്ക് ഇഷ്ടമാണെന്നും താരം പറയുന്നു. സിനിമയില്‍ നൃത്തം ചെയ്യുക അത്ര എളുപ്പമുള്ള കാര്യമല്ല. ചെയ്യുന്നത് പ്രേക്ഷകര്‍ക്ക് ഇഷ്ടപ്പെടുന്ന രീതിയാകണം. അവയില്‍ ലാളിത്യവും ചടുലതയും സ്‌റ്റൈലും വേണം. എന്റെ അമ്മായിയും അച്ഛനുമൊക്കെ ഡാന്‍സേഴ്‌സാണ്. അവരില്‍ നിന്നാണ് അതിന്റെ ആവേശം ഉള്‍ക്കൊണ്ടതെന്നും താരം പറയുന്നു. അതുകൊണ്ട് നൃത്തരംഘത്ത് അഭിനയിക്കുന്നതിനെ ഐറ്റം ഡാന്‍സ് എന്ന് പറഞ്ഞ് കളിയാക്കണ്ട. അതിന് വേണ്ടിയുള്ള അധ്വാനത്തെ ബഹുമാനിച്ചാല്‍ മതി.