ഹാക്കര്മാര് രജനിയുടെ ട്വിറ്റര് അക്കൗണ്ടും ഹാക്ക് ചെയ്തു
ഹാക്കിങ് ട്രെന്റായി മാറിയിരിക്കുന്ന ഇക്കാലത്ത് സൂപ്പര്സ്റ്റാര് രജനീകാന്തിന്റെ ട്വിറ്റര് അക്കൗണ്ടിനും രക്ഷയില്ല, താരം പോലും അറിയാതെ അദ്ദേഹത്തിന്റെ ഒഫീഷ്യല് അക്കൗണ്ട് ഹാക്ക് ചെയ്യുകയും പ്രമുഖ സെലിബ്രിറ്റികളെ ഫോളോ ചെയ്യാന് തുടങ്ങുകയും ചെയ്തു.
ഇന്നലെയായിരുന്നു സംഭവം. അപ്രതീക്ഷിതമായാണ് രജനി പ്രമുഖ നടന്മാരായ കമല് ഹാസന്, ആമിര് ഖാന്, ഷാരൂഖ് ഖാന്, രജനിയുടെ അടുത്തിടെ ഇറങ്ങിയ കബാലി സിനിമയുടെ സംവിധായകന് രഞ്ജിത്, നിര്മാതാവ് കലൈപുലി താണു, പിആര്ഒ റിയാസ് അഹ്മെദ് തുടങ്ങിയവരെ ഫോളോ ചെയ്യാന് ആരംഭിച്ചത്, എന്നാല് ട്വിറ്ററില് താരത്തിനെ ഫോളോ ചെയ്യുന്നവര് ഇക്കാര്യം അത്ര ശ്രദ്ധിച്ചിതുമില്ല. പക്ഷെ പിന്നീട് 'Rajanikanth#HitToKill' എന്ന സന്ദേശം ട്വിറ്ററില് പ്രത്യക്ഷപ്പെട്ടതോടെ രജനിയുടെ ട്വീറ്റിനായി കാത്തിരിക്കുന്ന ആരാധകര് കൂട്ടത്തോടെ ട്വീറ്റ് റി ട്വീറ്റ് ചെയ്യുകയും സംഭവം വൈറലായി മാറുകയുമായിരുന്നു. സംഭവം സോഷ്യല്മീഡിയയില് ഒരു ചര്ച്ച തന്നെയായി മാറി.ആരാധകര് എന്താണ് ട്വീറ്റിന്റെ അര്ത്ഥമെന്നന്വേഷിച്ച് ഇറങ്ങിയതോടെയാണ് സംഭവം രാഷ്ട്രീയ വിവാദത്തിന് വരെ വഴിതെളിക്കാന് ആരംഭിച്ചത്. അങ്ങനെ സംഭവം കത്തിക്കയറികൊണ്ടിരിക്കെയാണ് രജനിയുടെ മകളും സംവിധായകയുമായ ഐശ്വര്യ ധനൂഷ് അപ്പായുടെ ട്വിറ്റര് അക്കൗണ്ട് ഹാക്ക് ചെയ്യപ്പെട്ടുവെന്നും എന്നാല് മണിക്കൂറുകള്ക്കകം തിരിച്ചു പിടിച്ചുവെന്നും ട്വീറ്റ് ചെയ്തത്. തുടര്ന്നാണ് ട്വിറ്ററില് വന് തരംഗമായ ട്വീറ്റും അദ്ദേഹം പലരേയും ഫോളോ ചെയ്യാന് ആരംഭിച്ചതുമെല്ലാം ഹാക്കറുടെ കളിയായിരുന്നുവെന്ന് വ്യക്തമായത്.
ഇതോടെ വിവാദങ്ങള്ക്കെല്ലാം അവസാനമായി. എങ്കിലും ചര്ച്ചകള് പുരോഗമിക്കുകയാണ്, രജനീകാന്തിന്റെ അക്കൗണ്ട് പോലും ഹാക്ക് ചെയ്യപ്പെട്ടുവല്ലോ എന്നാണ് ആരാധകര് അതിശയിക്കുന്നത്. കുറച്ചു നാളുകളായി പ്രമുഖരുടെ ട്വിറ്റര് അക്കൗണ്ടുകള് ഹാക്ക് ചെയ്യുന്നത് ഒരു ട്രെന്റായി മാറിയിരിക്കുകയാണ്. ഏതാനും നാളുകള്ക്കു മുമ്പാണ് ഫേസ്ബുക്ക് മുതലാളി സുക്കര്ബര്ഗിന്റെയും ട്വിറ്റര് സിഇഒയുടെ തന്നെ അക്കൗണ്ടും ഹാക്ക് ചെയ്യപ്പെട്ടത്.
https://www.facebook.com/Malayalivartha