അമലാ പോളിന്റെ വിവാഹമോചനം സിനിമാ ലോകത്ത് വലിയ കോളിളക്കം സൃഷ്ടിച്ചിരുന്നു. സത്യസന്ധതയും വിശ്വാസ്യതയുമാണ് വിവാഹബന്ധത്തിന്റെ അടിത്തറയെന്നും അത് തകര്‍ന്നാല്‍ ബന്ധം അര്‍ഥശൂന്യമാകുമെന്നു പ്രതികരണവുമായ് വിജയ് രംഗത്തെത്തിയിരുന്നു.
വിജയിയുടെ വീട്ടുകാര്‍ അമലയെ മാനസികമായി പീഡിപ്പിച്ചിരുന്നുവെന്ന് ചൂണ്ടിക്കാട്ടി അമലയുടെ ഒരു കുടുംബസുഹൃത്തു രംഗത്തെത്തിയല്ലാതെ ഇക്കാര്യത്തില്‍ അമലയുടെ ഭാഗത്തു നിന്ന് യാതൊരു പ്രതികരണവും ഉണ്ടായതുമില്ല. എന്നാല്‍ കല്യാണ ശേഷം സിനിമയില്‍ തുടര്‍ന്നതാണു വിവാഹബന്ധം തകരാറിലാക്കിയതെന്നും തന്റെ വീട്ടുകാര്‍ക്ക് അതിഷ്ടമില്ലായിരുന്നുവെന്നുമുള്ള അമലയുടെ വാദത്തില്‍ ഒട്ടും വാസ്തവമില്ലെന്നും വിജയ് പത്രക്കുറിപ്പില്‍ വ്യക്തമാക്കിയതോടെ ഈ വാദവും തള്ളി.
ധനുഷ് ചിത്രമായ വട ചൈന്നൈയില്‍ അമല കരാര്‍ ഒപ്പിട്ടതാണ് ഇരുവര്‍ക്കുമിടയിലുള്ള പ്രശ്‌നങ്ങള്‍ കൂടുതല്‍ വഷളാക്കിയതെന്ന് ഇരുവരോടും അടുത്തവൃത്തങ്ങള്‍ വ്യക്തമാക്കുന്നു.
ഈ ചിത്രത്തിലേക്ക് ആദ്യം നിശ്ചയിച്ചിരുന്നത് നടി സമാന്തയെ ആയിരുന്നു. എന്നാല്‍ മൂന്നു ഭാഗങ്ങളിലായി സംവിധാനം ചെയ്യുന്ന ഈ സിനിമയ്ക്കായി മൂന്നു വര്‍ഷമെങ്കിലും ഡേറ്റ് മാറ്റിവക്കണമായിരുന്നു. ഇത് സാധിക്കാത്തതിനെ തുടര്‍ന്ന് സമാന്ത പിന്മാറി.
ഇതെ തുടര്‍ന്നാണ് ധനുഷ് അമലയെ സമീപിച്ചത്. ഉടന്‍ തന്നെ അമല കരാര്‍ ഒപ്പിടുകയായിരുന്നു. എന്നാല്‍ ഒരു സിനിമയ്ക്ക് വേണ്ടി തന്റെ മൂന്നുവര്‍ഷം മാറ്റിവച്ചത് വിജയ്‌യ്ക്കും കുടുംബത്തിനും ഇഷ്ടമായില്ല.
ഒരു കുഞ്ഞ് വേണമെന്നും കുടുംബജീവിതത്തില്‍ പുതിയൊരു അദ്ധ്യായം തുടങ്ങണമെന്നുമായിരുന്നു വിജയ്‌യുടെ ആഗ്രഹം. അതിനിടെയാണ് മൂന്നുവര്‍ഷത്തേക്ക് മറ്റെല്ലാം മാറ്റിവച്ച് ഈ സിനിമയില്‍ കരാര്‍ ഒപ്പിട്ടത്. ഇതെ തുടര്‍ന്നാണ് വിജയും അമലയും തമ്മിലുള്ള ബന്ധം തകര്‍ച്ചയിലെത്തിയത് എന്നാണ് റിപ്പോര്‍ട്ടുകള്‍.