പുരുഷന്മാരിൽ നിന്നും സ്ത്രീവിരുദ്ധ സമീപനമോ അനുഭവമോ തനിക്ക് നേരിടേണ്ടി വന്നിട്ടില്ലെന്ന് നടി മഞ്ജുവാര്യർ. സൂര്യഫെസ്റ്റിവലിലെ പ്രഭാഷണമേളയിൽ സംസാരിക്കുകയായിരുന്നു മഞ്ജു.

'പുരുഷന്മാരിൽ നിന്നും സ്ത്രീവിരുദ്ധ സമീപനമോ അനുഭവമോ എനിക്ക് നേരിടേണ്ടി വന്നിട്ടില്ല. ബഹുമാനവും സുരക്ഷിതത്വമാണ് എനിക്ക് കിട്ടിയിട്ടുള്ളത്. എന്നാൽ ചിലർക്ക് അത്തരത്തിലുള്ള അനുഭവം ഉള്ളതായി കേട്ടിട്ടുണ്ട്. ഓഖി ദുരിതബാധിതരെ സന്ദർശിക്കാൻ പോയത് പ്രശസ്തിക്ക് വേണ്ടിയല്ല, മനസിന്റെ സംതൃപ്തിക്കു വേണ്ടിയാണ്.

സിനിമയിലേക്കുള്ള രണ്ടാം വരവിലാണ് കൂടുതൽ സന്തോഷവും തൃപ്തിയും ലഭിക്കുന്നത്. വളരെ കഴിവുള്ള സംവിധായകർ എനിക്കു വേണ്ടി കഥാപാത്രങ്ങളെ സൃഷ്ടിക്കുന്നു. ഇപ്പോൾ ഞാൻ ആസ്വദിച്ച് അഭിനയിക്കുന്നു. കൂടുതൽ ഉത്തരവാദിത്വം തോന്നുന്നുണ്ട്. ഞാൻ അഭിപ്രായം പറയാറുണ്ട്. എന്നോട് അഭിപ്രായം ചോദിക്കാറുണ്ട്. മുമ്പ് അങ്ങനെയായിരുന്നില്ല. കലോത്സവത്തിലെ വിജയി എന്ന നിലയിലാണ് സിനിമയിലേക്ക് എൻട്രി കിട്ടുന്നത്. എനിക്ക് കിട്ടിയ കഥാപാത്രങ്ങളെ മികച്ച രീതിയിൽ അവതരിപ്പിക്കാൻ സാധിച്ചത് സംവിധായകരുടെ മിടുക്ക് കൊണ്ടാണ്.

ലോഹിതദാസ് സാർ അഭിനയത്തെ കുറിച്ച് പറഞ്ഞു തന്ന പാഠങ്ങൾ ഒരിക്കലും മറക്കില്ല. നാലുവയസു മുതൽ ഞാൻ നൃത്തം പഠിച്ചു. പഠിക്കുന്ന കാലത്തു തന്നെ ആഴ്ചയിൽ രണ്ടു സിനിമ വീതം കാണുമായിരുന്നു. ഒരു തീരുമാനമെടുത്ത് പെട്ടെന്ന് കുറച്ചു നാൾ സിനിമയിൽ നിന്നും മാറി നിന്നപ്പോഴും സിനിമകൾ ആസ്വദിക്കുന്നതായിരുന്നു എന്റെ പ്രധാന വിനോദം'- മഞ്ജു പറഞ്ഞു.