കസബ വിഷയത്തിൽ നടി പാര്‍വതി കടുത്ത സൈബർ ആക്രമണത്തിനു ഇരയായിരുന്നു. പലരും പാർവതിയുടെ പ്രസ്താവനയെ പിന്തുണച്ചും രംഗത്തെത്തിയിരുന്നു. ഏറ്റവും ഒടുവിലായി കസബ വിഷയത്തെക്കുറിച്ച് സംസാരിച്ചിരിക്കുകയാണ് നടി നൈലാ ഉഷ.

കസബ സിനിമയിലെ സ്ത്രീവിരുദ്ധ സംഭാഷണം വേണ്ടിയിരുന്നില്ലെന്നാണ് നൈലാ ഉഷ പറയുന്നത്. റെഡ് എഫ് എമ്മില്‍ ആര്‍ ജെ മൈക്ക് അവതരിപ്പിക്കുന്ന പരിപാടിയില്‍ പങ്കെടുത്ത് സംസാരിക്കുമ്പോള്‍ അവസാനമായി ഒരു സ്ത്രീവിരുദ്ധ സംഭാഷണം കേട്ടത് എപ്പോഴാണെന്ന അവതാരകന്റെ ചോദ്യത്തിന് മറുപടി പറയവെയാണ് നൈലാ കസബ വിഷയത്തെക്കുറിച്ച് സംസാരിച്ചത്.

അവസാനമായി ഒരു സ്ത്രീവിരുദ്ധ സംഭാഷണം കേട്ടത് എപ്പോഴാണ് എന്ന ചോദ്യത്തിന്, 'കസബയിലെ ഈ പ്രശ്‌നം വന്നപ്പോള്‍ ആ ലിങ്ക് തുറന്ന് നോക്കിയപ്പോള്‍ ഡയലോഗ് കേട്ടിരുന്നു. അത് കേട്ടപ്പോള്‍ അത് വേണ്ടിയിരുന്നില്ലെന്ന് തോന്നി. അത് ആര് പറഞ്ഞാലും സ്ത്രീ പറഞ്ഞാലും പുരുഷന്‍ പറഞ്ഞാലും അത് കേള്‍ക്കാന്‍ ഒരു സുഖമുണ്ടായിരുന്നില്ല. ഞാൻ ആ സിനിമ കണ്ടിട്ടില്ല. ആ സിനിമയില്‍ അത്തരത്തിലൊരു സംഭാഷണം ഉള്ളതുകൊണ്ട് സിനിമ മോശമാണെന്ന് ഞാൻ പറയില്ല.

സിനിമ കണ്ടിട്ട് അത് ഇഷ്ടമായില്ലെങ്കില്‍ കുറഞ്ഞ പോയിന്റെ നൽകൂ. സിനിമയിലെ സ്ത്രീകൂട്ടായ്മയായ വിമണ്‍ ഇന്‍ സിനിമാ കളക്ടീവിനെ കുറിച്ച് നല്ല അഭിപ്രായമാണ്. അവരുടെ പ്രവര്‍ത്തനങ്ങള്‍ നല്ലതാണ്'- നൈലാ ഉഷ പറഞ്ഞു.