മോഹന്‍ലാലിനെ ഒടിയന്‍ എന്ന കഥാപാത്രത്തിന്റെ ശരീരഘടനയാക്കി മാറ്റാനായി സഹായിച്ചവര്‍ നിരവധി പേരുണ്ട്. ഫ്രാന്‍സില്‍ നിന്നുള്ള സംഘം മുതല്‍ നമ്മുടെ ആയുര്‍വേദം വരെ സഹായിച്ചുവെന്നാണ് പുറത്തു വരുന്ന റിപ്പോര്‍ട്ട്. എന്നാല്‍ ഇക്കാര്യത്തില്‍ മകന്‍ പ്രണവും മോഹന്‍ലാലിനെ സഹായിച്ചു എന്ന തരത്തിലുള്ള ചിത്രങ്ങളാണ് പുറത്തു വരുന്നത്. മോഹന്‍ലാലിനേക്കാള്‍ ശരീരം നന്നായി സൂക്ഷിക്കുന്ന വ്യക്തിയാണ് പ്രണവ് മോഹന്‍ലാല്‍. ഇക്കാര്യത്തില്‍ ചില കാര്യങ്ങള്‍ അച്ഛനെ ഉപദേശിക്കുകയും ചെയ്തു.
ശരീര ഭാരം കുറക്കാനായി ദിവസവും മണിക്കൂറുകളാണ് അദേഹം വര്‍ക്ക്ഔട്ട് ചെയ്യുന്നത്. ഇപ്പോള്‍ മോഹന്‍ലാലും മകന്‍ പ്രണവ് മോഹന്‍ലാലും ഒന്നിച്ച് വ്യായാമം ചെയ്യുന്ന ചിത്രമാണ് സമൂഹമാധ്യമങ്ങളില്‍ വൈറലായിരിക്കുന്നത്. മോഹന്‍ലാല്‍ തന്നെയാണ് ഈ ചിത്രം ഫേസ്ബുക്കിലൂടെ പുറത്തുവിട്ടത്. കഴിഞ്ഞദിവസം സുഹൃത്തുക്കള്‍ക്കൊപ്പം മോഹന്‍ലാല്‍ വ്യായാമം ചെയ്യുന്ന ചിത്രവുമുണ്ടായിരുന്നു.

ഒടിയനില്‍ യുവാവായ ഒടിയന്‍ മാണിക്യന്‍ എന്ന കഥാപാത്രത്തിനാണ് മോഹന്‍ലാല്‍ ശരീരഭാരം കുറച്ച് രൂപമാറ്റം നടത്തിയത്. പട്ടിണി കിടന്നാണെങ്കിലും ഒടിയനിലെ മാണിക്യന്‍ എന്ന കഥാപാത്രത്തിന്റെ പൂര്‍ണതയ്ക്കായി മെലിയുമെന്ന് മോഹന്‍ലാല്‍ ആരാധകരോട് പറഞ്ഞിരുന്നു.

ആന്റണി പെരുമ്പാവൂര്‍ നിര്‍മ്മിച്ച് പരസ്യ സംവിധായകന്‍ ശ്രീകുമാര്‍ മേനോന്‍ സംവിധാനം ചെയ്യുന്ന ഒടിയന്റെ തിരക്കഥ ഹരികൃഷ്ണന്‍ എഴുതുന്നു. ഒടിയന്‍ മാണിക്യന്‍ എന്ന കഥാപാത്രമായി മോഹന്‍ലാല്‍ എത്തുമ്പോള്‍ പ്രകാശ് രാജ്, മഞ്ജു വാര്യര്‍ എന്നിവര്‍ മറ്റു മുഖ്യ വേഷങ്ങളില്‍ എത്തുന്നു.