ഒടിയൻ ചിത്രത്തിനുവേണ്ടി മോഹൻലാലിൻറെ രൂപമാറ്റം ആരാധകരെ വിസ്മയിപ്പിച്ചിരുന്നു. ഒടിയൻ ലുക്ക് സമൂഹമാധ്യമങ്ങളിലും ഏറെ ചർച്ച ചെയ്യപ്പെട്ടതാണ്. ലാലേട്ടന്റെ രൂപമാറ്റം കണ്ട് സ്റ്റൈൽ മന്നൻ രജനികാന്തും ലാലിനെ പ്രശംസിച്ച് രംഗത്തെത്തിയിരുന്നു. ഇന്ത്യന്‍ സിനിമയിലെ അദ്ഭുതങ്ങളിലൊന്നാണ് മലയാളത്തിന്റെ സൂപ്പര്‍ താരം മോഹന്‍ലാല്‍ എന്നാണ് താരസുന്ദരി അനുഷ്ക ഷെട്ടി പറയുന്നത്.

അനുഷ്ക ഷെട്ടിയുടെ പുതിയ ത്രില്ലര്‍ ചിത്രമായ ഭാഗമതിയുടെ ട്രെയിലർ പുറത്തിറങ്ങിയിരിക്കുകയാണ്. ഈ ചിത്രത്തിനായി അനുഷ്ക ഭാരം കുറച്ചിരുന്നു. ഒരു തെലുങ്ക് ചാനലിന് നല്‍കിയ അഭിമുഖത്തിൽ ഭാഗമതിയ്ക്ക് വേണ്ടി സൈസ് സീറോ ആയതിനെ കുറിച്ച് ചോദിച്ചപ്പോൾ ഒടിയന് വേണ്ടി മോഹന്‍ലാല്‍ വരുത്തിയ രൂപ മാറ്റം എല്ലാവര്‍ക്കും മാതൃകയാണെന്നാണ് അനുഷ്‌ക പറഞ്ഞത്.

'എന്റെ പ്രയത്‌നങ്ങള്‍ക്ക് ഒരുപാട് പേര്‍ പ്രചോദനമായിട്ടുണ്ട്. ഹിന്ദിയില്‍ ആമിര്‍ ഖാന്‍, തെലുങ്കില്‍ പ്രഭാസ്, തമിഴില്‍ വിക്രം, മലയാളത്തില്‍ മോഹന്‍ലാല്‍ എന്നിവരാണ്. മോഹന്‍ലാല്‍ നടത്തിയ മേക്ക് ഓവര്‍ പറയാതിരിക്കാന്‍ കഴിയില്ല. അദ്ദേഹത്തിന് 56 കഴിഞ്ഞെന്നാണ് എന്റെ അറിവ്. ഈ പ്രായത്തിലും ഒരു യുവനടന്‍ മാത്രം ചെയ്യാന്‍ സാധ്യതയുള്ള എല്ലാ റിസ്‌കും ചെയ്ത് അദ്ദേഹം വിസ്മയിപ്പിക്കുകയും പ്രചോദിപ്പിക്കുകയും ചെയ്യുന്നു.'

മോഹൻലാലിൻറെ രൂപമാറ്റം താന്‍ കണ്ടിട്ടില്ല എന്ന് അവതാരിക പറഞ്ഞപ്പോള്‍ അത് തീർച്ചയായും കാണണം എന്നായിരുന്നു അനുഷ്‌ക അവതാരകയോട് പറഞ്ഞത്. ഒടിയന്‍ സിനിമ ഇറങ്ങാന്‍ വേണ്ടി കാത്തിരിക്കുകയാണ് താനെന്നും അനുഷ്‌ക പറഞ്ഞു.