വി.എം. സുധീരന്‍ കോണ്‍ഗ്രസ്‌ തലപ്പത്തേക്ക്‌?
വി.എം. സുധീരന്‍ കോണ്‍ഗ്രസിന്റെ തലപ്പത്തേക്കെന്ന്‌ സൂചന. പ്രദേശ്‌ കോണ്‍ഗ്രസ്‌ കമ്മിറ്റിയുടെ അധ്യക്ഷനല്ലെങ്കില്‍ വളരെ പ്രധാനപ്പെട്ട സ്ഥാനമാണ്‌ സുധീരനു വേണ്ടി രാഹുല്‍ഗാന്ധി ആലോചിക്കുന്നത്‌. സുധീരനെ രാഹുല്‍ ഗാന്ധി വീണ്ടും ഡല്‍ഹിക്ക്‌ വിളിപ്പിച്ചു. സുധീരന്‍ ഡല്‍ഹിക്ക്‌ പുറപ്പെട്ടു കഴിഞ്ഞു.
കേരളത്തിലെ രാഷ്‌ട്രീയത്തിന്റെ യഥാര്‍ത്ഥ ചിത്രം അറിയണമെങ്കില്‍ സുധീരനെ ആശ്രയിക്കണമെന്ന അവസ്ഥയിലാണ്‌ രാഹുല്‍ഗാന്ധി. നേരത്തെ ഒരുവട്ടം രാഹുല്‍ ഗാന്ധി സുധീരനുമായി ഒരു മണിക്കൂര്‍ ചര്‍ച്ച നടത്തിയിരുന്നു. ചര്‍ച്ചയില്‍ ഉരുത്തിരിഞ്ഞ ചില കാര്യങ്ങളെ കുറിച്ച്‌ കൂടുതല്‍ വിശദാംശങ്ങള്‍ അറിയുന്നതിനാണ്‌ സുധീരനെ ഒരിക്കല്‍ കൂടി ഡല്‍ഹിക്ക്‌ ക്ഷണിച്ചിരിക്കുന്നത്‌.
കെ.പി.എസ്.സി പ്രസിഡന്റ്‌ രമേശ്‌ ചെന്നിത്തലക്ക്‌ മറ്റേതെങ്കിലും ലാവണമൊരുക്കണമെന്ന്‌ രാഹുലിന്റെ മനസ്സിലുണ്ട്‌. രമേശിന്റെ അധ്യക്ഷ പദവി നല്ലതാണെങ്കിലും പാര്‍ട്ടിക്ക്‌ കൂടുതല്‍ ഊര്‍ജ്ജം പകരാന്‍ ഒരു പുതിയ മുഖം വേണമെന്ന ആവശ്യക്കാരനാണ്‌ രാഹുല്‍ ഗാന്ധി. പാര്‍ലമെന്റ്‌ തെരഞ്ഞെടുപ്പില്‍ മെച്ചപ്പെട്ട വിജയം കേരളത്തില്‍ നിന്നും ലഭിക്കണമെങ്കില്‍ രമേശിനു പകരം ഒരു നേതാവിനെ കൂടിയേ തീരൂ എന്നും രാഹുല്‍ ചിന്തിക്കുന്നു. രമേശും ഉമ്മന്‍ചാണ്ടിയും തമ്മിലുള്ള ബന്ധം നാള്‍ക്കുനാള്‍ വഷളാകുന്നതും രാഹുല്‍ ഗാന്ധിയെ കുഴയ്‌ക്കുന്നുണ്ട്‌. സംസ്ഥാനത്തെ വിലക്കയറ്റം പുതിയ വിവാദങ്ങള്‍ക്ക്‌ വഴി വച്ചിട്ടുണ്ട്‌. വിലക്കയറ്റം പിടിച്ചു നിര്‍ത്താന്‍ സര്‍ക്കാര്‍ ഒന്നും ചെയ്യുന്നില്ലെന്ന പക്ഷക്കാരനാണ്‌ ചെന്നിത്തല.
പരസ്‌പരം കൊമ്പുകോര്‍ക്കുന്ന മുഖ്യമന്ത്രിയെയും കെ.പി.സി.സി അധ്യക്ഷനേയും ഒരുമിപ്പിക്കാന്‍ കഴിയില്ലെന്നും രാഹുല്‍ വിശ്വസിക്കുന്നു. ഇരുവര്‍ക്കും പകരക്കാരെ അന്വേഷിക്കുകയാണ്‌ രാഹുല്‍ഗാന്ധി. ഘടകകക്ഷികളുടെ അഭിപ്രായവും കണക്കിലെടുക്കും.
https://www.facebook.com/Malayalivartha
