തൊട്ടിലില്‍ കിടന്ന് ഉറങ്ങുന്ന കുട്ടിയുടെ മുഖത്ത് വളര്‍ത്തുപൂച്ച കയറിയിരുന്ന് 9 മാസം പ്രായമായ കുഞ്ഞിന് ദാരുണാന്ത്യം. കുഞ്ഞിനെ ഉറക്കി കെടുത്തിയ ശേഷം അടുക്കളയില്‍ ജോലി ചെയ്യവെയാണ് ഉറങ്ങി കിടന്ന കുഞ്ഞിന്റെ മുഖത്ത് പൂച്ച കയറിയിരുന്നത്. ഉക്രൈനിലാണ് അതിദാരുണമായ സംഭവം നടന്നത്. വീട്ടിൽ വളർത്തിയ രണ്ട് വളർത്തുപൂച്ചകളിൽ ഒന്നാണ് അലക്‌സാണ്ട്ര എന്ന കുഞ്ഞിന്റെ ജീവനെടുത്തത്.

ഉറങ്ങിക്കിടക്കുന്ന കുട്ടിയുടെ മുഖത്ത് കയറി കിടന്ന പൂച്ചയും ഉറങ്ങിപോയതോടെയാണ് കുഞ്ഞിന് ജീവൻ നഷ്ടമായത്. വീട്ടുജോലികൾ കഴിഞ്ഞ് കുഞ്ഞിനെ നോക്കാനെത്തിയപ്പോഴായിരുന്നു പൂച്ചയുടെ ശരീരത്തിനു താഴെ അനക്കമില്ലാതെ കിടന്ന കുരുന്നിനെ കണ്ടത്. കുട്ടിയെ ഉണര്‍ത്താന്‍ ശ്രമം നടത്തിയെങ്കിലും കുഞ്ഞിന് ശ്വാസമില്ലെന്ന് മനസിലായി. ഉടനെ ഇവര്‍ പാരാമെഡിക്‌സില്‍ വിളിച്ച്‌ വിവരമറിയിച്ചു. അവരെത്തി 40 മിനിറ്റുകളോളം രക്ഷാപ്രവര്‍ത്തനം നടത്തിയെങ്കിലും കുഞ്ഞ് മരണപ്പെട്ടിരുന്നു.കുട്ടികൾ ഉള്ള വീട്ടിൽ വളർത്തു മൃഗങ്ങളെ വളർത്താമോ ? പല മാതാപിതാക്കളും സ്ഥിരം ചോദിക്കുന്ന ഒരു ചോദ്യമാണത്. വീട്ടിൽ ഒരു കുഞ്ഞു ജനിക്കുമ്പോഴേക്കും ഉണ്ടായിരുന്ന അരുമ മൃഗങ്ങളെ വിൽക്കുന്നവരുടെ എണ്ണം വളരെ കൂടുതലാണ്. പലപ്പോഴും നമ്മുടെ അശ്രദ്ധ തന്നെയാണ് ഇത്തരം ദാരുണ സംഭവങ്ങൾക്ക് പിന്നിലെ വില്ലനായി മാറുന്നത്. വളർത്തുമൃഗങ്ങളിൽ നിന്നും രോഗങ്ങൾ ഉണ്ടാകുമോ? പട്ടി, പൂച്ച തുടങ്ങിയവയുടെ രോമങ്ങൾ കുട്ടികളുടെ വായിലൂടെ ശരീരത്തിനുള്ളിൽ പ്രവേശിക്കുമോ? മൃഗങ്ങൾ ഉപദ്രവിക്കുമോ ? തുടങ്ങിയ ചിന്തകൾ മാതാപിതാക്കളെ അലട്ടുന്ന പ്രശ്നങ്ങൾ തന്നെയാണ്.

എന്നാൽ വളർത്തുമൃഗങ്ങൾ ഒരിക്കലും നിങ്ങളുടെ കുട്ടികളുടെ ആരോഗ്യം തകർക്കില്ല. മറിച്ച്, അവരെ കൂടുതൽ ഊർജസ്വലരാക്കി മാറ്റുകയെ ഉള്ളൂ. വളർത്തുമൃഗങ്ങളെ വളർത്തുന്ന വീട്ടിലെ കുട്ടികൾക്ക് മറ്റു കുട്ടികളെ അപേക്ഷിച്ച് ഐക്യു ലെവലാ വളരെ കൂടുതലാണ് എന്ന് പഠനങ്ങൾ തെളിയിക്കുന്നു. വളർത്തുമൃഗങ്ങളുമായുള്ള സമ്പർക്കം, കളി , ചിരി എന്നിവ കുട്ടികളെ കൂടുതൽ മിടുക്കരാക്കുന്നു. ഭക്ഷണം പങ്കുവയ്ക്കുക, സ്നേഹം പ്രകടിപ്പിക്കുക, ശ്രദ്ധ കാണിക്കുക തുടങ്ങിയ കാര്യങ്ങൾ കുട്ടികൾ സ്വയം മനസിലാക്കുന്നതിന് വീട്ടിൽ വളർത്തു മൃഗങ്ങൾ ഉണ്ടാകുന്നത് സഹായിക്കും. സഹജീവികളോടുള്ള സ്നേഹവും കരുണയും ആർദ്രതയുമെല്ലാം കുട്ടികളിൽ വളർത്തുന്നതിന് വളർത്തുമൃഗങ്ങൾ സഹായിക്കുമെന്ന്  പുതിയ പഠനങ്ങൾ തെളിയിക്കുന്നുണ്ട്. വളർത്തു മൃഗങ്ങളെ വളർത്തുന്ന വീടുകളിലെ കുട്ടികൾ വാശിക്കാരാകില്ല എന്നും പഠനം പറയുന്നു.

എന്നാൽ ഏതൊരു രക്ഷകർത്താവും ഭയക്കുന്നപോലെ തന്നെ വളർത്തുമൃഗങ്ങളിൽ നിന്നും അസുഖങ്ങൾ ഉണ്ടാകുന്ന സാഹചര്യങ്ങൾ ഒഴിവാക്കണം. രോമം കൊഴിയുന്ന വളർത്തു പട്ടികളെയും പൂച്ചകളെയും ഒഴിവാക്കുക.