ലോകത്തു പടർന്നു പിടിക്കുന്ന കൊറോണ വൈറസ് ബാധയെ തടയാന്‍ വെളുത്തുള്ളി വേവിച്ച വെള്ളം കൊണ്ട് സാധിക്കുമോ? നിരവധി വ്യാജപ്രചാരണങ്ങളാണ് കൊറോണ വൈറസ് ബാധ കേരളത്തില്‍ സ്ഥിരീകരിച്ചതിനെത്തുടര്‍ന്ന് വാട്സാപ്പിലും, സോഷ്യല്‍ മീഡിയയിലും പ്രചരിച്ചുകൊണ്ടിരിക്കുന്നത്.  ഒരു ബൗള്‍ വെളുത്തുള്ളി വേവിച്ച വെള്ളം കുടിച്ചാല്‍ കൊറോണ വൈറസിനെ സുഖപ്പെടുത്താനാകുമെന്നും ചൈനീസ് ഡോക്ടര്‍മാര്‍ ഇതിന്റെ ഫലസിദ്ധി തെളിയിച്ചതാണെന്ന തരത്തിലാണ് ഇപ്പോൾ വ്യാജ വാർത്തകൾ  പ്രചരിച്ചുകൊണ്ടിരിക്കുന്നത്. ഒരു ബൗള്‍ വെളുത്തുള്ളി വേവിച്ച വെള്ളം കൊണ്ട് കൊറോണ വൈറസ് ബാധ ചെറുക്കാം. ചൈനയിലെ ഡോക്ടര്‍മാരുടേതാണ് നിര്‍ദേശം. നിരവധി രോഗികളില്‍ ഉപയോഗിച്ച് ഫലം കണ്ടതാണ്. എട്ട് വെളുത്തുള്ളിയും ഏഴു കപ്പ് വെള്ളവും തിളപ്പിച്ച് കുടിക്കുക. ഒരു ദിവസം കൊണ്ട് കൊറോണ വൈറസ് ബാധ വിട്ടുമാറും എന്നാണ് വ്യാപകമായ പ്രചരിക്കുന്ന സന്ദേശം വിശദമാക്കുന്നത്.

എന്നാല്‍ ഇതിന് യാതൊരു ശാസ്ത്രീയ അടിത്തറയുമില്ലെന്ന് ബൂം ലൈവിന്റെ ഫാക്ട് ചെക്കിങ്ങില്‍ വ്യക്തമാക്കുന്നുണ്ട്. വെളുത്തുള്ളി വെന്ത വെള്ളത്തിന് ഏതെങ്കിലും തരത്തില്‍ മാരകമായ കൊറോണ വൈറസ് ബാധയെ ചെറുക്കാന്‍ സാധിക്കില്ലെന്നാണ് ബം ലൈവ് നടത്തിയ ഫാക്ട് ചെക്കില്‍ കണ്ടെത്തിയത്. PUBMED, ഗൂഗിള്‍ സ്‌കോളര്‍ തുടങ്ങിയ ശാസ്ത്ര പോര്‍ട്ടലുകളെ അടിസ്ഥാനമാക്കിയാണ് ബൂം ലൈവ് റിപ്പോര്‍ട്ട് ചെയ്യുന്നത്. ജലദോഷം ചെറുക്കാന്‍ വെളുത്തുള്ളിക്കുള്ള കഴിവിനെയാണ് കൊറോണ വൈറസിനെ ചെറുക്കാന്‍ എന്ന പേരില്‍ ഉപയോഗിക്കപ്പെടുന്നത്. സാധാരണ ജലദോഷത്തില്‍ നിന്ന് ഏറെ വ്യത്യസ്തമാണ് കൊറോണ വൈറസ് എന്ന് ഇതിനോടകം ഡബ്ല്യുഎച്ച്ഒ വ്യക്തമാക്കിയിട്ടുണ്ട്.