കൊവിഡ് മഹാമാരി മനുഷ്യനെ ആശങ്കയുടെ മുള്‍മുനയില്‍ നിര്‍ത്തുമ്പോൾ ആശ്വാസം പകരുകയാണ് കൊറോണ വൈറസിന്‍റെ ശേഷി കുറയുന്നുവെന്ന രീതിയിലെ പ്രചാരണം . ലോക്ക്ഡൌണും നിയന്ത്രണങ്ങളുംകൊണ്ട് വലഞ്ഞ ജനം ലോകാരോഗ്യ സംഘടനയുടെ പേരില്‍ വന്ന പ്രചാരണം വ്യാപകമായി പങ്കുവയ്ക്കുകയും ചെയ്തു. മാത്രമല്ല വലിയ ആശ്വാസമായിരുന്നു ഇത് നല്കിയതും. എന്നാല്‍ കൊറോണ വൈറസിന്‍റെ ശേഷി കുറയുന്നതായി ലോകാരോഗ്യ സംഘടന വിശദമാക്കിയിട്ടുണ്ടോ? അത്തരത്തില്‍ നടക്കുന്ന പ്രചാരണങ്ങളിലെ വസ്തുത എന്താണ്? എന്നതിന്റെ വസ്തുത എന്താണ് നോക്കാം. 

'ലോകാരോഗ്യ സംഘടനയും ലോകത്തിലെ വിവിധ ആശുപത്രികളും ചേര്‍ന്ന് നടത്തിയ പഠനത്തിന്‍റെ അടിസ്ഥാനത്തില്‍ കൊവിഡ് 19 പ്രഹരശേഷി കുറയുന്നതായി കണ്ടെത്തി. അടുത്തിടെ കൊവിഡ് 19 പോസിറ്റീവായവരില്‍ വൈറസിന്‍റെ പ്രഭാവം അപകടകരമായ രീതിയിലല്ല. വെറസ് ബാധിച്ചവരില്‍ രോഗപീഡകളും കുറവാണ്' എന്നാണ് ജൂണ്‍ ആദ്യവാരം മുതല്‍ സമൂഹമാധ്യമങ്ങളില്‍ നടക്കുന്ന പ്രചാരണം വിശദമാക്കുന്നത്. കൊവിഡ് 19 വൈറസിന്‍റെ ശേഷി കുറയുന്നതായി ലോകാരോഗ്യ സംഘടന വ്യക്തമാക്കിയിട്ടില്ല. ഇറ്റലിയിലെ പ്രമുഖ ഡോക്ടര്‍മാര്‍ ഇത്തരത്തിലുള്ള നിരീക്ഷണം പങ്കുവച്ചിരുന്നുവെങ്കിലും ലോകാരോഗ്യ സംഘടന ഇതിനോട് പ്രതികരിച്ചിരുന്നില്ല. ഇത്തരം കണ്ടെത്തലുകള്‍ ലോകാരോഗ്യ സംഘടന ഇതുവരെ നടത്തിയിട്ടില്ല.