കൊറോണയെ പ്രതിരോധിക്കാൻ നെട്ടോട്ടമോടുകയാണ് നാം എല്ലാവരും . കൈ സോപ്പിട്ട് കഴുകിയും,സാനിറ്റൈസർ ഉപയോഗിച്ചും മാസ്ക് വച്ചും നാം സുരക്ഷ നടത്തുന്നു. എന്നാൽ ഇപ്പോൾ ഇതാ പുതിയൊരു പഠനം പുറത്ത് വന്നിരിക്കുകയാണ് . കൈ കഴുകാൻ സോപ്പോ സാനിറ്റൈസറോ ഉപയോഗിക്കുന്നതുപോലെ പ്രത്യേക അണുനാശിനികൾ ഉപയോഗിച്ച് വായയും തൊണ്ടയും കഴുകുന്നത് കോവിഡ് രോഗവ്യാപനം തടയാൻ സഹായിക്കുമെന്ന് ഫാർമസി ഗവേഷണ സംഘം നടത്തിയ പഠന ശേഷം പറയുന്നു .അന്താരാഷ്ട്ര ജേണൽ മെഡിക്കൽ ഹൈപ്പോതീസീസിൽ പ്രസിദ്ധീകരിച്ച പ്രബന്ധത്തിലാണ് സർഫക്ടന്റ് സംയുക്തങ്ങൾ അടങ്ങിയ മൗത്ത് വാഷുകളും ഗാർഗിളും കോവിഡിനെ പ്രതിരോധിക്കാൻ സഹായിക്കുമെന്ന ആശയം ഗവേഷകർ മുന്നോട്ടുവെച്ചത്.

കോവിഡ് വൈറസുകൾ ശ്വാസകോശത്തിൽ എത്തുന്നതിനുമുമ്പ് തൊണ്ടയിൽ എത്തുകയും അവിടെ ഏറെദിവസം നിലനിൽക്കുകയും ചെയ്യുമെന്ന് പഠനങ്ങളിൽനിന്ന് വ്യക്തമായിരുന്നു .അണുനാശിനികൾ ഉപയോഗിച്ച് വായും തൊണ്ടയും കഴുകുന്നതിലൂടെ വൈറസിനെ നശിപ്പിച്ച് രോഗം പടരുന്നത് തടയാനാവും.സർഫക്ടന്റ് വൈറസിനെ നശിപ്പിക്കുമെന്നും ഇവർ വ്യക്തമാക്കുന്നു . സോപ്പുകൾ വൈറസുകളെ എങ്ങനെ നശിപ്പിക്കുന്നുവോ അതുപോലെ സർഫക്ടന്റ് അടങ്ങിയ ഗാർഗിളും മൗത്ത് വാഷും ഉപയോഗിക്കുമ്പോൾ തൊണ്ടയിലെയും വായയിലെയും വൈറസുകൾ നശിക്കുമത്രേ . വൈറസുകളുടെ ബാഹ്യാവരണത്തിന് പുറത്തുള്ള മുള്ളുകൾ പോലുള്ള ഭാഗങ്ങൾ നശിപ്പിച്ചാണ് അവയെ നിർവീര്യമാക്കുന്നത്. ശരീരത്തിന് ദോഷമുണ്ടാക്കില്ലെന്ന് തെളിഞ്ഞിട്ടുള്ള കൃത്രിമമായ ഒട്ടേറെ സർഫക്ടന്റുകൾ വിപണിയിൽ വാങ്ങിക്കാനും കഴിയും .

കോവിഡിനെതിരെയുള്ള പോരാട്ടത്തിൽ ചെലവുകുറഞ്ഞ പ്രതിരോധതന്ത്രം എന്ന നിലയിൽ വലിയ സാധ്യതയാണ് സർഫക്ടന്റുകളുടെ ഉപയോഗത്തിലൂടെ ഉള്ളത് . എന്നാൽ സർഫക്ടന്റുകൾ കോവിഡ് വൈറസിനെ നശിപ്പിക്കുമോ എന്ന് ഉറപ്പിക്കാൻ തുടർപഠനം ആവശ്യമാണെന്ന് ഗവേഷകസംഘം പറയുന്നു . കോഴിക്കോട് ഗവ. മെഡിക്കൽ കോളേജ് ഫാർമസി വകുപ്പ് അധ്യാപകരായ ഡോ. കെ. പ്രമോദ്, ഡോ. യു.എസ്. ജിജിത്, ഡോ. സി.എസ്. മഞ്ജു, ഡോ. സബ്നാ കോട്ട(സൗദി അറേബ്യ കിങ് അബ്ദുൾ അസീസ് സർവകലാശാല), ഡോ. എ. അരവിന്ദ് (തിരുവനന്തപുരം ഗവ. മെഡിക്കൽ കോളേജ് ഫാർമസി വകുപ്പ്), ഡോ. എം. അബു താഹിർ(മൈസൂരു ജെ.എസ്.എസ്. കോളേജ് ഓഫ് ഫാർമസി) എന്നിവർ പഠനസംഘത്തിൽ ഉൾപ്പെട്ടിരുന്നു .ഏതായാലും പുതിയ ഈ കണ്ടെത്തൽ ഏറെ ആശ്വാസകരമാണ്‌. പ്രത്യേക അണുനാശിനികൾ ഉപയോഗിച്ച് വായയും തൊണ്ടയും കഴുകുന്നത് കോവിഡ് രോഗവ്യാപനം തടയാൻ സഹായിക്കുമെന്ന് ഫാർമസി ഗവേഷണ സംഘം നടത്തിയ പഠനം വിലപ്പെട്ടതാണ്.