യുഎസിലെ നാലു ബാങ്കുകളില്‍ ഒരാഴ്ചയ്ക്കിടെ കവര്‍ച്ച നടത്തിയ യുവതി 'പിങ്ക് ലേഡി ബണ്ടിറ്റ്' പിടിയില്‍. സിര്‍സെ ബയസ് (35) എന്ന സ്ത്രീയും സഹായി എന്നു കരുതുന്ന അലക്‌സിസ് മൊറൈല്‍സുമാണ് (38) അറസ്റ്റിലായതെന്ന് എഫ്ബിഐ അറിയിച്ചു. ജൂലൈ 20 മുതലാണ് സിര്‍സെ ബാങ്ക് കൊള്ളയടി തുടങ്ങിയത്.

തുകയെഴുതിയ കുറിപ്പ് ബാങ്കുകളുടെ കൗണ്ടറില്‍ ഇരിക്കുന്ന ക്ലര്‍ക്കിനു നല്‍കിയാണ് ഇവര്‍ 'ഓപ്പറേഷന്‍' നടപ്പാക്കിയിരുന്നത്. കവര്‍ച്ചയ്ക്ക് എത്തുമ്പോള്‍ കൈവശം പിങ്ക് നിറത്തിലുള്ള ബാഗ് ഉണ്ടായിരുന്നതിനാലാണ് 'പിങ്ക് ലേഡി ബണ്ടിറ്റ്' (പിങ്ക് കൊള്ളക്കാരി) എന്നു പേരു വീണത്. പൊലീസും ഇങ്ങനെയാണു വിശേഷിപ്പിച്ചത്. യുവതിയെ പിടികൂടാന്‍ സഹായിക്കുന്നവര്‍ക്ക് 10,000 ഡോളറിന്റെ പാരിതോഷികം എഫ്ബിഐ പ്രഖ്യാപിച്ചിരുന്നു.

യുഎസിന്റെ കിഴക്കന്‍ തീരങ്ങളിലെ സംസ്ഥാനങ്ങളിലാണ് യുവതി കവര്‍ച്ച നടത്തിയത്. കൊള്ളയടിക്കു ശേഷം ഒളിവിലായിരുന്ന ഇവരെ നോര്‍ത്ത് കാരലൈനയില്‍ ഷാര്‍ലറ്റ് സ്പീഡ്വേ ഇന്‍ ആന്‍ഡ് സ്യൂട്ട്‌സില്‍നിന്നാണു പൊലീസ് പിടികൂടിയത്. ഡെലവെയര്‍, പെന്‍സില്‍വേനിയ, നോര്‍ത്ത് കാരലൈന എന്നിവിടങ്ങളിലെ ബാങ്കുകളാണ് കവര്‍ച്ചയ്ക്കിരയാക്കിയത്.

കൊള്ളയടി, ആയുധം കൈവശം വയ്ക്കല്‍, ഭീഷണിപ്പെടുത്തല്‍ എന്നിവ ഉള്‍പ്പെടുത്തിയാണ് അഞ്ചടി നാലിഞ്ച് ഉയരവും 59 കിലോ ഭാരവുമുള്ള പിങ്ക് ലേഡി ബണ്ടിറ്റിന് എതിരെ കേസെടുത്തിരിക്കുന്നത്. ജൂലൈ 20-ന് പെന്‍സില്‍വേനിയയില്‍ ആയിരുന്നു ആദ്യ കൊള്ള. മൂന്നു ദിവസത്തിനുശേഷം ഡെലവെയറിലെ ബാങ്ക് ലക്ഷ്യമിട്ടു. വ്യാഴം, ശനി ദിവസങ്ങള്‍ക്കിടയില്‍ നോര്‍ത്ത് കാരലൈനയിലെ രണ്ടു ബാങ്കുകളും കൊള്ളയടിച്ചതായി എഫ്ബിഐ പറഞ്ഞു. 665 മൈല്‍ ദൂരമാണ് കൊള്ളയടിക്കായി യുവതി സഞ്ചരിച്ചത്.

വിവിധ സംസ്ഥാനങ്ങളിലെ റിപ്പോര്‍ട്ടുകള്‍ കിട്ടുന്നതുപ്രകാരം പ്രതികള്‍ക്കെതിരെ കൂടുതല്‍ കേസ് ചുമത്തിയേക്കും. തന്റെ അടയാളമായ പിങ്കിനു പകരം, പിടിക്കപ്പെടുമ്പോള്‍ ഓറഞ്ച് നിറമുള്ള ഒറ്റക്കുപ്പായമാണു ധരിച്ചിരുന്നതെന്നു ദ് പിറ്റ് കൗണ്ടി ഭരണകൂടം ഫെയ്‌സ്ബുക്കിലൂടെ അറിയിച്ചു.  ഇവരുടെ വേഷവിധാനം ശ്രദ്ധേയമാണ്. രണ്ടു ബാങ്കുകളില്‍ യോഗ പാന്റും ടോപ്പും നേവി ബേസ്‌ബോള്‍ തൊപ്പിയുമാണു ധരിച്ചത്. വരകളുള്ള ഷര്‍ട്ടായിരുന്നു മറ്റൊരു ബാങ്കില്‍ എത്തിയപ്പോള്‍. അവസാനത്തെ കൊള്ളയടിക്കു വട്ടങ്ങളുള്ള ഉടുപ്പും തൊപ്പിയുമായിരുന്നു. നാലിടത്തും സണ്‍ഗ്ലാസ് ഉപയോഗിച്ചിരുന്നതായും പൊലീസ് പറഞ്ഞു.