കൊറോണ വ്യാപനത്തിന് പിന്നാലെ ലോകർഷ്ട്രങ്ങൾ സാമ്പത്തികമായി തളർന്നു. പല കോർപറേറ്റ് കമ്പനികളും നെട്ടോട്ടമോടുന്ന കാഴ്ചയും നാം കണ്ടതാണ്. കൊറോണ വ്യാപനം റിപ്പോർട്ട് ചെയ്ത രണ്ട് വര്ഷം പിന്നിടുമ്പോൾ പല കമ്പനികളും ഉയർത്തെഴുന്നേൽക്കുകയാണ്. ഈ ഒരു സാഹചര്യത്തിൽ വളരെ വ്യത്യസ്തമായ നിലപാട് സ്വീകരിച്ചിരിക്കുകയാണ് നൈകി.

ഉല്‍പാദനം കൂട്ടി വിപണി പിടിക്കുമ്പോഴും ജീവനക്കാരുടെ ആരോഗ്യം പരിഗണിക്കാന്‍ മനസ്സ്​ വെക്കുന്ന ഉടമകള്‍ക്കൊപ്പം നില്‍ക്കാനാണ്​ ഉപഭോകതാക്കൾക്ക് ഇഷ്ടം. അത്തരത്തിലൊരു തീരുമാനവുമായി ലോകത്തെ മുഴുവനും അദ്​ഭുതപ്പെടുത്തിയിരിക്കുകയാണ്​ പ്രമുഖ സ്​പോര്‍ട്​സ്​ ബ്രാന്‍ഡായ 'നൈകി​'​. യു.എസിലെ കോര്‍പറേറ്റ്​ ഓഫീസിലുള്ള എല്ലാ ജീവനക്കാര്‍ക്കും അടിയന്തരമായി ഒരാഴ്​ച ശമ്പ​ളത്തോടു കൂടിയുള്ള പൂര്‍ണ വിശ്രമമാണ്​ കമ്പനി അനുവദിച്ചിരിക്കുന്നത്​.

തങ്ങളുടെ മാനസികാരോഗ്യം വീണ്ടെടുക്കുകയും ഊര്‍ജവും ഉന്മേഷവും തിരിച്ചുപിടിക്കുകയും ചെയ്യാനാണ്​ അവധി നൽകിയിരിക്കുന്നത്. തിങ്കള്‍ മുതല്‍ അടുത്ത വെള്ളിയാഴ്ച വരെ എല്ലാവര്‍ക്കും വീട്ടിലിരിക്കാവുന്നതാണ്.

അതേസമയം അടുത്തിടെയായി നിരവധി സ്​ഥാപനങ്ങള്‍ ഇതേ മാതൃകയില്‍ ജീവനക്കാര്‍ക്ക്​ അവധി നല്‍കി തുടങ്ങിയിട്ടുണ്ട്. തുടര്‍ച്ചയായ ജോലിയും അതിന്‍റെ തുടര്‍ച്ചയായ സമ്മര്‍ദങ്ങളും കുറക്കുകയെന്ന ലക്ഷ്യത്തോടെയാണ്​ നടപടി. നൈകിന്‍റെ മറ്റു കേന്ദ്രങ്ങളില്‍ അവധി ബാധകമാകില്ല.