നമ്മളില്‍ പലരും തേനീച്ച എന്ന പേര് കേള്‍ക്കുമ്പോള്‍ തന്നെ ഭയന്ന് വിറക്കും. എന്നാല്‍ റുവാണ്ടയിലെ സാബ എന്ന ധൈര്യശാലി തെല്ലും ഭയമില്ലാതെ തന്റെ ദേഹത്തേക്ക് മാടിവിളിക്കുകയാണ്. ദേഹത്തൊരു പതിനായിരം തേനീച്ചകളെയും വഹിച്ചു കൊണ്ട് തേരാപാര നടന്നിട്ടും അദ്ദേഹത്തെ ഇന്നോളം ഒരു തേനീച്ചയും കുത്തി നോവിച്ചിട്ടുമില്ല.

സാബ തേനീച്ച വളര്‍ത്തല്‍ ഒരു ഉപജീവന മാര്‍ഗമാക്കിയിട്ട് 30 വര്‍ഷത്തിലേറെയായി. ഇദ്ദേഹം ശരീരം മുഴുവനും തേനീച്ചകളെ പേറി കൊണ്ട് നില്‍ക്കുന്ന ചിത്രം അടുത്തിടെയാണ് സോഷ്യല്‍ മീഡിയയില്‍ വൈറലായത്.

ദേഹത്ത് ഒരു പെണ്‍തേനീച്ചയെ കൊണ്ട് വെച്ചാണ് താന്‍ ബാക്കിയുള്ള നൂറുകണക്കിന് തേനീച്ചകളെ ആകര്‍ഷിക്കുന്നത് എന്നാണ് സാബ പറയുന്നത്. തന്റെ അരക്കെട്ടിനടുത്ത് ഒരു നൂലില്‍ ഈ പെണ്‍ തേനീച്ചയെ സാബ ബന്ധിക്കും. അതോടെ അവിടേക്ക് ആകര്‍ഷിക്കപ്പെടുന്ന നൂറുകണക്കിന് ആണീച്ചകള്‍ ആ പെണ്ണീച്ചയെ വന്നു പൊതിയും.

ഈ പുതിയ വിദ്യ തന്നില്‍ നിന്ന് പഠിച്ചെടുക്കാന്‍ വിവിധ സ്ഥലത്തു നിന്ന് കുറെ പേര്‍ വരാറുണ്ടെന്നും സാബ പറഞ്ഞു. ആണ്‍തേനീച്ചകള്‍ പെണ്‍തേനീച്ചയെ സംരക്ഷിക്കാനാണ് വരുന്നത് അതുകൊണ്ടാണ് തേനീച്ചകള്‍ തന്നെ ഉപദ്രവിക്കാത്തതെന്നും സാബ അഭിപ്രായപ്പെട്ടു.