ഗൂഗിളിന്റെ സഹസ്ഥാപകനും ലോകത്തിലെ ആറാമത്തെ വലിയ ധനികനുമായ സെർജി ബ്രിൻ മൂന്ന് വർഷത്തെ ദാമ്പത്യം അവസാനിപ്പിക്കുന്നു.
വിവാഹമോചനത്തിന് അപേക്ഷ നൽകിയിരിക്കുകയാണ് സെർജി ബ്രിൻ. വേർപിരിയലിന്റെ വിശദാംശങ്ങളും രേഖകളും രഹസ്യമായി സൂക്ഷിക്കാൻ കോടതി നടപടി സ്വീകരിക്കണമെന്നും വിവാഹമോചന അപേക്ഷയിലുണ്ട്.

പൊരുത്തപ്പെടാനാവാത്ത അഭിപ്രായ വ്യത്യാസങ്ങൾ കാരണമാണ് മൂന്ന് വർഷത്തെ നിക്കോളെ ഷാനഹാനുമായുള്ള ദാമ്പത്യം ബ്രിൻ അവസാനിപ്പിക്കുന്നതെന്നാണ് അപേക്ഷയിൽ പറഞ്ഞിരിക്കുന്നത്. ഇത്തരത്തിൽ ദാമ്പത്യം അവസാനിപ്പിക്കുന്ന മൂന്നാമത്തെ മെഗാ ബില്ല്യണയർ കൂടിയാണ് സെർജി ബ്രിൻ.സെർജി നിക്കോളെ ദമ്പതികൾക്ക് മൂന്ന് വയസ് പ്രായമുള്ള ആൺകുട്ടിയുണ്ട്.

23 ആന്റ് മീയുടെ സഹസ്ഥാപകയായ ആനി വോജ്‌സിക്കിയുമായുള്ള ബ്രിന്നിന്റെ മുമ്പത്തെ വിവാഹവും 2015 ൽ വിവാഹമോചനത്തിൽ അവസാനിക്കുകയായിരുന്നു. ‌ബ്ലൂംബെർഗ് ബില്ല്യണയർ പട്ടികയനുസരിച്ച് നാൽപത്തിയെട്ടുകാരനായ ബ്രിന്നിന് 94 ബില്യൺ ഡോളർ ആസ്തിയുണ്ട്.

ഇതിൽ ഭൂരിഭാ​ഗവും ഗൂഗിളിലെ അദ്ദേഹത്തിന്റെ ഓഹരികളിൽ നിന്നാണ്. 1998 ൽ ലാറി പേജുമായി സഹകരിച്ച് ​ഗൂ​ഗിൾ സ്ഥാപിച്ച അദ്ദേഹം പിന്നീട് ആൽഫബെറ്റ് ഇങ്ക് രൂപീകരിച്ചു. 2019 ൽ ഇരുവരും ആൽഫബെറ്റ് വിട്ടുവെങ്കിലും, കമ്പനിയെ നിയന്ത്രിക്കുന്ന ഓഹരികളുമായി ബോർഡിൽ തുടരുന്നുണ്ട്.