ബ്രിട്ടിഷ് പ്രധാനമന്ത്രിയാകാനുള്ള മത്സരത്തിൽ ഇന്ത്യൻ വംശജനായ മുൻ ധനമന്ത്രി ഋഷി സുനക് മുന്നിൽ നിൽക്കുന്നതായി റിപ്പോർട്ട്. ഇതിനായി ഔദ്യോഗിക പ്രചാരണം സുനക് ആരംഭിച്ചുകഴിഞ്ഞിരിക്കുകയാണ്. ബ്രെക്സിറ്റ് അനുകൂല നിലപാടുള്ള സുനക്കിന് ഇപ്പോഴത്തെ സാമ്പത്തിക വെല്ലുവിളികൾ ഫലപ്രദമായി നേരിടാനാകുമെന്ന അഭിപ്രായത്തിന് കൺസർവേറ്റീവ് പാർട്ടിയിൽ പിന്തുണ ഏറിവരുകയാണ്.

അതോടൊപ്പം തന്നെ പാർട്ടിയിൽ ഐക്യമുണ്ടാക്കാനും സുനക്കിനു കഴിയുമെന്ന് പ്രതീക്ഷിക്കുന്നു. ഇൻഫോസിസ് സ്ഥാപകരിലൊരാളായ എൻ.ആർ.നാരായണമൂർത്തിയുടെ മകൾ അക്ഷതയുടെ ഭർത്താവാണ് സുനക്.

അങ്ങനെ മത്സരരംഗത്ത് കനത്ത വെല്ലുവിളിയാകുമെന്ന് പ്രതീക്ഷിച്ച പ്രതിരോധമന്ത്രി ബെൻ വാലസ് പിന്മാറിയതും സുനക്കിന് അനുകൂലമായി മാറിയിട്ടുണ്ട്. എന്നാൽ നേതൃസ്ഥാനം മോഹിക്കുന്നവർ ഏറെയുണ്ടെങ്കിലും ആരും ഇതുവരെ ഔദ്യോഗികമായി പ്രചാരണം ആരംഭിച്ചിട്ടില്ല.

അതേസമയം ഗോവൻ വംശജയായ നിയമമന്ത്രി സ്യുവെല്ല ബ്രേവർമാനും മത്സരത്തിനുണ്ട്. നൈജീരിയൻ വംശജനായ മുൻ മന്ത്രി കെമി ബാഡെനോക് കൂടി മത്സരത്തിനെത്തിയതോടെ രംഗം സജീവമാണ്. മത്സരത്തിന്റെ സമയക്രമം സംബന്ധിച്ച് ഈയാഴ്ച തീരുമാനമായേക്കുമെന്നും റിപ്പോർട്ടുകൾ ചൂണ്ടിക്കാണിക്കുന്നു.