ലോകം ആരാധിക്കുന്ന ജെയിംസ് ബോണ്ട് വെള്ളിത്തിരയില്‍ പ്രത്യക്ഷപ്പെടുമ്പോള്‍ കേള്‍ക്കുന്ന തീം സംഗീതത്തിന്റെ സ്രഷ്ടാവും സംഗീത സംവിധായകനും ഗായകനുമായ മോണ്ടി നോര്‍മാന്‍ വിടവാങ്ങി. 94വയസായിരുന്നു.

1962ല്‍ ആദ്യ ബോണ്ട് ചിത്രമായ ഡോ. നോ മുതല്‍ ഇയോണ്‍ പ്രൊഡക്ഷന്‍സ് നിര്‍മ്മിച്ച എല്ലാ ബോണ്ട് സിനിമകളിലും നോര്‍മാന്റെ തീം സംഗീതം കേള്‍ക്കാം. ഷോണ്‍ കോണറി നായകനായ ഡോ. നോയിലെ നോര്‍മാന്റെ തീം സംഗീതം ഇംഗ്ലീഷ് കമ്പോസറായ ജോണ്‍ ബാരിയാണ് പുനഃക്രമീകരിച്ചത്. പിന്നീട് ഇതുവരെ ഇറങ്ങിയ എല്ലാ ബോണ്ട്‌സിനിമകളുടെയും തീം മ്യൂസിക് അതാണ്.

ഇലക്ട്രിക് ഗിറ്റാറിന്റെ അകമ്പടിയോടെയുള്ള തീം സംഗീതത്തില്‍ കാലാനുസൃതമായി സംഗീത സംവിധായകര്‍ മാറ്റങ്ങള്‍ വരുത്തിയെങ്കിലും അടിസ്ഥാന സംഗീതത്തിന് മാറ്റമില്ല.

ബോണ്ട് തീം മ്യൂസിക് തന്റെ സൃഷ്ടിയാണെന്ന് പില്‍ക്കാലത്ത് ബാരി അവകാശപ്പെട്ടെകിലും നോര്‍മാന്‍ നിയമനടപടികളിലൂടെ തന്റെ അവകാശം സ്ഥാപിച്ചു. 30,000 പൗണ്ട് നഷ്ടപരിഹാരവും നോര്‍മാന് ലണ്ടന്‍ കോടതി അനുവദിച്ചു.

ബോണ്ടിന്റെ തീം മ്യൂസിക്കിന്റെ റോയല്‍റ്റിയായി 6,00,000 പൗണ്ടാണ് നോര്‍മാന്‍ സ്വന്തമാക്കിയത്.1928 ഏപ്രില്‍ 4ന് ലണ്ടനിലെ ജൂത കുടുംബത്തിലാണ് നോര്‍മാന്റെ ജനനം. 1950കളില്‍ സ്റ്റാന്‍ലി ബ്ലാക്ക്, ടെഡ് ഹീത്ത് തുടങ്ങിയ ഇംഗ്ലീഷ് ഗായകരുടെ സംഗീത സംഘങ്ങളില്‍ ഗായകനായി. 1950കളില്‍ സംഗീത സംവിധായകനായി.ബ്രിട്ടീഷ് പോപ്പ് ഗായകന്‍ ക്ലിഫ് റിച്ചാര്‍ഡ് അടക്കമുള്ള ഗായകര്‍ക്കൊപ്പം പ്രവര്‍ത്തിച്ചു. സംഗീത നാടകങ്ങളിലെയും സിനിമകളിലെയും ഗാനങ്ങള്‍ക്ക് വരികളുമെഴുതി.

ദ ടൂ ഫേസസ് ഒഫ് ഡോ. ജെക്കിള്‍, ദ ഡേ ദ എര്‍ത്ത് കോട്ട് ഫയര്‍ തുടങ്ങിയ ചിത്രങ്ങളുടെ സംഗീതവും ചിട്ടപ്പെടുത്തി. ബ്രിട്ടീഷ് നടിയായിരുന്ന ഡയാന കൂപ്ലന്‍ഡ് ആണ് ആദ്യ ഭാര്യ. ഒരു മകളുണ്ട്. പിന്നീട് വിവാഹമോചനം നേടി റീന സീസരിയെ വിവാഹം ചെയ്തു.