മുൻ യുഎസ് പ്രസിഡന്റ് ഡോണൾഡ് ട്രംപിന്റെ ആദ്യ ഭാര്യ ഇവാന ട്രംപ് (73) അന്തരിച്ചു. മരണ വാർത്ത ഡോണൾഡ് ട്രംപ് തന്റെ സമൂഹ മാധ്യമമായ ട്രൂത്ത് സോഷ്യൽ വഴിയാണ് പുറത്തു വിട്ടത്. എന്നാൽ, മരണകാരണത്തെ കുറിച്ച് അദ്ദേഹം സൂചന നൽകിയിട്ടില്ല. പ്രചോദനാത്മകമായ ജീവിതമാണ് ഇവാന നയിച്ചത്. അവരുടെ അഭിമാനം മൂന്ന് മക്കളായ ഡോണാൾഡ് ജൂനിയർ, ഇവാൻക, എറിക് എന്നിവരെ കുറിച്ച് ഓർത്തായിരുന്നുവെന്നും ട്രംപ് സാമൂഹിക മാധ്യമത്തിൽ കുറിച്ചു.

വീട്ടിൽ മരിച്ച നിലയിൽ കണ്ടെത്തുകയായിരുന്നു. മരണത്തിൽ അസ്വഭാവികതയില്ലെന്നാണ് പൊലീസ് പറയുന്നത്. ഇവാനയുടെ മരണത്തിൽ അതീവ ദുഃഖമുണ്ടെന്ന് ട്രംപ് പ്രതികരിച്ചു. ചെക്ക് റിപ്പബ്ലിക്കിൽ ജനിച്ച ഇവാന മോഡലും സ്കീയിംഗ് താരവുമായിരുന്നു. ചെക്കൊസ്ലൊവാക്യയിൽ ജനിച്ച ഇവാന 1970കളിലാണ് യുഎസിലേക്ക് കുടിയേറിയത്. 1977ൽ ഡോണൾഡ് ട്രംപിനെ വിവാഹം കഴിച്ചു. 1992ൽ ഇരുവരും വിവാഹമോചിതരായി.

ഡോണൾഡ‍് ട്രംപ് ജൂനിയർ, ഇവാൻക ട്രംപ്, എറിക് ട്രംപ് എന്നിവർ മക്കളാണ്. ബിസിനസ്, ഫാഷന്‍ ഡിസൈനിങ്, മോഡല്‍ എന്നീ രംഗങ്ങളില്‍ സജീവമായിരുന്നു. പഴയ ചെക്കോസ്ലോവാക്കിയയിൽ കമ്യൂണിസ്റ്റ് ഭരണത്തിന് കീഴിലാണ് ഇവാന ജനിച്ച് വളർന്നത്. പിന്നീട് ഡോണൾഡ് ട്രംപിനെ വിവാഹം ചെയ്തതതിന് ശേഷം അവർ റിയൽ എസ്റ്റേറ്റ് ബിസിനസിലേക്ക് മാറി.

1981ലാണ് ട്രംപിനും ഇവാനക്കും ആദ്യ മകളായ ഇവാൻക ജനിക്കുന്നത്. 1993ലാണ് ഡോണാൾഡ് ട്രംപും ഇവാനയും വിവാഹമോചിതരാകുന്നത്. പിന്നീട് സ്വന്തം ബിസിനസ് നടത്തിയാണ് അവർ ജീവിതം മുന്നോട്ട് കൊണ്ടു പോയത്. ട്രംപ് ടവർ, ട്രംപ് താജ്, ട്രംപ് ഓർഗനൈസേഷൻ എന്നിങ്ങനെ ട്രംപ് സാമ്രാജ്യം കെട്ടിപ്പടുക്കുന്നതിൽ നിർണായക പങ്കുവഹിച്ച വ്യക്തിയായിരുന്നു ഇവാന.