ഇന്ത്യന്‍ വംശജര്‍ക്ക് അഭിമാന നിമിഷം. ഇന്ത്യന്‍ അമേരിക്കന്‍ നിയമജ്ഞ രൂപാലി എച്ച്. ദേശായി അമേരിക്കയിലെ ഉന്നതകോടതി ജഡ്ജിയായി തിരഞ്ഞെടുക്കപ്പെട്ടു. സുപ്രധാന അധികാരങ്ങളുള്ള ഒമ്ബതാം സര്‍ക്യൂട്ട് അപ്പീല്‍ കോടതിയിലേക്കാണ് യു.എസ് സെനറ്റ് രൂപാലിയെ തിരഞ്ഞെടുത്തത്. 29 നെതിരെ 67 വോട്ടുകള്‍ക്കാണ് നിയമനശിപാര്‍ശ അംഗീകരിച്ചത്.

സാന്‍ഫ്രാന്‍സിസ്‌കോ ആസ്ഥാനമായ ഒമ്ബതാം സര്‍ക്യൂട്ട് കോടതി അമേരിക്കയിലെ 13 അപ്പീല്‍ കോടതികളില്‍ ഏറ്റവും വലുതാണ്. ഒമ്ബത് സംസ്ഥാനങ്ങളും രണ്ട് ഭൂപ്രദേശങ്ങളും കോടതിയുടെ അധികാരപരിധിയില്‍ വരുന്നു.

നിയമരംഗത്ത് 16 വര്‍ഷത്തെ അനുഭവസമ്ബത്തുണ്ട് രൂപാലിക്ക്. അരിസോണ സ്‌കൂള്‍ ഓഫ് ലോയില്‍നിന്ന് നിയമബിരുദം നേടിയ രൂപാലി ഒമ്ബതാം സര്‍ക്യൂട്ട് കോടതിയിലെ ആദ്യ വനിത ചീഫ് ജസ്റ്റിസ് മേരി ഷ്രോഡറുടെ സഹായിയായിരുന്നു.