ലോകത്ത് പല ഭാഗത്തും യുദ്ധം മുറുകുമ്പോൾ എന്തായിരിക്കും ഇതിന്റെ പര്യവസാനം എന്നുള്ളതാണ് എല്ലാവരും ഉറ്റു നോക്കുന്നത് . യുദ്ധത്തിൽ ഏർപ്പെടാത്ത പല രാജ്യങ്ങളും ഇപ്പോൾ ആശങ്കയിലാണ് . ഇന്ത്യയടക്കം ആശങ്ക പങ്കുവച്ചിട്ടുണ്ട് . ഇസ്രായേൽ ഹമാസ് യുദ്ധം ഇപ്പോൾ ഒരു വർഷത്തോളം പിന്നിട്ടിട്ട് ഇപ്പോൾ ഇസ്രായേൽ ഇറാൻ യുദ്ധം എന്നുള്ള നിലയിലേക്ക് കാര്യങ്ങൾ എത്തി നിൽക്കുകയാണ് . അതിനേക്കാൾ മുൻപ് ആരംഭിച്ചതാണ് റഷ്യയും ഉക്രെയ്നും തമ്മിലുള്ള യുദ്ധം അതിപ്പോഴും തുടരുകയാണ് . ഇരു ഭാഗത്തു നിന്നും ആക്രമണങ്ങളും പ്രത്യാക്രമണങ്ങളും ആയിട്ട് യുദ്ധം പുരോഗമിക്കുമ്പോൾ അതിനിടയിലേക്ക് ഇപ്പോൾ ഉത്തര കൊറിയ കൂടി രംഗത്ത് വരുമ്പോൾ യുദ്ധം മുറുകുകയാണ് .

യുക്രെയ്‌നെതിരായ പോരാട്ടത്തിൽ റഷ്യയെ സഹായിക്കാൻ ഉത്തരകൊറിയ തങ്ങളുടെ സൈനികരെ റഷ്യയിൽ വിന്യസിച്ചതായി റിപ്പോർട്ട്. 1500ഓളം സൈനികർ നിലവിൽ റഷ്യയിൽ എത്തിട്ടുണ്ടെന്നും, ആകെ 12,000ത്തോളം സൈനികരെ റഷ്യയിലേക്ക് അയയ്‌ക്കാനാണ് ഉത്തരകൊറിയ തീരുമാനിച്ചിരിക്കുന്നതെന്നും ദക്ഷിണ കൊറിയൻ മാദ്ധ്യമങ്ങൾ റിപ്പോർട്ട് ചെയ്യുന്നു.റഷ്യയ്‌ക്ക് പിന്തുണയുമായി ഉത്തരകൊറിയയുടെ പതിനായിരത്തോളം സൈനികർ യുദ്ധത്തിന്റെ ഭാഗമായി മാറുമെന്ന് രഹസ്യാന്വേഷണ വിഭാഗങ്ങളിൽ നിന്ന് അറിയാൻ സാധിച്ചതായി യുക്രെയ്ൻ പ്രസിഡന്റ് വൊളോഡിമർ സെലൻസ്‌കി നേരത്തെ ആരോപിച്ചിരുന്നു.

പിന്നാലെയാണ് ഉത്തരകൊറിയയുടെ ഭാഗത്ത് നിന്ന് ഇത്തരമൊരു നീക്കമുണ്ടായെന്ന് ദക്ഷിണ കൊറിയ ചൂണ്ടിക്കാണിച്ചത്. ഉത്തരകൊറിയയുടെ ഭാഗത്ത് നിന്ന് ഉണ്ടായിരിക്കുന്നത് വലിയ സുരക്ഷാ ഭീഷണിയാണെന്നും, സാധ്യമായ എല്ലാ നടപടികളും ഇതിനെതിരെ സ്വീകരിക്കണമെന്നും നാഷണൽ ഇന്റലിജൻസ് സർവീസിന്റെ യോഗത്തിൽ ദക്ഷിണ കൊറിയയുടെ പ്രസിഡന്റ് യൂൻ സുക് യോൾ പറഞ്ഞു.ഉത്തരകൊറിയയുടെ സൈനികർ പരിശീലനത്തിന്റെ ഭാഗമായി റഷ്യയുടെ സൈനിക കേന്ദ്രങ്ങളിൽ എത്തിയതിന്റെ വീഡിയോ സമൂഹമാദ്ധ്യമങ്ങളിൽ പ്രചരിക്കുന്നുണ്ട്.