യുഎസ്സ്-മെക്‌സിക്കന്‍ അതിര്‍ത്തിയില്‍ പട്രോളിംഗിനായി ഉത്തരവാദപ്പെടുത്തിയിരുന്ന ഒരു ഉദ്യോഗസ്ഥന്‍ വ്യക്തിപരമായ ലക്ഷ്യങ്ങള്‍ നേടുന്നതിനായി രാജ്യ സുരക്ഷയെ അപകടത്തിലാക്കി എന്നതിന് കാലിഫോര്‍ണിയ പോലീസ് കേസെടുത്തു.

യുഎസ് കസ്റ്റംസ് ആന്റ് ബോര്‍ഡര്‍ പ്രൊട്ടക്ഷന്‍ ഓഫീസറായി 15 വര്‍ഷത്തോളം സേവനം ചെയ്തിട്ടുള്ള ജോസ് ലൂയിസ് കോടയെയാണ് പോലീസ് അറസ്റ്റു ചെയ്തത്. കൈക്കൂലി വാങ്ങല്‍, നിയമവിരുദ്ധമായ മനുഷ്യക്കടത്ത് എന്നിവയാണ് ലൂയിസ് കോടയ്‌ക്കെതിരെ ചുമത്തിയിരിക്കുന്ന കുറ്റങ്ങള്‍.

യുഎസ്സിലെ ഇന്റര്‍‌സ്റ്റേറ്റ് 5 എന്ന ഹൈവേയുടെയും മെക്‌സിക്കോയിലെ മെക്‌സിക്കന്‍ ഫെഡറല്‍ ഹൈവേയുടെയും ഇടയിലുള്ള പോര്‍ട്ട് ഓഫ് എന്‍ട്രിയാണ് സാന്‍ വൈസിഡ്രോ പോര്‍ട്ട് ഓഫ് എന്‍ട്രി. പ്രസ്തുത പോര്‍ട്ട് ഓഫ് എന്‍ട്രിയില്‍ ബോര്‍ഡര്‍ പ്രൊട്ടക്ഷന്‍ ഓഫീസറായി ജോലി നോക്കവേ രേഖകളൊന്നുമില്ലാത്തവരെ നിയമവിരുദ്ധമായി അമേരിക്കയിലേയ്ക്കു കടക്കാന്‍ അനുമതി നല്‍കിയെന്നും അതിനു പ്രത്യൂപകാരമായി അവരില്‍ നിന്നും കാശും സെക്‌സും കൈപ്പറ്റി എന്നാണ് കേസ്.

ഇപ്രകാരം കള്ളക്കടത്തു സാമഗ്രികളുള്‍പ്പെടെ ഈ രണ്ടു രാജ്യങ്ങള്‍ക്കിടെ കടത്തുന്നതിന് മെക്‌സിക്കന്‍ പൗരന്‍മാരായ മിറിയം ജീവാരെസ്- ഹെമേര എന്ന വനിതയോടും ഗില്‍ബെര്‍ട്ടോ അഗ്വിലാര്‍ മാര്‍ട്ടിനെസ് എന്നയാളുമൊത്ത് ചേര്‍ന്ന് ലൂയിസ് കോട പ്രവര്‍ത്തിച്ചു എന്നതിന് തെളിവുണ്ടെന്ന് പോലീസ് പറഞ്ഞു.

ഫെഡറല്‍ ബ്യൂറോ ഓഫ് ഇന്‍വെസ്റ്റിഗേഷനിലേയും കസ്റ്റംസ് ആന്റ് ബോര്‍ഡര്‍ പ്രൊട്ടക്ഷന്‍ ഓഫീസ് ഓഫ് പ്രൊഫഷണല്‍ റെസ്‌പോണ്‍സിബിലിറ്റിയിലേയും കസ്റ്റംസ് ആന്റ് ബോര്‍ഡര്‍ പ്രൊട്ടക്ഷന്‍ ഫീല്‍ഡ് ഓപ്പറേഷന്‍സിലേയും യുഎസ് ബോര്‍ഡര്‍ പട്രോളിലേയും ഉദ്യോഗസ്ഥരടങ്ങിയ ബോര്‍ഡര്‍ കറപ്ക്ഷന്‍ ടാസ്‌ക് ഫോഴ്‌സിന്റെ ദീര്‍ഘനാളത്തെ സംയുക്ത അന്വേഷണത്തിനൊടുവിലാണ് മൂവരേയും അറസ്റ്റു ചെയ്തത്. കുറ്റങ്ങളെല്ലാം ലൂയിസ് കോട ഉദ്യോഗസ്ഥരോട് സമ്മതിച്ചിട്ടുണ്ട്. 15,000 ഡോളറാണ് ഒരാളിനെ അതിര്‍ത്തി കടത്തി വിടുന്നതിന് കൈപ്പറ്റിയിരുന്നതെന്ന് അയാള്‍ പോലീസിനോടു പറഞ്ഞു.

മെക്‌സിക്കോയില്‍ നിന്നും യുഎസ്സിലേയ്ക്ക് കടക്കാന്‍ ആഗ്രഹിക്കുന്നവരെ കണ്ടെത്തുന്നതും കള്ളക്കടത്തു സാധനങ്ങള്‍ കടത്തിക്കൊണ്ടു വരാന്‍ സമ്മതം പ്രകടിപ്പിക്കുന്നവരെ റിക്രൂട്ട് ചെയ്യുന്നതും മിറിയം ജൂവാരെസ് ഹെരേരയാണ്. ഇവരെ ലൂയിസ് കോടയുടെ പോര്‍ട്ട് ഓഫ് എന്‍ട്രി വരെ എത്തിച്ചു കഴിഞ്ഞാല്‍ പിന്നീട് ലൂയിസ് കോടയുടെ വാഹനത്തിലാണ് അവരെ കൊണ്ടു പോകുന്നത്. ഇപ്രകാരം ചെയ്യുന്നതിന് ഏറ്റവും ഉയര്‍ന്ന തുക അവരില്‍ നിന്നും വാങ്ങിത്തരണമെന്ന് കോട, ജൂവാരെസ് ഹെരേരയുമായി ധാരണയിലെത്തിയിട്ടുണ്ടായിരുന്നു. നിയമവിധേയമായ മാര്‍ഗ്ഗത്തിലൂടെയാണ് അവര്‍ യുഎസ്സില്‍ എത്തിയതെന്ന് തെളിയിക്കുന്ന വ്യാജ രേഖകള്‍ അവര്‍ക്കായി പിന്നീട് കോട ഉണ്ടാക്കി നല്‍കുമായിരുന്നു.

ഇതിനൊക്കെ പ്രതിഫലമായി യുഎസ്സിലേയ്ക്ക് കടക്കാന്‍ ആഗ്രഹിച്ചവരില്‍ നിന്നുള്ള കാശ് കൂടാതെ ജൂവാരസ് ഹെരേര കടത്തി വിടാന്‍ ആഗ്രഹിച്ചവരെ യുഎസ്സിലെത്തിക്കുന്നതിന് പ്രത്യുപകാരമായി അവര്‍ ലൂയിസ് കോടയ്ക്ക് ലൈംഗികമായി വഴങ്ങിക്കൊടുക്കുകയും ചെയ്യാറുണ്ടായിരുന്നത്രേ.

കോടയ്‌ക്കെതിരെ രഹസ്യാന്വേഷണം നടക്കുന്ന വിവരം അറിയാതിരിക്കെ അയാള്‍ക്കു കൈക്കൂലിയായി ലഭിച്ച 44,000-ലധികം ഡോളര്‍ തുക (30 ലക്ഷത്തിനടുത്ത ഇന്ത്യന്‍ രൂപയ്ക്കു തുല്യം) അയാള്‍ തന്റെ അക്കൗണ്ടില്‍ നിക്ഷേപിച്ചത് അയാള്‍ക്കെതിരെയുള്ള ശക്തമായ തെളിവായി. തുടര്‍ന്ന് സെര്‍ച്ച് വാറന്റുമായെത്തിയ ഉദ്യോഗസ്ഥര്‍ അയാളുടെ വീട്ടില്‍ നിന്നും മറ്റൊരു 17,000 ഡോളര്‍ കൂടി കണ്ടെടുത്തു.

യുഎസ്സ് ലീഗല്‍ സിസ്റ്റത്തിലുള്ള പ്ലീ ബാര്‍ഗെയ്ന്‍ എന്ന സംവിധാനത്തില്‍പ്പെടുത്തി വിചാരണയ്ക്കായി കോട സമ്മതിച്ചു. ( പ്രോസിക്യൂട്ടര്‍മാരും, പ്രതിയുമായി എത്തുന്ന ഒരു ധാരണയാണിത്. ഇതില്‍ പ്രതി കുറ്റസമ്മതം നടത്താന്‍ തയ്യാറാണെന്ന് അറിയിയ്ക്കുമ്പോള്‍ കുറഞ്ഞ ശിക്ഷാവിധി ലഭിക്കുന്ന വകുപ്പുകള്‍ ചുമത്താന്‍ ശ്രമിക്കുന്ന രീതിയാണ്.) ഇവിടെ പ്ലീ ബാര്‍ഗെയ്‌നിന്റെ ഭാഗമായി അയാളില്‍ നിന്നു പിടിച്ചെടുത്ത പണമെല്ലാം സര്‍ക്കാരിനു കണ്ടുകെട്ടാമെന്ന് അയാള്‍ സമ്മതിച്ചിട്ടുണ്ട്.