മുത്തലാഖ് ഓര്ഡിനന്സിന് പിന്നില് ബിജെപിയുടെ രാഷ്ട്രീയതാല്പ്പര്യം ; മുസ്ലിം സ്ത്രീകളുടെ ക്ഷേമത്തേക്കാള് പരിഗണന മറ്റു പലതിനും ; പാര്ലമെന്റിനെ മറികടന്നുള്ള ഓര്ഡിനന്സ് ജനാധിപത്യവിരുദ്ധമെന്ന് സിപിഐഎം
മുത്തലാഖ് ഓര്ഡിനന്സ് അംഗീകരിക്കാവുന്നതല്ല എന്നും ബിജെപിയുടെ രാഷ്ട്രീയ താല്പ്പര്യാര്ഥം രൂപപ്പെടുത്തിയതാണ് മുത്തലാഖ് ഓര്ഡിനന്സെന്നും സിപിഐ എം. സിപിഐ എം പൊളിറ്റ്ബ്യൂറോ പ്രസ്താവനയിലാണ് ഇക്കാര്യം പറയുന്നത്. മുത്തലാഖിനെ ക്രിമിനല് കുറ്റകൃത്യമാക്കി മാറ്റിക്കൊണ്ടുള്ള ഓര്ഡിനന്സില് രാഷ്ട്രപതി രാംനാഥ് കോവിന്ദ് ബുധനാഴ്ച രാത്രിയില് ഒപ്പുവച്ചു. രാജ്യസഭയുടെ പരിഗണനയില് വരികയും അടുത്ത സമ്മേളനത്തിലേക്ക് മാറ്റിവയ്ക്കുകയും ചെയ്ത നിയമനിര്മാണ പ്രകിയയെ മറികടന്നാണ് കേന്ദ്രസര്ക്കാര് തിടുക്കത്തില് ഓര്ഡിനന്സിന്റെ വഴി അവലംബിച്ചത്.
പാര്ലമെന്റ് പുതിയ നിയമം കൊണ്ടുവരേണ്ടതുണ്ട്. സര്ക്കാര് കൊണ്ടുവന്ന ഓര്ഡിനന്സ് അനാവശ്യമായ ഒന്നാണ്. മുസ്ലിം സ്ത്രീകളുടെ ക്ഷേമത്തേക്കാള് മറ്റു പല പരിഗണനകളും വച്ചുള്ളതാണ് ഓര്ഡിനന്സ്. മുത്തലാഖ് ബില് നിലവില് രാജ്യസഭയുടെ പരിഗണനയിലാണ്. സെലക്ട് കമ്മിറ്റിക്ക് വിടണമെന്ന അഭിപ്രായമടക്കം വിശദമായ ചര്ച്ച ആവശ്യമാണ്. പാര്ലമെന്റിനെ മറികടന്നുള്ള ഓര്ഡിനന്സ് ജനാധിപത്യവിരുദ്ധമാണ്. മുത്തലാഖ് ചൊല്ലിയുള്ള വിവാഹമോചനം നിയമവിരുദ്ധമാണെന്ന് സുപ്രീംകോടതി വിധിച്ചിട്ടുണ്ട്. ഇപ്പോള് കൊണ്ടുവന്ന നിയമനിര്മാണം ഒരു സിവില് കുറ്റത്തെ മൂന്നുവര്ഷം തടവ് വ്യവസ്ഥ ചെയ്തുള്ള ക്രിമിനല് കുറ്റമായി മാറ്റുകയാണ്. ദുരുദ്ദേശ്യപരമായ ഈ നടപടി ഒരിക്കലും ഇരയാക്കപ്പെട്ട സ്ത്രീയുടെ താല്പ്പര്യങ്ങളെ സംരക്ഷിക്കുന്നതല്ല. തിരുത്തലാവശ്യമായ മറ്റു പല പിശകുകളും ബില്ലിലുണ്ട് എന്ന് പൊളിറ്റ്ബ്യൂറോ പ്രസ്താവനയില് പറഞ്ഞു.
https://www.facebook.com/Malayalivartha