തൃശൂരില്‍ ചന്ദ്രബോസ് വധക്കേസില്‍ ശിക്ഷിയ്ക്കപ്പെട്ട മുഹമ്മദ് നിഷാമിന് മൂന്ന് പകല്‍ മാതാവിനൊപ്പം കഴിയാന്‍ ഉപാധികളോടെ ഹൈക്കോടതി അനുമതി നല്‍കി. മാതാവിനെ കാണാന്‍ നിഷാമിന് പരോള്‍ അനുവദിയ്ക്കണമെന്ന് ആവശ്യപ്പെട്ട് നിഷാമിന്റെ ഭാര്യ അമല്‍ നിഷാം നല്‍കിയ ഹര്‍ജിയിലാണ് ഹൈക്കോടതി അനുമതി നല്‍കിയത്. ജനുവരി 21 മുതല്‍ 23 വരെ മൂന്ന് ദിവസം പകല്‍ പൊലീസ് അകമ്പടിയോടെ കലൂരിലെ സ്‌കൈലൈന്‍ ടോപാസ് സമുച്ചയത്തിലെത്തി മാതാവിനൊപ്പം സമയം ചെലവഴിക്കാനാണ് ജസ്റ്റിസ് എബ്രഹാം മാത്യു അനുമതി നല്‍കിയത്. യാത്രയിലോ മാതാവിനൊപ്പമുള്ള സമയത്തോ മറ്റുള്ളവരെ കാണാനോ സംസാരിക്കാനോ പാടില്ല. ചികിത്സയില്‍ കഴിയുന്ന മാതാവിനെ ശുശ്രൂഷിക്കാന്‍ ഒരാഴ്ച പരോള്‍ ആവശ്യപ്പെട്ട് ഭാര്യ അമല്‍ നിഷാം ആണ് ഹരജി നല്‍കിയത്.


വിവിധ രോഗങ്ങളാല്‍ അവശതയിലാണ് 70കാരിയായ മാതാവെന്ന് ഹരജിയില്‍ പറയുന്നു. തിരുവനന്തപുരം സെന്‍ട്രല്‍ ജയിലില്‍ നിഷാമിനെ കാണാനെത്തിയ മാതാവ് അവിടെ ബോധരഹിതയാവുകയും തിരുവനന്തപുരം ഗവ. ആശുപത്രിയില്‍ ചികിത്സയിലുമായിരുന്നു. ഇപ്പോള്‍ അത്യാസന്ന നിലയില്‍ കൊച്ചിയിലെ ഫ്‌ലാറ്റിലാണ്. മകനെ കാണണമെന്ന ആഗ്രഹം പ്രകടിപ്പിക്കുന്നുണ്ട്. ഈ സാഹചര്യത്തില്‍ ഒരാഴ്ച പരോള്‍ ആയിരുന്നു ആവശ്യം. എന്നാല്‍, പരോള്‍ അനുവദിക്കാന്‍ കഴിയില്ലെന്ന് ജയില്‍ സൂപ്രണ്ട് എം.കെ. വിനോദ് കുമാര്‍ കോടതിയെ അറിയിച്ചു. കൊലക്കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന നിഷാമിനെതിരെ ഒമ്പത് ക്രിമിനല്‍ കേസുകളുണ്ട്.

കണ്ണൂര്‍ ജയിലിലായിരിക്കെ സഹോദരനെയടക്കം ഭീഷണിപ്പെടുത്തിയതായി പരാതിയുണ്ട്. തുടര്‍ന്നാണ് തിരുവനന്തപുരം സെന്‍ട്രല്‍ ജയിലിലേക്ക് മാറ്റിയത്. നിഷാമിനെ പരോളില്‍ വിടുന്നത് ക്രമസമാധാന പ്രശ്‌നത്തിന് കാരണമായേക്കും. പരോള്‍ സംബന്ധിച്ച് സഹോദരന്റെ അപേക്ഷ ലഭിച്ചതിനെ തുടര്‍ന്ന് പൊലീസ് റിപ്പോര്‍ട്ട് തേടിയിരുന്നു. പരോളിന് അനുകൂലമല്ലാത്ത റിപ്പോര്‍ട്ടാണ് ലഭിച്ചത്. പരോള്‍ അനുവദിച്ചാല്‍ ഇതേ ആവശ്യമുന്നയിച്ച് തടവുപുള്ളികള്‍ എത്തും. അതിനാല്‍ പരോള്‍ അനുവദിക്കരുത് സൂപ്രണ്ട് ആവശ്യപ്പെട്ടു.

സൂപ്രണ്ടിന്റെ വാദം അംഗീകരിച്ച കോടതി പരോള്‍ തള്ളി. തുടര്‍ന്നാണ് മൂന്ന് പകല്‍ അനുവദിച്ചത്. 20ന് തിരുവനന്തപുരത്തു നിന്ന് എറണാകുളം സബ് ജയിലില്‍ എത്തിച്ച് പിറ്റേന്ന് രാവിലെ ഒമ്പതിന് മാതാവിനടുത്തേക്ക് പൊലീസ് അകമ്പടിയില്‍ കൊണ്ടുപോകണം. വൈകുന്നേരം അഞ്ചിന് ശേഷം ജയിലില്‍ എത്തിക്കണം. അടുത്ത രണ്ട് ദിവസവും ഇത് തുടരണം. പിന്നീട് തിരുവനന്തപുരം സെന്‍ട്രല്‍ ജയിലിലേക്ക് കൊണ്ടു പോകണം. 2015 ജനുവരി 29ന് അറസ്റ്റിലായ നിഷാമിനെ 2016 ജനുവരിയിലാണ് ശിക്ഷിച്ചത്. നാല് വര്‍ഷമായി ജയിലിലാണ്.

ചന്ദ്രബോസിനെ വാഹനം കയറ്റിക്കൊന്ന കേസിലെ പ്രതി മുഹമ്മദ് നിഷാമിന്റെ ജയില്‍ മോചനം ആവശ്യപ്പെട്ട് ജന്മനാടായ മുറ്റിച്ചൂരില്‍ പൊതുയോഗം വരെ സംഘടിപ്പിച്ചിരുന്നു. യാദൃചികമായി നടന്ന കൊലപാതകത്തെ മാധ്യമങ്ങള്‍ പെരുപ്പിച്ച് കാണിച്ചതാണെന്നും കാരുണ്യവാനും കലാകായിക സ്‌നേഹിയുമായ നിഷാം ജയിലില്‍ നിന്ന് പുറത്തു വരേണ്ടതുണ്ടെന്നും പൊതുയോഗത്തെ സൂചിപ്പിച്ചായിരുന്നു നോട്ടീസ് ഇറക്കിയതും യോഗം സംഘടിപ്പിച്ചിരുന്നതും. ജയിലിനകത്ത് കിടന്നാല്‍ ആയിരക്കണക്കിന് കുടുംബം അനാഥമാവുമെന്നും നോട്ടീസിലുണ്ടായിരുന്നു.