സഭയ്ക്കെതിരെ തിരിഞ്ഞ സിസ്റ്റര് ലൂസി കളപ്പുരയ്ക്കല് ഫെബ്രുവരി ആറിനകം വിശദീകരണം നല്കിയില്ലെങ്കില് കാനോന് നിയമപ്രകാരം നടപടിയെടുക്കുമെന്ന് നോട്ടീസ്, വിരട്ടണ്ട മറുപടി നല്കാമെന്ന് സിസ്റ്റര്
ബിഷപ്പ് ഫ്രാങ്കോയ്ക്കെതിരെ കന്യാസ്ത്രീകള് നടത്തിയ സമരത്തിന് പിന്തുണ നല്കുകയും സഭയ്ക്കെതിരെ മാധ്യമങ്ങള്ക്ക് അഭിമുഖം നല്കുകയും സഭാവസ്ത്രം ധരിക്കാതെ ഫെയിസ്ബുക്കില് ഫോട്ടോ ഇടുകയും ചെയ്തതിന് സിസ്റ്റര് ലൂസി കളപ്പുരയ്ക്കല് വിശദീകരണം നല്കണമെന്ന് സഭാ നേതൃത്വം ആവശ്യപ്പെട്ടു. ഫെബ്രുവരി ആറിനകം വിശദീകരണം നല്കിയില്ലെങ്കില് കാനോന് നിയമപ്രകാരം നടപടിയെടുക്കുമെന്നും നോട്ടീസില് പറയുന്നു. നോട്ടീസിന് മറുപടി നല്കുമെന്ന് സിസ്റ്റര് അറിയിച്ചു. സാങ്കേതികവിദ്യ ഇത്രയും വളര്ന്ന കാലത്ത് ചാനല് ചര്ച്ചകളില് പങ്കെടുക്കരുതെന്നും അഭിമുഖം നല്കരുതെന്നും പറയുന്നത് തെറ്റാണ്. അഥവാ നല്കണമെങ്കില് രൂപതയുടെ അനുമതി വേണമെന്ന സീറോമലബാര് സഭ സിനഡ് തീരുമാനം ശരിയല്ലെന്നും സിസ്റ്റര് ലൂസി പറഞ്ഞു.
വിരല്ത്തുമ്പില് സോഷ്യല്മീഡിയയ അടക്കം ഉള്ളപ്പോള് മാധ്യമങ്ങളുടെയും ചാനലുകളുടെയും ആവശ്യം തന്നെ ഇല്ലാതായിരിക്കുകയാണെന്നും സിസ്റ്റര് ലൂസി വ്യക്തമാക്കി. ബിഷപ്പ് ഫ്രാങ്കോയ്ക്കെതിരെ കന്യാസ്ത്രീകള് നടത്തിയ സമരത്തിന് പിന്തുണ പ്രഖ്യാപിച്ച സിസ്റ്റര് ലൂസിയെ സഭാ കര്മങ്ങളില് നിന്ന് വയനാട് രൂപതമാറ്റിയിരുന്നു. എന്നാല് വിശ്വാസികള് അവര്ക്കൊപ്പം നിന്നതിനാല് സഭ നിലപാട് മാറ്റുകയായിരുന്നു. ജനുവരി പത്തിന് ഇത്തരത്തിലൊരു നോട്ടീസ് ആദ്യം നല്കിയിരുന്നു. 'ഇതൊരു പ്രതികാര നടപടിയാണ് . എങ്ങനെയെങ്കിലും ഒന്ന് ഒഴിവായി കിട്ടണം എന്നേയുള്ളൂ അവര്ക്ക്,'എന്ന് സിസ്റ്റര് ലൂസി അന്ന് വ്യക്തമാക്കിയിരുന്നു.
'ഞാന് സമരത്തില് പങ്കെടുത്തു, നോണ് ക്രിസ്ത്യന് മാധ്യമങ്ങളില് ലേഖനങ്ങള് എഴുതി, ചാനലില് സംസാരിച്ചു, ഫെയ്സ്ബുക്ക് ഉള്പ്പെടെയുള്ള മാധ്യമങ്ങളില് സമരം ചെയ്യുന്ന കന്യാസ്ത്രീകളെ അനൂകുലിച്ച് സംസാരിച്ചതും കത്തോലിക്ക സഭയ്ക്ക് വലിയ അപമാനമായി എന്ന് ചൂണ്ടിക്കാട്ടിയാണ് നോട്ടീസ് തന്നത്. പിന്നെ ഞാന് പുസ്തകം പ്രസിദ്ധീകരിച്ചു, കാര് വാങ്ങി എന്നിങ്ങനെയുള്ള കാര്യങ്ങളാണ് പറഞ്ഞിരിക്കുന്നത്. അതൊന്നും ഒരു തെറ്റായിട്ടെനിക്ക് ഇതുവരെ തോന്നിയിട്ടില്ല. തോന്നിയാല് ഞാന് ചെയ്യുകയുമില്ല. ശരിയെന്ന് ഉറച്ച ബോധ്യമുള്ളതുകൊണ്ടാണ് ചെയ്തത്. അതിന് ഒരു വിശദീകരണവും കൊടുക്കാനില്ല. വരുന്നിടത്തുവച്ച് കാണാം,' - എന്ന് പറഞ്ഞ സിസ്റ്റര് ലൂസി കളപ്പുര ഇപ്പോള് നിലപാട് മാറ്റുകയായിരുന്നു.
ലിംഗസമത്വത്തിന് വേണ്ടിയും ലിംഗവിവേചനത്തിന് എതിരെയും സംഘടിപ്പിച്ച വനിതാ മതിലിന് പിന്തുണ അറിയിച്ച്, ചുരിദാര് ധരിച്ച് സിസ്റ്റര് വാര്ത്തകളില് ഇടം നേടിയതും സഭയെ ചൊടിപ്പിച്ചിരുന്നു. കന്യാസ്ത്രീയെ പീഡിപ്പിച്ച കേസില് ഫ്രാങ്കോ മുളയ്ക്കലിന്റെ അറസ്റ്റ് വൈകുന്നതില് പ്രതിഷേധിച്ച സമരം നടത്തിയവരില് പ്രധാനിയായിരുന്നു ലൂസി കളപ്പുര. ഇതിന് പിന്നാലെ സിസ്റ്റര് നടത്തിയ പല വെളിപ്പെടുത്തലുകളും വന് ചര്ച്ചകള്ക്ക് വഴി വച്ചിരുന്നു.
വയനാട്ടിലെ വിമല ഹോമിലാണ് സിസ്റ്റര് ലൂസി കളപ്പുര താമസിക്കുന്നത്. കാലഘട്ടത്തിന് അനുസരിച്ച് സഭയില് മാറ്റം വന്നിട്ടുണ്ടെന്നും പുരോഹിതര്ക്ക് ബ്രഹ്മചര്യം വേണ്ടെന്ന കത്തോലിക്കാ സഭ മുഖപത്രത്തിലെട ലേഖനത്തിലെ വാദം വിചിത്രമാണെന്ന് സിസ്റ്റര് മുമ്പ് ആരോപിച്ചിരുന്നു. പലരും ബ്രഹ്മചര്യം പാലിക്കുന്നില്ല എന്നതാണ് വസ്തുത. ബ്രഹ്മചര്യം വേണ്ടെന്ന് പറയുന്നവരുടെ മുമ്പിലേക്ക് കന്യാസ്ത്രീകളെ ഇട്ടുകൊടുക്കണമെന്നാണോ എന്നും ചോദിച്ചിരുന്നു. ബ്രഹ്മചര്യം വേണ്ടാത്ത വൈദികര് വിവാഹം കഴിക്കട്ടെയെന്നും സിസ്റ്റര് ലൂസി ആവശ്യപ്പെട്ടിരുന്നു.
https://www.facebook.com/Malayalivartha
