ജോലിയില് നിന്ന് പിരിച്ചുവിട്ട എം.പാനല് കണ്ടക്ടര്മാരുടെ കാര്യം സര്ക്കാര് അനുഭാവപൂര്വ്വം പരിഗണിക്കാത്തതിനെ തുടര്ന്ന് വീണ്ടും ആത്മഹത്യാഭീഷണിയുമായി മരത്തില് കയറി
ജോലിയില് നിന്ന് പിരിച്ചുവിട്ട എം.പാനല് കണ്ടക്ടര്മാരുടെ കാര്യം സര്ക്കാര് അനുഭാവപൂര്വ്വം പരിഗണിക്കാത്തതിനെ തുടര്ന്ന് വീണ്ടും ആത്മഹത്യാഭീഷണിയുമായി മരത്തില് കയറി. സെക്രട്ടറിയേറ്റിന് മുന്നിലെ മരത്തില് സമരക്കാര് കയറാതിരിക്കാന് കാവല് ഏര്പ്പെടുത്തിയതോടെ സെന്ട്രല് സ്റ്റേഡിയത്തിലെ മരത്തില് കയറിയാണ് ആത്മഹത്യാഭീഷണി മുഴക്കിയത്. ഇതില് രണ്ട് പേരെ താഴെയിറക്കി. രണ്ടു പേര് ഇപ്പോഴും മരത്തിനു മുകളില് ഇരിക്കുകയാണ്. താഴെയിറക്കാനുള്ള ശ്രമത്തെ ചെറുക്കുകയാണിവര്. പിരിട്ടുവിട്ട മുഴുവന് എംപാനല് ജീവനക്കാരെയും തിരിച്ചെടുക്കണമെന്നാവശ്യപ്പെട്ടാണ് കണ്ടക്ടര്മാര് സമരം നടത്തുന്നത്.
മുമ്പ് സമരക്കാരില് ഒരു സ്ത്രീ സെക്രട്ടറിയേറ്റിന് മുന്നിലെ മരത്തില് കയറി ആത്മഹത്യാ ഭീഷണി മുഴക്കിയിരുന്നു. ഫയര്ഫോഴ്സ് ഇവരെ താഴെയിറക്കി ആശുപത്രിയിലെത്തിച്ചിരുന്നു. ആറ്റുകാല് പൊങ്കാലയ്ക്ക് മുന്നോടിയായി ഇവരുടെ പന്തല് നഗരസഭാ അധികൃതരുടെ നിര്ദ്ദേശത്തെ തുടര്ന്ന് പൊലീസ് പൊളിച്ചുനീക്കിയിരുന്നു. അതിനെതിരെ കണ്ടക്ടര്മാര് രംഗത്തെത്തിയിരുന്നു. പൊളിച്ച പന്തല് കഴിഞ്ഞ ദിവസം ഇവര് പുനസ്ഥാപിച്ചു. അതേസമയം സമരത്തിന് എത്തിയവരുടെ എണ്ണം കുറഞ്ഞു എന്നത് ശ്രദ്ധേയമാണ്. എം.പാനലുകാര് സമരം ആരംഭിച്ചിട്ട് ഒരു മാസത്തിലധികമായി. ട്രാന്സ്പോര്ട്ട് മന്ത്രി എ.കെ ശശീന്ദ്രന് ചര്ച്ചയ്ക്ക് വിളിച്ചതല്ലാതെ കാര്യമായി ഒന്നും നടന്നില്ല.
ഹൈക്കോടതി ഉത്തരവ് പ്രകാരമാണ് നാലായിരത്തോളം എം.പാനലുകാരെ കെ.എസ്.ആര്.ടി.സി പിരിച്ചുവിട്ടത്. അതിനെതിരെ ഇവര് ഹൈക്കോടതിയെ സമീപിച്ചെങ്കിലും അനുകൂല ഉത്തരവുണ്ടായില്ല. പി.എസ്.സിയില് നിന്ന് മാത്രം ഉദ്യോഗാര്ത്ഥികളെ എടുത്താല് മതിയെന്നും നിര്ദ്ദേശം നല്കി. എം.ഡിയായിരുന്ന ടോമിന് ജെ. തച്ചങ്കരി കോടതിയില് നല്കിയ കത്തിന്റെ അടിസ്ഥാനത്തിലാണ് എം.പാലുകാരെ പിരിച്ചുവിട്ടത്. 10 വര്ഷം പൂര്ത്തിയായവരെ സ്ഥിരപ്പെടുത്തണമെന്ന ആവശ്യം പോലും പരിഗണിച്ചിട്ടില്ല. കഴിഞ്ഞ യു.ഡി.എഫ് സര്ക്കാരിന്റെ കാലത്ത് 10 വര്ഷം പിന്നിട്ടവരെ സ്ഥിരപ്പെടുത്തിയിരുന്നു. ഏകദേശം നാലായിരത്തോളം പേരുണ്ടായിരുന്നു.
ദിവസ വേതന അടിസ്ഥാനത്തില് നിയമിക്കുന്നവരെ ആറ് മാസത്തിന് ശേഷം പിരിച്ച് വിടണമെന്നാണ് നിയമം. എംപ്ലോയിമെന്റ് വഴി നിയമനം കിട്ടിയ എം.പാനലുകാരെ ആറ് മാസം കഴിഞ്ഞിട്ടും കെ.എസ്.ആര്.ടി.സി പിരിച്ചുവിട്ടിരുന്നില്ല. അതോടെ എന്നെങ്കിലും സ്ഥിരപ്പെടുത്തുമെന്ന വിശ്വാസത്തില് ജോലിയില് തുടരുകയായിരുന്നു ഇവര്. പലര്ക്കും മറ്റ് ജോലിയോ, വരുമാനമോ ഇല്ലാത്തവരാണ്. അതിനാല് ജീവിതോപാധിയായ ജോലി എങ്ങനെയും തിരികെ ലഭിക്കണമെന്ന് ആവശ്യപ്പെട്ടാണ് നാലായിരത്തോളം എം.പാനലുകാര് സെക്രട്ടറിയേറ്റിന് മുന്നില് അനിശ്ചിതകാല സമരം നടത്തുന്നത്. ജനങ്ങളില് നിന്ന് പിരിവെടുത്താണ് ഇവര് ചെലവുകള്ക്കുള്ള വക കണ്ടെത്തുന്നത്.
https://www.facebook.com/Malayalivartha
