ഡോക്ടര്‍ സുന്ദരിയെ കളത്തിലിറക്കി കോട്ടയം തിരിച്ചുപിടിക്കാനുള്ള നീക്കം സി.പി.എം ഉപേക്ഷിച്ചു, മത്സരിക്കാന്‍ താല്‍പര്യമില്ലെന്ന് പറഞ്ഞ് മാറിനിന്ന ജില്ലാ സെക്രട്ടറി വി.എന്‍ വാസവനെ കളത്തിലിറക്കി. കോട്ടയം പാര്‍ലമെന്റ് കമ്മിറ്റിയാണ് ഇക്കാര്യത്തില്‍ അന്തിമതീരുമാനം എടുത്തത്. വിവരം സംസ്ഥാന സെക്രട്ടറിയേറ്റിനെ അറിയിച്ചു. വെള്ളിയാഴ്ച ചേരുന്ന സംസ്ഥാന സമിതി അന്തിമതീരുമാനം എടുക്കും. ഡോ. സിന്ധുമോള്‍ ജേക്കബ് സി.പി.എം പ്രവര്‍ത്തകയും ഉഴവൂര്‍ പഞ്ചായത്ത് അംഗവുമാണ്. കഴിഞ്ഞ ജില്ലാ സമ്മേളന പ്രതിനിധിയായിരുന്നു. വനിതാ സ്ഥാനാര്‍ത്ഥിയെ നിര്‍ത്തി യു.ഡി.എഫിന് കനത്ത വെല്ലുവിളി ഉയര്‍ത്തുകയായിരുന്നു ലക്ഷ്യം. എന്നാല്‍ സിന്ധുമോളേക്കാള്‍ വിജയസാധ്യത വാസവനാണെന്ന നിഗമനത്തില്‍ പാര്‍ട്ടി എത്തുകയായിരുന്നു. 

കഴിഞ്ഞതവണ ജനതാദളിനാണ് സീറ്റ് നല്‍കിയത്. മാത്യു ടി.തോമസ് മത്സരിച്ച് പരാജയപ്പെട്ടു. ഇത്തവ വിജയസാധ്യതയുണ്ടെന്ന് മുന്‍കൂട്ടി കണ്ടാണ് കോട്ടയം സീറ്റ് സി.പി.എം ഏറ്റെടുത്തത്. യു.ഡി.എഫിനേക്കാള്‍ 12 ലക്ഷത്തോളം വോട്ടിന്റെ കുറവുണ്ടായിരുന്നു എല്‍.എഡി.എഫിന്. എന്നാല്‍ പാര്‍ട്ടി സ്ഥാനാര്‍ത്ഥിയാകുമ്പോള്‍ പ്രവര്‍ത്തകരിലും അണികളിലും ആവേശം കൂടുമെന്നാണ് പാര്‍ട്ടി വിലയിരുത്തുന്നത്. കേരളാ കോണ്‍ഗ്രസിന്റെ സീറ്റാണെങ്കിലും കോട്ടയത്തെ കോണ്‍ഗ്രസുകാരും കേരളാ കോണ്‍ഗ്രസും അത്ര രസത്തിലല്ലെന്നാണ് സി.പി.എം പാര്‍ലമെന്റ് കമ്മിറ്റി പറയുന്നത്. അതിനെ മുതലെടുക്കാനാവും. കോണ്‍ഗ്രസ് വോട്ട് വാങ്ങി വിജയിച്ച കേരളാ കോണ്‍ഗ്രസ് യു.ഡി.എഫ് വിട്ട് എല്‍.ഡി.എഫ് പാളയത്തില്‍ ചേക്കേറാന്‍ ശ്രമിച്ചിരുന്നു. 

കോട്ടയത്തെ പല പഞ്ചായത്തുകളിലും കേരളാ കോണ്‍ഗ്രസ് കോണ്‍ഗ്രസിനും തിരിച്ചുമുള്ള പിന്തുണകള്‍ പിന്‍വലിച്ചിരുന്നു. അന്ന് തുടങ്ങിയ പോരിന്റെ അലയൊലികള്‍ കേരളാ കോണ്‍ഗ്രസ് യു.ഡി.എഫിലെത്തിയിട്ടും അവസാനിച്ചിട്ടില്ലെന്നാണ് സി.പി.എം കരുതുന്നത്. കോട്ടയത്ത് കേരളാ കോണ്‍ഗ്രസ് ശക്തിപ്പെടുന്നത് കോണ്‍ഗ്രസിന് വലിയ തിരിച്ചടിയാണ്. അതിനാല്‍ കേരളാ കോണ്‍ഗ്രസ് സ്ഥാനാര്‍ത്ഥിയെ പരാജയപ്പെടുത്താന്‍ കോണ്‍ഗ്രസ് കാലുവാരുമെന്ന് സി.പി.എം കരുതുന്നു. ഇതെല്ലാം കണക്ക്കൂട്ടിയാണ് ജില്ലാ സെക്രട്ടറിയെ തന്നെ അക്ഷരനഗരിയില്‍ അങ്കത്തിനിറക്കാന്‍ തീരുമാനിച്ചത്. കോട്ടയം ലോക്‌സഭാ സീറ്റില്‍ എല്‍.ഡി.എഫ് വിജയിച്ചിട്ട് ഏറെക്കാലമായി. അത് ഇക്കുറി തിരുത്തിയെഴുതുകയാണ് ലക്ഷ്യം. 

എന്‍.എസ്.എസിന് ഏറെ സ്വാധീനമുള്ള മണ്ഡലം കൂടിയാണ് കോട്ടയം. അതിനാലാണ് സുകുമാരന്‍ നായര്‍ അടക്കമുള്ള എന്‍.എസ്.എസ് നേതാക്കളുമായി അടുത്തബന്ധമുള്ള വാസവനെ മത്സരിപ്പിക്കാന്‍ തീരുമാനിച്ചത്. ക്രിസ്ത്യന്‍ വോട്ട് ഭൂരിപക്ഷമുള്ള മണ്ഡലത്തില്‍ ഹിന്ദു സ്ഥാനാര്‍ത്ഥിയെ നിര്‍ത്തുന്നത് നേട്ടമാകും എന്ന ആത്മവിശ്വാസവും സി.പി.എമ്മിനുണ്ട്. ആകെയുള്ള ഏഴ് നിയമസഭാ മണ്ഡലങ്ങളില്‍ ഏറ്റുമാനൂരും വൈക്കവും മാത്രമാണ് എല്‍.ഡി.എഫിനൊപ്പമുള്ളത്. പിറവം, പാലാ, കടുത്തുരുത്തി, കോട്ടയം, പുതുപ്പള്ളി മണ്ഡലങ്ങള്‍ യു.ഡി.എഫിനൊപ്പമാണ്. കോട്ടയവും പുതുപ്പള്ളിയും മാത്രമാണ് കോണ്‍ഗ്രസിനുള്ളത്. ബാക്കിയുള്ള മൂന്ന് മണ്ഡലങ്ങള്‍ കേരളാ കോണ്‍ഗ്രസുകളുടെ കയ്യിലാണ്. പിറവം എം.എല്‍.എ അനൂപ് ജേക്കബും പാര്‍ട്ടിയും ലോക്‌സഭാ സീറ്റ് ചോദിച്ച് ഇടഞ്ഞ് നില്‍ക്കുകയാണ്. അതിനാല്‍ എന്തൊക്കെ സംഭവിക്കുമെന്ന് പ്രവചിക്കാനാകില്ല.