കെ.ടി ജലീലിനെതിരെ യൂത്ത് ലീഗ് നേതാവ് പി.ജെ. ഫിറോസും മുസ്്‌ലിംലീഗും ഉയര്‍ത്തിക്കൊണ്ട് വന്ന ബന്ധുനിയമനം ഐസ്‌ക്രീം പാര്‍ലര്‍കേസില്‍ അലിഞ്ഞ് പോയെന്ന് ആക്ഷേപം. വി.എസുമായി ഇപ്പോഴും അടുപ്പമുള്ള ചില സി.പി.എം നേതാക്കളാണ് ഇക്കാര്യം ആരോപിക്കുന്നത്. പി.കെ കുഞ്ഞാലിക്കുട്ടിയും കോടിയേരി ബാലകൃഷ്ണനും ഇക്കാര്യത്തില്‍ ഒത്തുതീര്‍പ്പിലെത്തിയെന്നാണ് സൂചന. ജലീലിനെതിരായ കുരുക്കുമായി ഫിറോസിനെ കളത്തിലിറക്കിവിട്ടത് കുഞ്ഞാലിക്കുട്ടിയാണെന്ന് എല്ലാവര്‍ക്കുമറിയാം. കളം മൂത്തപ്പോള്‍ സി.പി.എം ഒത്തുതീര്‍പ്പിന് തയ്യാറാവുകയായിരുന്നു. ഇതിനോട് യൂത്ത് ലീഗ് നേതൃത്വത്തിന് അത്ര താല്‍പര്യമില്ലെന്നാണ് പുറത്തുവരുന്ന വിവരം. യൂത്ത് ലീഗിന്റെ വാട്‌സാപ്പ് ഗ്രൂപ്പുകളില്‍ ഇത് സംബന്ധിച്ച് ചൂടേറിയ ചര്‍ച്ചകളും വാഗ്‌വാദങ്ങളും നടക്കുന്നുണ്ട്. 

ജലീലിന്റെ ബന്ധുനിയമനത്തിന് പിന്നാലെ കോലിയക്കോട് കൃഷ്ണന്‍നായരുടെ അനുജന്റെ മകന്റെയും മന്ത്രി എ.കെ ബാലന്റെ സ്റ്റാഫിലെ അനധികൃത നിയമനവും പി.കെ ഫിറോസ് പുറത്ത് കൊണ്ടുവന്നിരുന്നു. കൃഷ്ണന്‍ നായരുടെ അനുജന്റെ മകനെ നിയമിക്കരുതെന്ന് കാട്ടി സി.പി.എം എം.എല്‍.എ സണ്ണി ജോസഫ് നല്‍കിയ കത്തും ഫിറോസ് പുറത്ത് കൊണ്ടുവന്നിരുന്നു. തുടര്‍ന്ന് ഫിറോസിനെതിരെ കേസ് എടുത്തതല്ലാതെ യാതൊരു നടപടിയും സര്‍ക്കാര്‍ സ്വീകരിച്ചിട്ടില്ല. അതിന് പിന്നാലെയാണ് ഐസ്‌ക്രീംകേസ് റദ്ദാക്കണമെന്ന് സര്‍ക്കാര്‍ ഹൈക്കോടതിയില്‍ ആവശ്യപ്പെട്ടത്. മുതിര്‍ന്ന സി.പി.എം നേതാവ് വി.എസ് അച്യുതാനന്ദന്റെ ആവശ്യത്തെ മറികടന്നാണ് സര്‍ക്കാര്‍ ഈ നിലപാട് എടുത്തത് എന്നതും ശ്രദ്ധേയമാണ്. 

ഐസ്‌ക്രീംപാര്‍ലര്‍ കേസ് അന്വേഷണം അവസാനിപ്പിക്കാനുള്ള പൊലീസ് റിപ്പോര്‍ട്ട് കീഴ്‌ക്കോടതി സ്വീകരിച്ചതിനെതിരെയാണ് വി.എസ് കോടതിയെ സമീപിച്ചത്. 2011ലെ നിയമസഭാ തെരഞ്ഞെടുപ്പില്‍ യു.ഡി.എഫിന്റെ ഭൂരിപക്ഷം രണ്ട് എം.എല്‍.എമാരില്‍ ഒതുങ്ങാന്‍ കാരണം വി.എസ് ഐസ്‌ക്രീം പാര്‍ലര്‍കേസ് കുത്തിപ്പൊക്കി കൊണ്ടുവന്നത് കൊണ്ടാണ്. കുഞ്ഞാലിക്കുട്ടിക്കെതിരെ അന്നത്തെ എ.ഡി.ജി.പി വിന്‍സന്റ് എം.പോളിന്റെ നേതൃത്വത്തിലായിരുന്നു അന്വേഷണം നടന്നത്. അതിനാല്‍ ഈ കേസ് തന്റെ ഇമേജ് നിലനിര്‍ത്താന്‍ സഹായിക്കുമെന്ന് വി.എസിന് നന്നായി അറിയാം. ലോക്‌സഭാ തെരഞ്ഞെടുപ്പിലും എല്‍.ഡി.എഫിന് അതെടുത്ത് അലക്കാമായിരുന്നു. എന്നാല്‍ മന്ത്രിമാര്‍ നടത്തിയ അനധികൃത നിയമനത്തിനെതിരെ യൂത്ത് ലീഗ് കോടതിയെ സമീപിച്ചാല്‍ കാര്യങ്ങള്‍ കൈവിട്ടുപോകുന്ന് സി.പിഎമ്മിനറായാം.

ഐസ്‌ക്രീംകേസില്‍ വി.എസിന്റെ ഹര്‍ജി തള്ളണമെന്ന് പിണറായി സര്‍ക്കാര്‍ ഹൈക്കോടതിയില്‍ ആവശ്യപ്പെട്ടതിന് തൊട്ട് പിന്നാലെ, ബന്ധുനിയമനത്തിലെ വിജിലന്‍സ് കേസ് അന്വേഷണം എന്തായെന്ന് പി.കെ കുഞ്ഞാലിക്കുട്ടിയോട് മാധ്യമങ്ങള്‍ ചോദിച്ചിരുന്നു. അതൊക്കെ യൂത്ത് ലീഗ് ചോദിക്കും എന്ന് പറഞ്ഞ് അദ്ദേഹം തടിതപ്പി. അത് ഉദ്ദിഷ്ടകാര്യത്തിന് ഉപകാരസ്മരണയാണെന്ന് യൂത്ത് ലീഗിലെ ഒരു വിഭാഗം അന്നേ ആരോപിച്ചിരുന്നു. ബന്ധുനിയമന വിവാദവുമായി ഇനി പി.കെ ഫിറോസ് രംഗത്തിറങ്ങില്ലെന്നാണ് സി.പി.എമ്മിന് കിട്ടിയിരിക്കുന്ന ഉറപ്പെന്ന് അറിയുന്നു.