സംസ്ഥാനത്ത് ഒമ്പത് ജില്ലകളില് വിദ്യാഭ്യാസ സ്ഥാപനങ്ങള്ക്ക് ഇന്ന് അവധി... കേരള, മഹാത്മാഗാന്ധി സര്വകലാശാലകള് ചൊവ്വാഴ്ച നടത്താനിരുന്ന എല്ലാ പരീക്ഷകളും മാറ്റിവച്ചു
സംസ്ഥാനത്ത് മഴക്ക് ശമനമുണ്ടെങ്കിലും മിക്കയിടത്തും വെള്ളക്കെട്ട് നിലനില്ക്കുന്നതിനാല് കണ്ണൂര്, കോഴിക്കോട്, വയനാട്, മലപ്പുറം, തൃശൂര്, എറണാകുളം, ആലപ്പുഴ, കോട്ടയം, പത്തനംതിട്ട ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ചൊവ്വാഴ്ച ജില്ല കലക്ടര്മാര് അവധി പ്രഖ്യാപിച്ചു. കാസര്കോട് ജില്ലയില് ദുരിതാശ്വാസ ക്യാമ്പ് പ്രവര്ത്തിക്കുന്ന സ്കൂളുകള്ക്കും നാളെ അവധിയാണ്. കോഴിക്കോട് ജില്ലയില് പ്രഫഷണല് കോളജുകള് ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും ചൊവ്വാഴ്ച അവധിയാണ്. കേന്ദ്രീയ വിദ്യാലയങ്ങള്ക്കും അങ്കണവാടികള്ക്കും മദ്രസകള്ക്കും അവധി ബാധകമായിരിക്കും. മഴ കുറവുണ്ടെങ്കിലും ജില്ലയില് മിക്കയിടങ്ങളിലും വെള്ളക്കെട്ട് നിലനില്ക്കുന്നതും ചില വിദ്യാഭ്യാസ സ്ഥാപനങ്ങളില് ക്യാമ്പുകള് പ്രവര്ത്തിക്കുന്നതും പരിഗണിച്ചാണ് അവധി.
തുടര്ച്ചയായി മഴപെയ്ത സാഹചര്യത്തില് വിദ്യാഭ്യാസ സ്ഥാപനങ്ങളുടെ കെട്ടിടത്തിന്റെ സുരക്ഷിതത്വം പരിശോധിക്കാനും ജില്ല കലക്ടര് നിര്ദേശം നല്കി.എല്.എസ്.ജി.ഡി അസിസ്റ്റന്റ് എന്ജിനീയറും ഓവര്സിയറും സ്കൂളുകള് കെട്ടിടങ്ങളുടെ സുരക്ഷ പരിശോധിച്ച് അതാത് പഞ്ചായത്ത് സെക്രട്ടറിക്കും സബ് ഡിവിഷണല് മജിസ്ട്രേറ്റിനും റിപ്പോര്ട്ട് നല്കണമെന്നും ജില്ലാ കലക്ടര് പറഞ്ഞു.
നഗരസഭകളിലെ സ്കൂള് കെട്ടിടങ്ങളുടെ സുരക്ഷ സംബന്ധിച്ച് കോര്പ്പറേഷന് എ.ഇമാരും റിപ്പോര്ട്ട് നല്കണം. വെള്ളക്കെട്ട് നിലനില്ക്കുന്ന സാഹചര്യത്തിലും പല സ്കൂളുകളിലും ക്യാമ്പുകള് പ്രവര്ത്തിക്കുന്നതിനാലും തൃശൂര് ജില്ലയിലെ പ്രൊഫഷണല് കോളേജുകള്, കേന്ദ്രീയ വിദ്യാലയങ്ങള്, സി.ബി.എസ്.ഇ/ഐ.സി.എസ്.ഇ ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ഇന്ന് അവധിയായിരിക്കുമെന്ന് ജില്ലാ കലക്ടര് അറിയിച്ചു.
ദുരന്ത സാധ്യത ഒഴിവാക്കുന്നതിനായി വയനാട് ജില്ലയിലെ പ്രൊഫഷനല് കോളജ് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചു. അങ്കണവാടികള്ക്കും അവധി ബാധകമാണ്. മോഡല് റെസിഡെന്ഷ്യല് സ്കൂളുകള്ക്ക് അവധി ബാധകമായിരിക്കില്ല. കാസര്കോട് ജില്ലയില് നീലേശ്വരം കേന്ദ്രീയ വിദ്യാലയത്തിനും ക്യാമ്പ് പ്രവര്ത്തിച്ച അങ്കണവാടികള്ക്കും കോളജുകള്ക്കും അവധി ബാധകമാണ്.
കേരള, മഹാത്മാഗാന്ധി സര്വകലാശാലകള് ചൊവ്വാഴ്ച നടത്താനിരുന്ന എല്ലാ പരീക്ഷകളും മാറ്റിവച്ചു. എം.ജി സര്വകലാശാലക്ക് കീഴിലെ കോളജുകളില് ആഗസ്റ്റ് 14ന് നടത്താന് നിശ്ചയിച്ച വിദ്യാര്ഥി യൂനിയന് തെരഞ്ഞെടുപ്പും മാറ്റി.
https://www.facebook.com/Malayalivartha
