മഴക്കെടുതിയിൽ ദുരിതമനുഭവിക്കുന്ന വയനാട്ടിലെ ദുരിതാശ്വാസ ക്യാമ്ബുകൾക്ക് കൈത്താങ്ങായി നടൻ പൃഥ്വിരാജ് സുകുമാരന്‍. വയനാട്ടിലെ തിരുനെല്ലി ഗ്രാമപഞ്ചായത്തിലെ ദുരിതാശ്വാസ ക്യാമ്ബിലേക്ക് ഒരു ലോഡ് സാധനങ്ങളയച്ചിരിക്കുകയാണ് പൃഥ്വിരാജ്. ഈ കാര്യം സഹോദരനായ ഇന്ദ്രജിത്താണ് ഫേസ്ബുക്കിലൂടെ പങ്കുവച്ചിരിക്കുന്നത്. അന്‍പോട് കൊച്ചി പോയിന്‍റില്‍ നിന്നാണ് ട്രക്ക് പുറപ്പെട്ടത്.

കഴിഞ്ഞ വര്‍ഷത്തെപ്പോലെ തന്നെ ഇത്തവണയും പ്രളയം തുടങ്ങിയത് മുതല്‍ ദുരിതാശ്വാസ ക്യാമ്ബുകളിലേക്കുള്ള കളക്ഷന്‍ പോയിന്‍റിലാണ് ഇന്ദ്രജിത്തും കുടുംബവും. താരകുടുംബത്തിന്റെ സ്വാതന്ത്രദിനാഘോഷവും അവിടെവച്ചായിരുന്നു.

മഴക്കെടുതിയിൽ ദുരിതമനുഭവിക്കുന്ന കേരളത്തിലെ ദുരിതാശ്വാസ ക്യാമ്ബുകളില്‍ കഴിയുന്നവര്‍ക്കായി കേരളത്തിന്റെ വിവിധ ഭാഗങ്ങളില്‍ നിന്നായി ടണ്‍ കണക്കിന് സാധനങ്ങളാണ് ആളുകള്‍ അയച്ച്‌ കൊടുക്കുന്നത്. മലപ്പുറത്തെ ദുരിതാശ്വാസ ക്യാമ്ബുകളില്‍ കഴിയുന്നവര്‍ക്കായി നടന്‍ ടൊവിനോ സാധനങ്ങളയച്ചിരുന്നു. സാധനങ്ങള്‍ കയറ്റുന്ന ടൊവിനോയുടെയും ചലച്ചിത്ര താരം ജോജു ജോര്‍ജിന്‍റെയും ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. ഇവര്‍ക്ക് പിന്നാലെയാണ് പൃഥ്വിരാജ് സുകുമാരനും കൈത്താങ്ങുമായി മുന്നോട്ട് വന്നത്.