പ്രളയത്തെ നേരിട്ട മുതിർന്നവർക്ക് ധൈര്യം വീണ്ടെടുക്കാം. എന്നാൽ കുഞ്ഞു മനസ്സുകളോ ? ഇത്രയും കാലം കളിച്ചു നടന്ന വീട് നഷ്ടമായതും മറ്റും കണ്ടു പേടിച്ച്‌ അരണ്ടിരിക്കുന്ന കുഞ്ഞ് മനസ്സുകൾക്ക് ആശ്വാസമൊരുക്കാൻ ശ്രമിക്കുകയാണ് കളിപ്പാട്ടവണ്ടി. കുഞ്ഞുങ്ങളിൽ വീണ്ടും കുസൃതിയുടെ ലോകം നിറയ്ക്കാന്‍ തലസ്ഥാനത്താണ് പദ്ധതിയൊരുക്കുന്നത്. റൈറ്റ്‌സ് എന്ന കുട്ടികളുടെ സംഘടനയാണ് കളിപ്പാട്ടങ്ങള്‍ ശേഖരിക്കുന്നത്.

പ്രളയത്തിൽ നഷ്ടമായ കുട്ടികളുടെ സന്തോഷം വീണ്ടും തിരിച്ചു പിടിക്കാനുള്ള ചിന്തയിൽ നിന്നുമാണ് ഇത്. ദുരിത മേഖലയിലെ കുട്ടികള്‍ക്കായി കളിപ്പാട്ടങ്ങള്‍ സമ്മാനിക്കാന്‍ ആഗ്രഹിക്കുന്നവര്‍ക്ക് റൈറ്റ്‌സിന്റെ തിരുവനന്തപുരം ഓഫിസില്‍ എത്തിക്കാവുന്നതാണ്. തിരുവനന്തപുരത്ത് നിന്ന് കളിപ്പാട്ടവണ്ടി വെള്ളിയാഴ്ച്ച കോഴിക്കോട്ടേക്ക് പുറപ്പെടും. തലസ്ഥാനത്ത് 12 കേന്ദ്രങ്ങളിലായാണ് കളിപ്പാട്ട ശേഖരണം ഒരുക്കിയിരിക്കുന്നത്. സംസ്ഥാനത്ത് ഉടനീളം 100കേന്ദ്രങ്ങളില്‍ നിന്നും കളിപ്പാട്ടങ്ങള്‍ ശേഖരിക്കും.കളിപ്പാട്ടങ്ങള്‍ക്ക് പുറമെ ക്രയോണ്‍സ്, ചെസ് ബോര്‍ഡ്, കളര്‍പെന്‍സില്‍ തുടങ്ങി കുട്ടികള്‍ക്ക് വേണ്ടിയുള്ള എന്തും നൽകാവുന്നതാണ്.