പൊലീസിന്റെയും പ്രോസിക്യൂഷന്റെയും അനാസ്ഥ കാരണം വാളയാര്‍ പോസ്‌ക്കോ കേസിലെ പ്രതികള്‍ രക്ഷപെട്ട സംഭവത്തില്‍ സി.ബി.ഐ അന്വേഷണം വേണമെന്ന് മരിച്ച പെണ്‍കുട്ടികളുടെ അമ്മ. ഇക്കാര്യം ആവശ്യപ്പെട്ട് മുഖ്യമന്ത്രിക്ക് പരാതി നല്‍കുമെന്ന് പെണ്‍കുട്ടികളുടെ അമ്മ പ്രതികരിച്ചു. പ്രതികളെ വെറുതെ വിടുമെന്ന് ചിന്തിച്ചില്ല. അന്വേഷണ ഉദ്യോഗസ്ഥര്‍ പറഞ്ഞു പറ്റിച്ചെന്നും വിധി വന്നശേഷം പെണ്‍കുട്ടികളുടെ അമ്മ പ്രതികരിച്ചിരുന്നു. പൊലീസിന് വീഴ്ച സംഭവിച്ചത് കൊണ്ടാകും പ്രതികള്‍ രക്ഷപ്പെട്ടത്. മൂത്തകുട്ടിയെ പീഡിപ്പിക്കുന്നത് നേരിട്ട് കണ്ടുവെന്ന് പറഞ്ഞിട്ടും നടപടിയെടുത്തില്ല. വിധി വരുന്നത് പോലും തങ്ങളെ അറിയിച്ചില്ലെന്നും പെണ്‍കുട്ടികളുടെ അമ്മ പറഞ്ഞു. മൂന്ന് പ്രതികളെ പോക്‌സോ കോടതിയാണ് വെറുതെ വിട്ടത്. വി. മധു, എം. മധു, ഷിബു എന്നിവരെ തെളിവുകളുടെ അഭാവത്തിലാണ് വെറുതെ വിട്ടത്.

കോടതിയില്‍ എല്ലാ കാര്യങ്ങളും പറഞ്ഞിരുന്നു. മൂത്തമകളെ പീഡിപ്പിക്കുന്നത് നേരിട്ട് കണ്ടെന്ന് പൊലീസിന് മൊഴി നല്‍കിയിട്ടും നടപടിയെടുത്തില്ല. വിധി വരുന്നത് പോലും തങ്ങളെ അറിയിച്ചില്ല. തുടക്കത്തില്‍ അന്വേഷണത്തില്‍ വീഴ്ചവരുത്തിയ എസ്.ഐയ്ക്കും സി.ഐയ്ക്കും എതിരെ നടപടി എടുത്തിരുന്നു. എഎസ്പി ജി. പൂങ്കുഴലിയും ഡിവൈഎസ്പി എം.ജെ. സോജനുമാണ് പിന്നീട് അന്വേഷണം നടത്തിത്. പൊലീസ് അപ്പീല്‍ നല്‍കുമെന്ന് ഡി.ജി.പി വ്യക്തമാക്കിയെങ്കിലും അതില്‍ വിശ്വാസമില്ലെന്നും അമ്മ വ്യക്തമാക്കി. പൊലീസിന്റെ അനാസ്ഥ കാരണമാണ് പ്രതികള്‍ രക്ഷപെട്ടത്. പുനരന്വേഷണമാണ് ആവശ്യം. അതിന് പ്രതികള്‍ക്കൊപ്പം നില്‍ക്കുന്ന പൊലീസ് നടത്തിയാല്‍ ശരിയാവില്ലെന്നും അവര്‍ പറഞ്ഞു.

2017 ജനുവരി 13നാണ് പാലക്കാട് അട്ടപ്പള്ളത്ത് 13 വയസുകാരിയെ തൂങ്ങിമരിച്ച നിലയില്‍ കണ്ടെത്തിയത്. ഇളയ സഹോദരിയായിരുന്നു ഏകസാക്ഷി. കേസ് ആത്മഹത്യയാണെന്ന് പൊലീസ് എഴുതിത്തള്ളി. പെണ്‍കുട്ടി നിരവധി തവണ പ്രകൃതിവിരുദ്ധ പീഢനത്തിനിരയായെന്ന് പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നു. എന്നിട്ടും പൊലീസ് അന്വേഷണം കാര്യക്ഷമമാക്കിയില്ല. 53 ദിവസങ്ങള്‍ക്ക് ശേഷം ഒന്‍പത് വയസുള്ള ഇളയ സഹോദരിയേയും വീടിനകത്ത് തൂങ്ങി മരിച്ച നിലയില്‍ കണ്ടെത്തി. പരാതി നല്‍കുമെന്ന കാരണത്താല്‍ കെട്ടിത്തൂക്കിയതാകാന്‍ സാധ്യതയുണ്ടെന്ന് പോസ്റ്റ്‌മോര്‍ട്ടം റിപ്പോര്‍ട്ടില്‍ വ്യക്തമായി പറഞ്ഞിരുന്നു. പക്ഷെ, അതും ആത്മഹത്യയെന്നായിരുന്നു പൊലീസിന്റെ മൊഴി. നിരന്തരപീഡനം കാരണം മൂത്ത പെണ്‍കുട്ടിയുടെ ശരീരത്തില്‍ മുറിവുകള്‍ ഉണ്ടായി. മുറിവ് പഴുത്തപ്പോള്‍ മരുന്ന് തേടി കൂട്ടുകാരിയെ സമീപിച്ചതായി മൊഴി നല്‍കിയിരുന്നു അതെല്ലാം അവഗണിച്ച പൊലീസ് വീണ്ടും കേസ് അന്വേഷിച്ചാല്‍ എന്താകുമെന്ന് എല്ലാവര്‍ക്കും അറിയാം.