നടന്‍ ബിനീഷ് ബാസ്റ്റിനെ സംവിധായകന്‍ അനില്‍ രാധാകൃഷ്ണമേനോന്‍ അപമാനിച്ച സംഭവത്തില്‍ പ്രതിഷേധവുമായി നടി സജിതാ മഠത്തില്‍. ' ബിനീഷ്, തൊണ്ട ഇടറി നിങ്ങള്‍ പറഞ്ഞത് ഈ രാവണപ്രഭുക്കന്‍മാര്‍ക്ക് എത്ര ശ്രമിച്ചാലും പറയാന്‍ നാവു വഴങ്ങില്ല! മനക്കരുത്തുമായി നിങ്ങള്‍ സ്‌റ്റേജിലേക്ക് നടന്ന ആ നടത്തം ഇവരുടെ സ്വപ്നത്തില്‍ പോലും സാധ്യവുമല്ല! നിങ്ങള്‍ പറയുന്നത് കേട്ട് കുട്ടികള്‍ എഴുന്നേറ്റു നിന്ന് കൈയ്യടിക്കുന്നത് അവരുടെ ഹൃദയത്തില്‍ നിന്നാണ്. അത് ഫാനരന്മാരുടെ അലമ്പലല്ല! ഇറങ്ങി പോയവര്‍ ഇറങ്ങേണ്ടവര്‍ തന്നെയാണ്. പല അടികളുമേറ്റ് വെന്തിരിക്കയാണെങ്കിലും ബിനീഷ് നിങ്ങള്‍ ജീവിക്കാനുള്ള പ്രതീക്ഷ നല്‍കുന്നു'. എന്നാണ് അസജിതാ മഠത്തില്‍ ഫെയിസ്ബുക്കില്‍ പറയുന്നത്.

പാലക്കാട് സര്‍ക്കാര്‍ മെഡിക്കല്‍ കോളേജിലെ കോളേജ് ഡേ ദിനത്തില്‍ മുഖ്യാതിഥിയായെത്തിയ നടന്‍ ബിനീഷ് ബാസ്റ്റിന്‍ എന്ന മൂന്നാംകിട നടന്‍ തന്നോട് ചാന്‍സ് ചോദിച്ച് നടക്കുന്നയാളാണ് അയാള്‍ക്കൊപ്പം വേദി പങ്കിടാന്‍ തയ്യാറല്ലെന്നായിരുന്നു അനില്‍ രാധാകൃഷ്ണന്‍ മേനോന്‍ കോളേജ് ഭാരവാഹികളെ അറിയിച്ചത്. അവരിത് ബിനീഷിനെ അറിയിച്ചതിനെ തുടര്‍ന്നാണ് ബിനീഷ് വേദിയിലെത്തി കുത്തിയിരുന്ന് പ്രതിഷേധിച്ചത്. പട്ടികജാതി വിഭാഗത്തില്‍ ഉള്ളവരുടെ ഉന്നമനത്തിനു വേണ്ടി, അതിനായി നിശ്ചയിക്കപ്പെട്ടിട്ടുള്ള സര്‍ക്കാര്‍ ഫണ്ട് പ്രയോജനപ്പെടുത്തിയാണ് പാലക്കാട് സര്‍ക്കാര്‍ മെഡിക്കല്‍ കോളേജ് സ്ഥാപിച്ചിട്ടുള്ളത്. അവിടെ തന്നെ ജാതി, ജാതിവെറി, നവ ജാതിവാല്‍ പ്രമാണിത്തം മുതലാളിത്ത നാടുവാഴിത്തം എന്നീ മനുഷ്യവിരുദ്ധതകളെ ഒറ്റയെഴുന്നള്ളിപ്പിലൂടെ പ്രദര്‍ശിപ്പിക്കാന്‍ തുനിഞ്ഞവരെ; കടന്നു വരവ്, കറുത്ത സ്യൂട്ട്, തറയിലിരിപ്പ്, മൈക്കില്ലാതെയുള്ള പ്രസംഗം, അതിനായി തെരഞ്ഞെടുത്ത വാക്കുകള്‍, എന്നിവയിലൂടെ തകര്‍ത്തു തരിപ്പണമാക്കിയ നിങ്ങളാണ് ബിനീഷ് ബാസ്റ്റിന്‍, നവ കേരളത്തിന്റെ അഭിമാനം എന്ന് പ്രശസ്ത സിനിമാ നിരൂപകനായ ജി.പി രാമചന്ദ്രന്‍ ഫെയിസ്ബുക്കില്‍ എഴുതി.

ഇനി പ്രകാശനം ചെയാനിരിക്കുന്ന എല്ലാ കോളേജ് മാഗസിനുകളും ബിനിഷിനെ കൊണ്ട് ചെയ്യിപ്പിച്ച് കേരളം ബിനിഷിനോടൊപ്പം നില്‍ക്കണമെന്ന് ഹരീഷ് പേരടി ആവശ്യപ്പെട്ടു. 'മതമല്ല. മതമല്ല പ്രശ്‌നം... ഞാനും ഒരു മനുഷ്യനാണെന്നും അദ്ദേഹം ഫെയിസ്ബുക്കില്‍ കുറിച്ചു. വിജയ് ഉള്‍പ്പെടെയുള്ള തെന്നിന്ത്യയിലെ വലിയ താരങ്ങളുടെ സിനിമയില്‍ അഭിനയിച്ചിട്ടുള്ളയാളാണ് ബിനീഷ് ബാസ്റ്റിന്‍. അങ്ങനെയാണ് അദ്ദേഹത്തെ പാലക്കാട് മെഡിക്കല്‍കോളജ് യൂണിയന്‍ ചടങ്ങിലേക്ക് ക്ഷണിച്ചത്. പരിപാടി തുടങ്ങുന്നതിന് ഒരു മണിക്കൂര്‍ മുമ്പ്് പ്രിന്‍സിപ്പലും യൂണിയന്‍ ചെയര്‍മാനും ബിനീഷ് താമസിച്ച ഹോട്ടലില്‍ എത്തിയാണ് അനില്‍രാധാകൃഷ്ണ മേനോന്‍ ഉന്നയിച്ച കാര്യം പറഞ്ഞത്. തന്നെ വ്യക്തിപരമായി അപമാനിച്ചതാണെന്ന് വ്യക്തമായതോടെ ബിനീഷ് ഉദ്ഘാടന വേദിയിലേക്ക് ചെല്ലുകയായിരുന്നു.

പ്രിന്‍സിപ്പലും ചിലരും തടയാന്‍ ശ്രമിച്ചെങ്കിലും ബിനീഷ് വേദിയിലെത്തി കുത്തിയിരുന്ന് പ്രതിഷേധിച്ചു. എസ്.എഫ്.ഐ നേതൃത്വം നല്‍കുന്ന യൂണിയനില്‍ നിന്ന് ഇത്രയും നിരുത്തരവാദപരമായ വീഴ്ചയുണ്ടാവാന്‍ പാടില്ലായിരുന്നെന്ന് പലരും ചൂണ്ടിക്കാട്ടുന്നു. എന്നാല്‍ വിദ്യാര്‍ത്ഥികള്‍ ബിനീഷിനൊപ്പം നിന്നു എന്നത് ഏറെ ശ്രദ്ധേയമായി. സിനിമയില്ലാത്തപ്പോള്‍ ടൈല്‍സിന്റെ ഉള്‍പ്പെടെ പണിക്ക് പോകുന്ന ബിനീഷ് ഏറെ ദുഷ്‌ക്കരമായ ജീവിതസാഹചര്യങ്ങളില്‍ നിന്നാണ് സിനിമയിലെത്തിയത്. ബിനീഷിന്റെ ഇരുപ്പില്‍ എല്ലാമുണ്ട് , വിശപ്പിന്റെ, അധ്വാനത്തിന്റെ , കഷ്ടപ്പാടിന്റെ , വിയര്‍പ്പിന്റെ , അതിജീവനത്തിന്റെ, അവഗണനയുടെ പ്രതീകമാണ് ബിനീഷ് ബാസ്റ്റിന്‍ എന്ന പച്ച മനുഷ്യന്‍ എന്ന് നിര്‍മാതാവ് സന്ദീപ് സേനന്‍ പറയുന്നു.

അനില്‍ രാധാകൃഷ്ണ മേനോന്റെ നില്പില്‍ പ്രത്യേകിച്ചൊന്നും തോന്നുന്നില്ല , പ്രൊഡ്യൂസറിന്റെ ചിലവില്‍ മൃഷ്ട്ടാനമുണ്ട് എല്ലിന്റിടയില്‍ കൊഴുപ്പുകയറിയ സിനിമയിലെ ഒരു വഴിപോക്കന്‍. പക്ഷെ ഈ വഴിപോക്കന്റെ വാക്കുകേട്ട് ബിനീഷിനെ വേദിയിലേക്കു കയറരുതെന്നു പറഞ്ഞ ആ ഗവണ്മെന്റ് കോളേജിന്റെ വിദ്യാസമ്പന്നനായ പ്രിന്‍സിപ്പല്‍ , നിങ്ങള്‍ ഒന്നൂടിപ്പോയി ജീവിതം പഠിച്ചിട്ടുവരു , മനുഷ്യത്വമെന്തെന്നു അവിടെപ്പഠിക്കുന്ന ബിനീഷിന് കയ്യടിച്ച കുട്ടികളില്‍ നിന്നു പഠിച്ചിട്ടുവരു . മൂന്നുപേരേയും നേരിട്ടറിയില്ല പക്ഷെ ഇവരില്‍ മനുഷ്യനേതെന്നു തിരിച്ചറിയാം.
ബിനീഷ്... നിങ്ങള്‍ ഞാന്‍ നിര്‍മ്മിക്കുന്ന അടുത്ത ചിത്രത്തിലുണ്ടാകും. ഉറപ്പെന്നും സന്ദീപ് പറയുന്നു.