മനോരമ ആഴ്ചപ്പതിപ്പില്‍ മുന്‍ ഡി.ജി.പി അലക്‌സാണ്ടര്‍ ജേക്കബ് എഴുതിയ ലേഖനനത്തിലെ വിഡ്ഢിത്തങ്ങൾ ചൂണ്ടിക്കാട്ടി രംഗത്തെത്തിയിരിക്കുകയാണ് ആരോഗ്യപ്രവര്‍ത്തക ഡോ.ഷിംന അസീസ് .

അധ്യാപകരെയും സഹപാഠികളെയും വെടിവെക്കുകയും അക്രമിക്കുകയും ചെയ്യുന്ന കുട്ടികള്‍ സിസേറിയനിലൂടെ വയറുകീറി പുറത്തെടുത്തവരാണെന്ന് പഠനങ്ങള്‍ തെളിയിച്ചിട്ടുണ്ടെന്നായിരുന്നു അലക്‌സാണ്ടര്‍ ജേക്കബിന്റെ പ്രസ്താവന. സിസേറിയനെതിരെയുള്ള മുൻ ഡി ജി പി യുടെ പ്രസ്താവനക്കെതിരെയാണ് ഡോ.ഷിംന അസീസ് തന്റെ ഫേസ്ബുക് പോസ്റ്റിൽ എഴുതിയി ട്ടുള്ളത്.

സിസേറിയന്‍ വഴി കീറിയെടുത്ത കുഞ്ഞ് ആദ്യം കാണുന്നത് അമ്മയുടെ രക്തം ഇറ്റ് വീഴുന്ന കത്തി പിടിച്ച ഡോക്ടറെയാണ്, അത് കുഞ്ഞിന്റെ സ്വഭാവത്തെ ബാധിക്കുമെന്ന് അലക്‌സാണ്ടര്‍ ജേക്കബ് മനോരമ ആഴ്ചപ്പതിപ്പില്‍ പ്രസിദ്ധീകരിച്ച ലേഖനത്തില്‍ പറഞ്ഞിരുന്നു. അമേരിക്കയിലെയും ഫ്രാന്‍സിലെയും കുഴപ്പക്കാരായ കുട്ടികളില്‍ പലരും സിസേറിയിനിലൂടെ ജനിച്ച കുഞ്ഞുങ്ങളാണെന്ന് പഠനങ്ങളില്‍ പറയുന്നു എന്നും ലേഖനത്തിലുണ്ട്. ഈ പ്രസ്താവന വിടുവായത്തരമാണെന്ന് ഡോ.ഷിംന പറയുന്നു.

സിസേറിയനായാലും പ്രസവമായാലും കുഞ്ഞ് പുറത്ത് വരുന്നത് ഡോക്ടര്‍ വലിച്ച് പുറത്തേക്കെടുക്കുമ്പോഴാണ്. അന്നേരം കത്തി ഡോക്ടറുടെ കൈയിലില്ല. (സാധാരണ രീതിയില്‍ പ്രസവിക്കുമ്പോള്‍ ഡോക്ടര്‍ മാലയും ബൊക്കെയുമായി നില്‍ക്കുമെന്നാണോ ‘തള്ള് ഡോക്ടറുടെ’ ധാരണ?). രണ്ടാമത്, ജനിക്കുമ്പോള്‍ ‘കണി’ കാണുന്നത് അനുസരിച്ചല്ല ഒരു മനുഷ്യന്റെ ചിന്തയും പെരുമാറ്റവും നിശ്ചയിക്കപ്പെടുന്നത്. അതിന് ഹേതുവാകുന്നത് അയാളുടെ ജനിതകഘടകങ്ങളും ജീവിതസാഹചര്യവും എല്ലാമാണ്.’ ഫേസ്ബുക്ക് കുറിപ്പില്‍ പറയുന്നു.

സിസേറിയനെക്കുറിച്ച പല അബദ്ധധാരണകളും നിലനില്‍ക്കുന്ന സമൂഹത്തില്‍ ഇത് വളരെ ദോഷകരമായ പ്രതിഫലനങ്ങളുണ്ടാക്കുമെന്നും പ്രസിദ്ധീകരിക്കുന്നതിന് മുന്‍പ് മനോരമ ഗൂഗിള്‍ ചെയ്ത് പോലും പ്രസ്താവനയുടെ സത്യാവസ്ഥ തിരക്കാതിരുന്നത് തെറ്റാണെന്നും ഡോ.ഷിംന വ്യക്തമാക്കുന്നു.

സിസേറിയനെയും സുഖപ്രസവത്തെയും കുറിച്ച് ഇപ്പോഴും പല തെറ്റായ ധാരണകളും പൊതു സമൂഹത്തിലുണ്ട്.എന്നാൽ ഉന്നത വിദ്യാഭ്യാസം നേടിയവർ പോലും സിസേറിയനെ കുറിച്ച തെറ്റായ ധാരണകൾ വച്ച് പുലർത്തുകയും ആ തെറ്റുകൾ സമൂഹത്തിനായി പങ്കുവെക്കുകയും ചെയ്യുന്നതിലുള്ള അപകടമാണ് നാം തിരിച്ചറിയേണ്ടത്.