ഭരണഘടനയും മതനിരപേക്ഷതയും സംരക്ഷിക്കാൻ ഒറ്റക്കെട്ടായി ഇറങ്ങണമെന്ന് മുഖ്യമന്ത്രി ഉദ്ഘോഷിച്ച സാഹചര്യത്തിൽ 2021 ൽ പിണറായി മുഖ്യമന്ത്രിയും രമേശ് ചെന്നിത്തല ഉപമുഖ്യമന്ത്രിയുമായി ഇടതു-വലതു സംഖ്യം അധികാരത്തിലെത്താൻ സാധ്യതയേറി.

ഇടതു-വലതു സംഖ്യത്തെ തീർത്തും പിന്തുണക്കുന്ന ലീഗ് പ്രതിനിധി സംസ്ഥാനത്തിന്റെ ആഭ്യന്തര മന്ത്രിയും ആകാം.

ഇതെല്ലാം വെറും മനക്കോട്ടയാണെന്ന് നിങ്ങൾ കരുതുന്നതെങ്കിൽ തെറ്റി. കാരണം 2021 ൽ ബിജെപി കേരളത്തിൽ പ്രതിപക്ഷ നേതൃനിരയിലേക്ക് ഉയരും.

മുല്ലപ്പള്ളിയെ തള്ളിപറഞ്ഞ് പിണറായിയെ കെട്ടി പിടിക്കാൻ ഡൽഹിയിലെ 'എമ്പുരാക്കൻമാർ ' രമേശ് ചെന്നിത്തലക്ക് അനുമതി നൽകി കഴിഞ്ഞു. ഡൽഹിയിൽ സോണിയക്കും യച്ചൂരിക്കും ഒരുമിച്ച് നിൽക്കാമെങ്കിൽ കേരളത്തിൽ പിണറായിക്കും ചെന്നിത്തലക്കും ഒരുമിച്ച് നിൽക്കുന്നതിൽ ഒരു തെറ്റുമില്ലെന്നാണ് സോണിയ അറിയിച്ചത്.

അല്ലെങ്കിലും ദേശീയ തലത്തിൽ ബി ടീമായി മാറി കഴിഞ്ഞ കോൺഗ്രസിന് കേരളത്തിലും അങ്ങനെയാകുന്നതിൽ ഒരു തെറ്റുമില്ല.

അതായത് ഇടതു-വലതു സംഖ്യം കേരളനിയമസഭയിലേക്ക് ഒരുമിച്ച് മത്സരിച്ചു കൂടെന്നില്ല. ഇക്കാര്യം മുൻകൂട്ടി കണ്ട് അടി മതിയാക്കി ഒരുമിച്ച് നിൽക്കാൻ ബിജെപി ദേശീയ നേതൃത്വം സംസ്ഥാനത്തിന് നിർദ്ദേശം നൽകിയിട്ടുണ്ട്.

ഇനി സോളാർ, ബാർ കേസുകൾ കേരളത്തിന് സ്വപ്നം കാണാനൊക്കില്ല. സോളാറിന്റെ പേരിൽ ഭാവിനശിച്ച ഉമ്മൻ ചാണ്ടിയും ബാറിന്റെ പേരിൽ ഇല്ലാത്തതൊക്കെ കേട്ട കെ.എം മാണിയുടെ ആത്മാവും ചെന്നിത്തലയോട് പൊറുക്കട്ടെ.

2021 ൽ ബി ജെ പി മഹാശക്തിയാകുമെന്നാണ് പുതിയ സംഭവവികാസങ്ങൾ തെളിയിക്കുന്നത്. കേരളത്തിലെ ഹിന്ദു സമൂഹം ഒറ്റകെട്ടായി ബി ജെ പിക്ക് പിന്നിൽ അണിനിരക്കും. ഇടതും വലതും ഒരുമിക്കുമ്പോൾ വളരുന്നത് ബി ജെ പിയായിരിക്കും. കാരണം കേരളത്തിൽ ബിജെപി മാത്രമാണ് ബദൽ.

ശബരിമല വിഷയത്തിൽ ബിജെപിയെ വളർത്തിയ പിണറായി തന്നെയാണ് പൗരത്വ വിഷയത്തിലും ബിജെ പിയെ വളർത്തുന്നത്. അതുകൊണ്ടു തന്നെ ബിജെപി കടപ്പെട്ടിരിക്കുന്നത് പിണറായിയോടാണ്.

പൗരത്വ നിയമ ഭേദഗതിക്കെതിരെ ഭാവി പരിപാടികൾ ആലോചിക്കാനും യോജിച്ച പ്രക്ഷോഭം നടത്താനും ഞായറാഴ്ച ചേർന്ന സർവ കക്ഷിയോഗം മുഖ്യമന്ത്രിയെയും പ്രതിപക്ഷ നേതാവിനെയും ചുമതലപ്പെടുത്തിയ സാഹചര്യത്തിൽ ചെന്നിത്തലയും പിണറായിയും നിരന്തരം കൂടി കണ്ട് സകല കോൺഗ്രസ് നേതാക്കളുടെയും ഉറക്കം കെടുത്തും. ചെന്നിത്തലയോട് കളിച്ചാൽ പിണറായിയോട് പറഞ്ഞ് വിജിലൻസ് കേസിൽ പ്രതിയാക്കാനും സാധ്യതയുണ്ട്.

നിയമഭേദഗതിക്കെതിരെ സർക്കാർ കോടതിയെ സമീപിക്കണമെന്നും നിയമസഭ വിളിച്ചു ചേർത്ത് ചർച്ച നടത്തണമെന്നും യോഗത്തിൽ നിർദ്ദേശമുണ്ടായി. എന്നാൽ പാർലമെന്റ് പാസാക്കിയ നിയമത്തിൽ എങ്ങനെയാണ് സംസ്ഥാനത്തിന് ഇടപെടാൻ കഴിയുക എന്നാരും ഓർത്തില്ല. അതു കൊണ്ടുതന്നെ വീണ്ടും അധികാരത്തിലെത്താനുള്ള പിണറായിയുടെ തന്ത്രം മാത്രമാണ് ഇപ്പോഴത്തെ നാടകങ്ങൾ.

ഭരണഘടനയും മതനിരപേക്ഷതയും സംരക്ഷിക്കാൻ ഒറ്റക്കെട്ടായി വലിയ തോതിൽ ഇറങ്ങേണ്ട ഘട്ടമാണിതെന്ന് മുഖ്യമന്ത്രി പറഞ്ഞു . ഒന്നായി നിന്ന് പ്രക്ഷോഭം നടത്തുമ്പോൾ നാം കാണുന്നതിനും അപ്പുറമുള്ള ബലം ലഭിക്കും. അതിനെ രാജ്യം തന്നെ മാതൃകയായി സ്വീകരിക്കുന്ന നില വരും. മതാടിസ്ഥാനത്തിൽ ജനങ്ങളെ വേർതിരിക്കാനുള്ള നടപടി ഏത് രൂപത്തിൽ ഏത് അധികാര സ്ഥാനത്തു നിന്നുണ്ടായാലും കേരളത്തിൽ വിലപ്പോവില്ല. ഈ ഘട്ടത്തിൽ ഒരുമയുടെ സന്ദേശം ഇന്ത്യയ്ക്കാകെ നൽകണം. ഭരണഘടനയ്ക്ക് മേലേയല്ല ഒരു നിയമവും ചട്ടവുമെന്ന് മുഖ്യമന്ത്രി പറഞ്ഞു. കുറുക്കന്റെ കണ്ണ് കോഴികൂട്ടിൽ എന്ന് പറയുന്നതു പോലെ പിണറായിയുടെ കണ്ണ് 2021 മേയിൽ കിട്ടുന്ന ഒന്നാം നമ്പർ കാറിലാണ്.

പിണറായി നാടകത്തിൽ കഥാപാത്രം ആകാതിരിക്കാൻ എസ് എസ് ജനറൽ സെക്രട്ടറി ജി. സുകുമാരൻ നായർ കാണിച്ച വിവേകം പോലും അദ്ദേഹം താക്കോൽ സ്ഥാനക്കാരനാക്കിയ ചെന്നിത്തല കാണിക്കാത്തത് വിവേക ശൂന്യം എന്നാണ് കേരളം പറയുന്നത്.

ഇന്ത്യയെ സ്‌നേഹിക്കുന്ന മുഴുവൻ ജനങ്ങളും മത, ജാതി, രാഷ്ട്രീയ ചിന്തകൾക്കതീതമായി ഒന്നിച്ചു നിൽക്കേണ്ട സമയമാണെന്ന് യോഗത്തിൽ സംബന്ധിച്ച പ്രതിപക്ഷ നേതാവ് രമേശ് ചെന്നിത്തല പറഞ്ഞു. രാജ്യത്തിന്റെ മതേതരത്വം അപകടത്തിലായിരിക്കുന്ന സ്ഥിതിയിൽ വിവിധ കോണുകളിൽ പ്രക്ഷോഭം നടക്കുകയാണ്. ഇതിനെ ഗൗരവപൂർവം സമീപിക്കണം. ഭരണഘടയുടെ അടിസ്ഥാന സ്വഭാവത്തെ മാറ്റിമറിക്കാനുള്ള ശ്രമമാണ് കേന്ദ്ര സർക്കാരിന്റെ ഭാഗത്ത് നിന്നുണ്ടാവുന്നത്. ഇതിനെ കോടതിയിൽ ചോദ്യം ചെയ്തിട്ടുണ്ടെന്ന് പ്രതിപക്ഷ നേതാവ് പറഞ്ഞു.

യോഗത്തിൽ പി. കെ. കുഞ്ഞാലിക്കുട്ടി നേരിട്ട് പങ്കെടുത്തതോടെ എം പി സ്ഥാനം രാജീവച്ച് 2021 ൽ അദ്ദേഹം ആഭ്യന്തര മന്ത്രിയാകുമെന്നും ഉറപ്പായി.

അടി മാറി ബി ജെ പി ഒന്നിക്കട്ടെ. 2021 ലെ പൂരം കാണാൻ കാത്തിരിക്കുക.