അന്ന് പിണറായിക്ക് ശനിദശ ഇപ്പോള് ശുക്രദശ; പൗരത്വ നിയമ ഭേദഗതിയുമായി ബന്ധപ്പെട്ട് സര്വ്വകക്ഷിയോഗം വിളിച്ചു ചേര്ത്ത മുഖ്യമന്ത്രി പിണറായി വിജയനു പ്രശംസയുമായി എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന്
പൗരത്വ നിയമ ഭേദഗതിയുമായി ബന്ധപ്പെട്ട് സര്വ്വകക്ഷിയോഗം വിളിച്ചു ചേര്ത്ത മുഖ്യമന്ത്രി പിണറായി വിജയനു പ്രശംസയുമായി എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന്. ശബരിമല പ്രശ്നത്തില് എതിരെ നിന്നവരെ ഒരുമിച്ച് നിര്ത്താന് പിണറായിക്ക് സാധിച്ചത് വലിയ കാര്യമാണെന്ന് വെള്ളാപ്പള്ളി പ്രശംസിച്ചു.
അന്ന് ശബരിമല പ്രശ്നത്തില് അദ്ദേഹത്തിനെതിരെ നിന്നവരെ ഇന്ന് ഒരേ പക്ഷത്ത് നിര്ത്താന് പിണറായിക്ക് സാധിച്ചത് വലിയ കാര്യമാണ്. അന്ന് പിണറായിക്ക് ശനിദശയായിരുന്നെങ്കില് ഇപ്പോള് ശുക്രദശയാണ്. പിണറായിയുടെ നേതൃത്വത്തില് പ്രതിപക്ഷം സമരത്തിനിറങ്ങിയത് പിണറായിയുടെ നേതൃഗുണത്തിന്റെയും ഭരണമികവിന്റെയും തെളിവാണ്'എന്ന് വെള്ളാപ്പള്ളി നടേശൻ പറഞ്ഞു.
കഴിഞ്ഞവര്ഷം ഇതേ സമയം അദ്ദേഹത്തെ കടിച്ചു കീറാന് വന്നവരാണ് ഇപ്പോള് അദ്ദേഹത്തോടൊപ്പം ഒരു കുടക്കീഴില് നില്ക്കുന്നതെന്നും വെള്ളാപ്പള്ളി പറഞ്ഞു. കെപിസിസി പ്രസിഡന്റൊഴികെ ബാക്കിയുള്ളവരെ പൗരത്വ ദേദഗതി നിയമവുമായി ബന്ധപ്പെട്ട് വിളിച്ച സര്വകക്ഷി യോഗത്തില് പങ്കെടുപ്പിക്കാന് പിണറായിക്ക് കഴിഞ്ഞു. കോണ്ഗ്രസ്സിനെ പിളര്ത്താന് പിണറായിക്ക് സാധിച്ചു. സര്വ്വകക്ഷി യോഗത്തില് പിണറായി മികച്ച സംഘാടകനായെന്നും എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശൻ പറഞ്ഞു.
സര്വ്വകക്ഷി യോഗത്തില് പൗരത്വ ഭേദഗതി നിയമത്തിനെതിരായ സംയുക്ത സമരങ്ങളില് നിന്നും തീവ്ര നിലപാടുള്ളവരെ ഒഴിവാക്കണമെന്ന് മുഖ്യമന്ത്രി പിണറായി വിജയന് ആവശ്യപെട്ടു. സംയുക്ത പ്രക്ഷോഭത്തിന് ധാരണയാവുകയും തുടര് സമരങ്ങള്ക്ക് മുഖ്യമന്ത്രിയേയും പ്രതിപക്ഷ നേതാവിനെയും സര്വ്വകക്ഷിയോഗം ചുമതലപെടുത്തുകയും ചെയ്തു. സംയുക്ത സമരത്തോട് എല്ലാ സംഘടനകളും സഹകരിക്കണമെന്ന നിലപാട് യോഗത്തില് മുഖ്യമന്ത്രി വ്യക്തമാക്കി. അതേ സമയം പ്രത്യേക നിയമസഭാ സമ്മേളനം വിളിച്ച് പൗരത്വ ഭേദഗതി നിയമത്തിനെതിരെ പ്രമേയം പാസാക്കണമെന്ന് യുഡിഎഫ് യോഗത്തില് ആവശ്യപെട്ടു.
തദ്ദേശ തലത്തില് സര്ക്കാര് പ്രചാരണ പരിപാടികള് സംഘടിപ്പിക്കണമെന്നും യുഡിഎഫ് ആവശ്യപെട്ടു. സര്വ്വകക്ഷി സംഘം രാഷ്ട്രപതിയെ കണ്ട് നിലപാട് അറിയിക്കണമെന്നും പ്രതിപക്ഷ നേതാവ് യോഗത്തില് നിര്ദ്ദേശിച്ചു.യുഎപിഎ പോലുള്ള നിയമങ്ങള് ഈ സമയത്ത് പ്രയോഗിക്കരുതെന്നും രമേശ് ചെന്നിത്തല ആവശ്യപെട്ടു.സംസ്ഥാനത്ത് തടങ്കല് പാളയങ്ങള് ഉണ്ടാക്കരുതെന്നും യുഡിഎഫ് സര്വ്വകക്ഷിയോഗത്തില് ആവശ്യപെട്ടു.
അതേസമയം ഭരണഘടനാ സംരക്ഷണ സമിതി എന്ന ആശയം സര്വ്വ കക്ഷി യോഗത്തില് സര്ക്കാര് മുന്നോട്ട് വച്ചില്ല. നേരത്തെ സര്ക്കാര് ഇത്തരമൊരു ആശയം മുന്നോട്ട് വയ്ക്കുമെന്ന് ചിലവാര്ത്തകള് പ്രചരിച്ചിരുന്നു. എന്നാല് ഇത്തരമൊരു ആവശ്യം സദസ്സില് നിന്നുയര്ന്നെങ്കിലും മുഖ്യമന്ത്രി പ്രതികരിക്കാന് തയ്യാറായില്ല. നേരത്തെ പൗരത്വ ഭേദഗതി നിയമത്തെ കുറിച്ച് ചര്ച്ച ചെയ്യാന് മുഖ്യമന്ത്രി വിളിച്ച സര്വ്വ കക്ഷി യോഗം ഭരണഘടനാ വിരുദ്ധമാണെന്ന് ആരോപിച്ച് ബിജെപി പ്രതിനിധികള് യോഗത്തില് നിന്നിറങ്ങിപോയി.
സര്വ്വകക്ഷിയോഗത്തിനിടെ ബിജെപിക്കെതിരെ പ്രതിഷേധമുണ്ടായി. യോഗം പിരിച്ചുവിടണമെന്ന് ബിജെപി പ്രതിനിധികള് ആവശ്യപ്പെട്ടതിനേത്തുടര്ന്നാണിത്. ഒരു വിഭാഗം ബിജെപിക്കെതിരെ ഗോ ബാക്ക് മുഴക്കുകയും ചെയ്തു. സംസ്ഥാന സെക്രട്ടറി ജെ ആര് പത്മകുമാര്, സംസ്ഥാന വക്താവ് എം സ് കുമാര് എന്നിവരാണ് ബിജെപി പ്രതിനിധികളായി പങ്കെടുത്തത്. പാര്ലമെന്റ് പാസാക്കിയ നിയമത്തിനെതിരെയാണ് യോഗമെന്നും ഇത് ഭരണഘടനാ വിരുദ്ധമാണെന്നും എം എസ് കുമാര് ആരോപിച്ചു. സര്ക്കാര് ഫണ്ടെടുത്ത് കേന്ദ്രത്തെ വെല്ലുവിളിക്കുന്നത് ശരിയല്ല. സുപ്രീം കോടതി അന്തിമവിധി പ്രസ്താവിക്കും വരെ കാത്തിരിക്കണമെന്നും ബിജെപി പ്രതികരിച്ചു.
https://www.facebook.com/Malayalivartha
