കണ്ണൂരിനും മറുപടി... പൗരത്വ നിയമ ഭേദഗതിയെക്കെതിരായ പ്രതിഷേധത്തിനെതിരെ വീണ്ടും ഗവര്‍ണര്‍ ആരിഫ് മുഹമ്മദ് ഖാന്‍; അഭിപ്രായ സ്വാതന്ത്ര്യത്തിന്റെ പേരില്‍ നിലപാട് അടിച്ചേല്‍പ്പിക്കുന്നത് മറ്റൊരു തീവ്രവാദം
പാര്‍ലമെന്റ് പാസാക്കിയ പൗരത്വ നിയമത്തിനെതിരായ പ്രതിഷേധങ്ങളോടെ കര്‍ശനമായ നിലപാടെടുത്ത ആളാണ് ഗവര്‍ണര്‍ ആരിഫ് മുഹമ്മദ് ഖാന്‍. ഒരിടവേളയ്ക്ക് ശേഷം വീണ്ടും ഗവര്‍ണര്‍ രംഗത്തെത്തിയിരിക്കുകയാണ്. പൗരത്വ നിയമത്തിനെതിരെ ഷഹീന്‍ ബാഗില്‍ നടക്കുന്ന സമരത്തെ പരോക്ഷമായി വിമര്‍ശിച്ചാണ് ഗവര്‍ണര്‍ രംഗത്തെത്തിയത്. സ്വന്തം കാഴ്ചപ്പാട് അനുസരിച്ചിള്ള നിയമങ്ങള്‍ പാസാക്കത്തതില്‍ ഒരു പറ്റം ആളുകള്‍ കുത്തിയിരുന്ന് സമരം ചെയ്യുന്നത് ഒരു തരത്തില്‍ തീവ്രവാദമാണെന്ന് അദ്ദേഹം പറഞ്ഞു.
ആളുകള്‍ റോഡുകളില്‍ ഇരുന്ന് സാധാരണ ജീവിരം തടസ്സപ്പെടുത്തുന്നത് മറ്റുള്ളവരെ അവരുടെ അഭിപ്രായങ്ങള്‍ അടിച്ചേല്‍പ്പിക്കുന്നതിന് തുല്യമാണ്. അക്രമങ്ങള്‍ ഹിംസയുടെ രുപത്തില്‍ മാത്രം വരുന്നതല്ല. അത് പല രൂപങ്ങളിലൂടെയാണ് വരുന്നതെന്നും അദ്ദേഹം പറഞ്ഞു. ഇന്ത്യന്‍ സ്റ്റുഡന്റ് പാര്‍ലമെന്റ് സമ്മേളനത്തില്‍ തീവ്രവാദവും നക്‌സല്‍വാദവും കാരണം, വെല്ലുവിളികളും എന്ന വിഷയത്തില്‍ സംഘടിപ്പിച്ച സെമിനാറില്‍ മുഖ്യപ്രഭാഷണം നടത്തുകയായിരുന്നു ഗവര്‍ണര്‍.
കണ്ണൂരിലെ ചരിത്ര കോണ്‍ഗ്രസില്‍ തന്റെ അഭിപ്രായങ്ങള്‍ പറയാന്‍ സമ്മതിച്ചില്ല. പരിപാടിയില്‍ ഉള്‍പ്പെടാത്ത ആളുകള്‍ മൈക്ക് എടുത്ത് സംസാരിച്ചു. അവരുടെ ചോദ്യങ്ങള്‍ക്ക് മറുപടി പറയാന്‍ തുടങ്ങിയപ്പോള്‍ വലിയ ബഹളമാണ് ഉണ്ടായത്. പരിപാടിക്ക് സമയക്രമം ഉണ്ടായിരുന്നതിനാല്‍ വേദി വിടാതെ വേറെ മാര്‍ഗം ഉണ്ടായിരുന്നില്ലെന്നും ഗവര്‍ണര്‍ കൂട്ടിച്ചേര്‍ത്തു.
ശക്തമായ അഭിപ്രായ പ്രകടനത്തിന്റെ പേരില്‍ ആരിഫ് മുഖമ്മദ് ഖാനെതിരെ ശക്തമായ ആക്രമണമാണ് കേരളത്തില്‍ നടന്നത്. ഗവര്‍ണര്‍ ആരിഫ് മുഹമ്മദ് ഖാന്‍ കേരളത്തിന് ബാധ്യതയാണെന്നും അദ്ദേഹത്തെ കേന്ദ്രം തിരിച്ചുവിളിക്കണമെന്നും പ്രതിപക്ഷ നേതാവ് രമേശ് ചെന്നിത്തല അഭിപ്രായപ്പെട്ടിരുന്നു. ഇക്കാര്യം ചൂണ്ടിക്കാട്ടി നിയമസഭയില്‍ പ്രമേയം അവതരിപ്പിക്കാന്‍ സ്പീക്കര്‍ക്ക് നോട്ടീസ് നല്‍കുകയും ചെയ്തു.
പൗരത്വ നിയമ ഭേദഗതിക്കെതിരെ പ്രമേയം പാസാക്കിയതില്‍ ഗവര്‍ണര്‍ക്ക് അതൃപ്തിയുണ്ടെങ്കില്‍ അത് സ്പീക്കറെ രേഖാമൂലം അറിയിക്കുകയാണ് വേണ്ടത്. അല്ലാതെ പരസ്യമായി നിയമസഭയുടെ നടപടിയെ ചോദ്യം ചെയ്യുകയും അതിനെ അവഹേളിക്കുകയും ചെയ്യുന്നത് ഒരിക്കലും ന്യായീകരിക്കാനോ നീതികരിക്കാനോ ആകില്ല. സഭാ ചട്ടം 130 പ്രകാരമാണ് സ്പീക്കര്‍ക്ക് നോട്ടീസ് നല്‍കിയത്. കേരള നിയമസഭയുടെ ചരിത്രത്തില്‍ ഇതുവരെ ഗവര്‍ണറെ തിരിച്ചുവിളിക്കണമെന്ന് ആവശ്യപ്പെട്ടുളള ഒരു പ്രമേയം ചര്‍ച്ച ചെയ്തിട്ടില്ല. വര്‍ക്കല രാധാകൃഷ്ണന്‍ സ്പീക്കറായിരുന്ന കാലത്ത് 1989ല്‍ ഗവര്‍ണറെ തിരിച്ചുവിളിക്കാമെന്ന് റൂളിങ് നല്‍കിയിരുന്നു എന്നും ചെന്നിത്തല വ്യക്തമാക്കി. പൗരത്വ നിയമവുമായി ബന്ധപ്പെട്ട് ബിജെപി സംസ്ഥാന പ്രസിഡന്റിനെ പോലെയാണ് ഗവര്‍ണറുടെ പരാമര്‍ശങ്ങളെന്ന ആരോപണവും പ്രതിപക്ഷ ഉന്നയിച്ചു.
പൗരത്വ നിയമവുമായി(ഭേദഗതി) ബന്ധപ്പെട്ട് പോര് തുടരവെ നയപ്രഖ്യാപന പ്രസംഗത്തിലും ഗവര്‍ണര്‍ വിയോജിപ്പ് പ്രകടിപ്പിച്ചിരുന്നു. നിയമസഭയില്‍ അവതരിപ്പിക്കാനായി കൈമാറിയ നയപ്രഖ്യാപന പ്രസംഗത്തിലെ പൗരത്വ നിയമവുമായി ബന്ധപ്പെട്ട പരാമര്‍ശങ്ങളാണ് ഗവര്‍ണറുടെ വിയോജിപ്പിന് കാരണം. സുപ്രീം കോടതിക്ക് മുമ്പാകെയുള്ള വിഷയം സഭയില്‍ പരാമര്‍ശിക്കുന്നത് ഉചിതമല്ല. എന്നാല്‍ ഈ ആവശ്യം സര്‍ക്കാര്‍ തള്ളിയതോടെ നയ പ്രസംഗത്തില്‍ ആ ഭാഗം കൂടി ഗവര്‍ണര്‍ വായിച്ചു. തന്റെ വിയോജന കുറിപ്പോടെയാണ് വായിച്ചത്. ഒട്ടും പ്രതീക്ഷിക്കാതെ ഗവര്‍ണര്‍ ആ ഭാഗം വായിച്ചതോടെ ഭരണപക്ഷത്തിന്റെ എതിര്‍പ്പുകളും മഞ്ഞുരുകി. അവസാനം ഗവര്‍ണറെ തിരികെ വിളിക്കണമെന്നുള്ള പ്രമേയം പോലും ചര്‍ച്ച ചെയ്യാന്‍ എടുത്തില്ല. അതിന് ശേഷമാണ് ഗവര്‍ണര്‍ വീണ്ടും പൗരത്വ നിയമത്തിനെതിരായ പ്രതിഷേധത്തിനെതിരെ തിരിയുന്നത്.
"
https://www.facebook.com/Malayalivartha
