യുഡിഎഫ് കാലത്തേക്കാള്‍ കൂടുതല്‍ പി എസ് സി നിയമനം നടത്തിയെന്ന മന്ത്രി എകെ ബാലന്റെ വാദത്തിനെതിരെ ബിജെപി നേതാവ് ശോഭാ സുരേന്ദ്രന്‍ രംഗത്ത്. യുഡിഫ് കാലത്തേക്കാള്‍ കൂടുതല്‍ ബന്ധുക്കളും സ്വന്തക്കാരും നിയമനം നേടി എന്നതാണ് വസ്തുതയെന്ന് ശോഭാ സുരേന്ദ്രന്‍ ആരോപിച്ചു.

ശോഭാ സുരേന്ദ്രന്റെ ഫേസ്ബുക്ക് പോസ്റ്റ് പൂര്‍ണരൂപം:

'' മന്ത്രി എ കെ ബാലന്‍ ഇന്നൊരു വാര്‍ത്താ സമ്മേളനം നടത്തി. തട്ടിപ്പുകള്‍ക്കിടയിലെ ഇടവേളകള്‍ എങ്ങനെ പരിഹാസ്യമായി ഉപയോഗപ്പെടുത്താം എന്നതായിരുന്നു പത്രസമ്മേളനത്തിന്റെ രത്‌നച്ചുരുക്കം. സ്വര്‍ണ്ണക്കള്ളക്കടത്തിനെതിരെ ആരോപണം ഉന്നയിക്കുന്നത് ഫാസിസമാണ് എന്നതാണ് പ്രധാന നിരീക്ഷണം. ഭയങ്കരം! എസ്‌എഫ്‌ഐ നേതാക്കന്മാര്‍ക്ക് പിന്‍വാതില്‍ നിയമനം നടത്തുന്നത് സോഷ്യലിസവും, മാര്‍ക്ക്‌ ദാനം നടത്തുന്നത് മാര്‍ക്സിസവും, സ്വര്‍ണക്കടത്തിനെ വിമര്‍ശിക്കുന്നത് ഫാസിസവും.

കൊള്ളാം. നല്ല വര്‍ഗ്ഗവിശകലനം. അഭ്യസ്തവിദ്യരായ തൊഴില്‍രഹിതരുടെ വിഷയത്തില്‍ തെറ്റിദ്ധാരണാജനകമായ കാര്യങ്ങളാണ് മന്ത്രി ബാലന്‍ പറഞ്ഞത്. യുഡിഫ് കാലത്തേക്കാള്‍ കൂടുതല്‍ നിയമനം നടത്തി എന്നാണ് ബാലന്‍ സഖാവ് പറയുന്നത്. യുഡിഫ് കാലത്തേക്കാള്‍ കൂടുതല്‍ ബന്ധുക്കളും സ്വന്തക്കാരും നിയമനം നേടി എന്നതാണ് വസ്തുത. പി എസ് സി അഡ്വൈസ് ലെറ്റര്‍ അയയ്ക്കുന്നതിനെ നിയമനം എന്നൊക്കെ പറഞ്ഞ് തെറ്റിദ്ധരിപ്പിച്ചാല്‍ അത് ഒരു മന്ത്രി തന്നെ ചെയ്താല്‍ അതിനെ അവജ്ഞയോടെ തള്ളിക്കളയാന്‍ മാത്രമുള്ള വിവേകം ഈ നാട്ടിലെ യുവാക്കള്‍ക്കുണ്ട്.

യുഡിഎഫിനേക്കാള്‍ കൂടുതല്‍ നിയമനങ്ങള്‍ നടത്താം എന്നല്ല ഈ നാട്ടിലെ യുവാക്കളുടെ തൊഴില്‍ പ്രശ്നങ്ങള്‍ പരിഹരിക്കാം എന്ന് പറഞ്ഞാണ് നിങ്ങള്‍ അധികാരത്തിലേറിയത് എന്ന് മറക്കരുത്. മുഖ്യമന്ത്രിയുടെ ഓഫിസിന് നേരെയുള്ള ആരോപണങ്ങളില്‍ എന്‍ ഐ എയുടെ അധികാരപരിധിക്ക് പുറത്തുള്ള കാര്യങ്ങള്‍ മുഖ്യമന്ത്രിക്ക് കീഴിലുള്ള ചീഫ് സെക്രട്ടറി അന്വേഷിക്കും, കേരളത്തിന്റെ കോവിഡ് പ്രതിരോധ പ്രവര്‍ത്തനങ്ങളെ വിദേശകാര്യ സെക്രട്ടറി അഭിനന്ദിച്ചു എന്ന് തുടങ്ങി ഒരുപിടി നുണകളും പരിഹാസ്യമായ വാദങ്ങളുമായി ബാലന്‍ സഖാവ് അങ്ങനെ കത്തിക്കയറി. എല്‍ഡിഎഫ് വരും എല്ലാം ശരിയാകും എന്നവകാശപ്പെട്ട് അധികാരത്തിലെത്തിയ സര്‍ക്കാര്‍ യുഡിഫിന്റെ അഴിമതികളുമായി താരതമ്യം ചെയ്ത് തങ്ങളുടെ വിഴുപ്പിന്റെ ഭാരക്കുറവിനെ കുറിച്ച്‌ മേനിനടിക്കുന്നതിനെ ഗതികേട് എന്നല്ലാതെ എന്ത് പറയാന്‍?