തദ്ദേശ സ്വയം ഭരണ സ്ഥാപനങ്ങളിലെ ഓഡിറ്റ് നിര്‍ത്തിവെച്ച സംഭവത്തില്‍ സര്‍ക്കാരിനോട് വിശദീകരണം തേടി ഹൈക്കോടതി. ഡയറക്ടറുടെ നിര്‍ദ്ദേശ പ്രകാരം ഓഡിറ്റ് വകുപ്പ് തദ്ദേശ സ്വയംഭരണ സ്ഥാപനങ്ങളിലെ ഓഡിറ്റ് നിര്‍ത്തിവെച്ച നടപടി ചോദ്യം ചെയ്തു കൊണ്ട് പ്രതിപക്ഷ നേതാവ് രമേശ് ചെന്നിത്തല നല്‍കിയ ഹര്‍ജിയിലാണ് കോടതി സര്‍ക്കാരിനോട് വിശദീകരണം തേടിയത്.

എന്തു കൊണ്ടാണ് തദ്ദേശ സ്ഥാപനങ്ങളിലെ ഓഡിറ്റ് നിര്‍ത്തിവെച്ചതെന്ന് സര്‍ക്കാര്‍ വ്യക്തമാക്കണമെന്നാണ് കോടതിയുടെ നിര്‍ദ്ദേശം. ചൊവ്വാഴ്ച്ചയാണ് കോടതി വീണ്ടും ഹര്‍ജി പരിഗണിക്കുന്നത്. ഓഡിറ്റ് നിര്‍ത്തിവെയ്ക്കാനുള്ള ഡയറക്ടറുടെ നടപടി നിയമ വിരുദ്ധവും ഭരണഘടനാ ലംഘനവുമാണെന്നാണ് ഹര്‍ജിയില്‍ രമേശ് ചെന്നിത്തല ആരോപിക്കുന്നത്. ലൈഫ് മിഷന്‍ പദ്ധതിയില്‍ ഉള്‍പ്പെടെ വ്യാപകമായി ക്രമക്കേട് നടന്നിട്ടുണ്ട്. ഓഡിറ്റിംഗ് നടന്നാല്‍ ഉദ്യോഗസ്ഥരും രാഷ്ട്രീയക്കാരും ഉള്‍പ്പെടെയുള്ളവരുടെ അഴിമതി പുറത്തുവരുമെന്നും ചെന്നിത്തല ആരോപിച്ചു.

തെരഞ്ഞെടുപ്പ് അടുത്ത സാഹചര്യത്തില്‍ ഈ അഴിമതി മറച്ചു വെയ്ക്കാനാണ് സര്‍ക്കാര്‍ ഓഡിറ്റിംഗ് നിര്‍ത്തിവെച്ചത്. കേന്ദ്ര ധനകാര്യ കമ്മീഷന്റെ മാര്‍ഗ രേഖ കിട്ടിയിട്ടില്ലെന്നത് തെറ്റായ വാദമാണെന്നും ഓഡിറ്റ് ഉടന്‍ പുനരാരംഭിക്കണമെന്നും ചെന്നിത്തല ഹര്‍ജിയില്‍ ആവശ്യപ്പെടുന്നു.