ഇനി തോട്ടിക്കളി വേണ്ട. എക്കാലത്തും ആനകളുടെ പേടിസ്വപ്‌നമായിരുന്ന തോട്ടിക്ക് ഇനി പടിയിറങ്ങാം. ഇതു സംബന്ധിച്ചു പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ജി. ഹരികുമാര്‍ കഴിഞ്ഞ ദിവസം ഉത്തരവിറക്കി. പാപ്പാന്മാര്‍ തോട്ടി ഉപയോഗിച്ചാല്‍ ഉടമയും അകത്താകുമെന്ന് ഉത്തരവില്‍ പറയുന്നു. ഇരുമ്പുതോട്ടിക്കു പകരം ആനയെ നിയന്ത്രിക്കുന്നതിനു വടി ഉപയോഗിക്കാം.
ഇതു സംബന്ധിച്ച് 2010 ഫെബ്രുവരി 26 നു രാജസ്ഥാന്‍ ഹൈക്കോടതി പുറപ്പെടുവിച്ച ഉത്തരവിലാണ് ഇരുമ്പുകൊണ്ടുള്ള തോട്ടിക്ക് (അങ്കുശ്) ആദ്യം വിലക്കേര്‍പ്പെടുത്തിയത്.
തുടര്‍ന്ന് കേന്ദ്ര വനം പരിസ്ഥിതി മന്ത്രാലയത്തിലെ ഫോറസ്റ്റ് എലിഫെന്റ് വിഭാഗം ഐ.ജി, എല്ലാ സംസ്ഥാനങ്ങളിലും തോട്ടി ഉപയോഗിക്കുന്നതു നിരോധിക്കണമെന്നു നിര്‍ദേശിച്ചു. ഇത് ഉള്‍ക്കൊണ്ടാണു സംസ്ഥാനത്തു തോട്ടി ഉപയോഗിച്ചുള്ള ആനനിയന്ത്രണം നിരോധിക്കാന്‍ വനം വകുപ്പ് തയാറായിരിക്കുന്നത്.
പണ്ടുകാലം മുതല്‍ നിയന്ത്രിക്കുന്നതിന് ഇരുമ്പുതോട്ടിയാണ് ഉപയോഗിക്കുന്നത്.ആനയുടെ തൊലിപ്പുറത്ത് ഇത് കുത്തുന്നതുമൂലം ശരീരത്ത് പലപ്പോഴും മാരകമായ വൃണങ്ങളുണ്ടാകുന്നു.
യഥാസമയം ചികിത്സ നല്‍കാതെ ആനയെ ഉപയോഗിച്ച് കൂപ്പിലും മറ്റും പണിയെടുപ്പിക്കുകയാണു പതിവ്. ഇക്കാര്യത്തില്‍ ആന ഉടമകള്‍, പാപ്പാന്മാര്‍, വനംവകുപ്പ് ഉദ്യോഗസ്ഥര്‍, പൊതുജനങ്ങള്‍ തുടങ്ങിയവര്‍ക്ക് ബോധവത്കരണം നല്‍കണമെന്നു ചീഫ് ഫോറസ്റ്റ് കണ്‍സര്‍വേറ്റര്‍ ഉത്തരവിലൂടെ ആവശ്യപ്പെട്ടിട്ടുണ്ട്. എന്നാല്‍, വടികൊണ്ടുമാത്രം ആനകളെ നിയന്ത്രിക്കാന്‍ കഴിയില്ലെന്നാണു പാപ്പാന്മാര്‍ പറയുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha