ഗായത്രി സുരേഷിനോടൊപ്പം അപകട സമയത്ത് വാഹനത്തിൽ ഉണ്ടായിരുന്നത് താനാണെന്ന തരത്തില്‍ പ്രചരിക്കുന്ന വാര്‍ത്ത നിഷേധിച്ച്‌ നടന്‍ ജിഷിന്‍ മോഹന്‍. അനാവശ്യ വിവാദങ്ങളിലേക്ക് വലിച്ചിഴയ്ക്കരുതെന്നും അദ്ദേഹം സോഷ്യല്‍ മീഡിയയിലെ ലൈവിലൂടെ എത്തി പ്രതികരിക്കുകയായിരുന്നു. ഗായത്രിക്കൊപ്പം ഉണ്ടായിരുന്നത് സീരിയില്‍ താരം ജിഷിന്‍ ആണെന്ന വാര്‍ത്ത ചില യൂട്യൂബ് ചാനലുകളിലാണ് പ്രത്യക്ഷപ്പെട്ടിരുന്നു.

'ആ ജിഷിന്‍ ഞാനല്ല. ഗായത്രി സുരേഷിന് ഒപ്പം ഉണ്ടായിരുന്ന സീരിയല്‍ നടന്‍ ഇവനാണ് എന്ന തലക്കെട്ടോടെ ചില വാര്‍ത്തകള്‍ കണ്ടു. ശരിക്കും മാനനഷ്ടത്തിന് കേസ് നല്‍കുകയാണ് വേണ്ടത്. പക്ഷേ അതിനൊന്നും സമയമില്ല. നിങ്ങള്‍ വാര്‍ത്ത വളച്ചൊടിച്ച്‌ കൊടുക്കുമ്പോള്‍ എനിക്കും അച്ഛനും അമ്മയും ഉണ്ടെന്ന് ഓര്‍ക്കണം'. ജിഷിന്‍ സോഷ്യല്‍ മീഡിയയില്‍ വ്യക്തമാക്കി.

കഴിഞ്ഞ ദിവസം കാക്കനാട്ടുവച്ചാണ് ഗായത്രി സുരേഷും സുഹൃത്തും സഞ്ചരിച്ചിരുന്ന വാഹനം അപകടത്തില്‍പ്പെട്ടത്. അപകടമുണ്ടാക്കിയിട്ടും ഗായത്രിയും സുഹൃത്തും വാഹനം നിറുത്താതെ ഓടിച്ചുപോകുകയായിരുന്നു. ഇരുവരുടെയും നടപടി നാട്ടുകാര്‍ ചോദ്യം ചെയ്തിരുന്നു.